भाजप उमेदवार आयज जातलो जाहीर

भांगरभूंय | प्रतिनिधी

– रितेश नायक हांकां उमेदवारी निश्चीत

– विरोधकां मदीं दुफळी, लडत भोरंगी जावपाचे निश्चीत

-मिकी पाशेको उमेदवार दवरपाची शक्यताय

पणजी : फोंडें पोटवेंचणुके खातीर भारतीय जनता पक्षाचो उमेदवार आयज संवसार पाडव्याच्या म्हूर्ताचेर जाहीर जातलो. प्रदेश भाजप अध्यक्ष दामू नायक हांणी ही म्हायती दिली. आदले मुख्यमंत्री रवी नायक हांचो पूत रितेश नायक हाका उमेदवारी दिवपाचे निश्चीत जालां, अशी म्हायती गोपांनी दिली.

भाजप उमेदवाराचें नाव जाहीर जाले उपरांत फोंडें पोटवेंचणुकेचे चित्र स्पश्ट जातलें. विरोधकां मदीं दुफळी आशिल्ल्यान ही लडत भोरंगी जावपाचे आता निश्चीत जालां. आरजी तशेंच आम आदमी पक्षा कडल्यान वेंचणूक लडोवपाची तयारी सुरू आसा. हातूत परत आता आदले मंत्री मिकी पाशेको हांणी लेगीत फोंडें पोटवेंचणुकेत उमेदवार दवरपाची घोशणा केल्या.

प्रदेश भाजपान रितेश नायक आनी विश्वनाथ दळवी ह्या दोगांची नांवां दिल्ली धाडल्या. भाजप संसदीय मंडळाची बसका बुधवारा राती जातली. हे बसकेत उमेदवार निश्चित जातलो. बिरेस्तारा उमेदवार जाहीर जातलो. चर्चेची गरज पडली जाल्यार आयज हांव दिल्ली वतलो. केंद्रीय फुडाऱ्यांनी आपयलो जाल्यार हांव दिल्ली वतलो. उमेदवारा विशीं केंद्रीय फुडाऱ्यां कडेन आमची चर्चा जाल्या. तरी आनीक चर्चेची गरज भासली जाल्यार म्हाका दिल्ली वचचे पडटले, अशी म्हायती प्रदेश अध्यक्ष दामू नायक हांणी दिली.

2022 पयली भारतीय जनता पक्षाक फोंडा मतदारसंघात केन्नाच येस मेळूक ना. 2022च्या विधानसभा वेंचणुके पयली रवी नायक हांणी काँग्रेसीतल्यान भाजपात प्रवेस केलो. तांका उमेदवारी दिल्या उपरान भारतीय जनता पक्षान पयलेच खेपो फोंडा मतदारसंघात जैत मेळयले. रवी नायक हांचे आकस्मीक मरणाक लागून ही पोटवेंचणूक जाता. मित्र पक्ष आशिल्ल्या मगो सयत तरेकवार भाजप आमदारांनी लेगीत रवी नायक हांचे पूताक उमेदवारी दिवपाची मागणी केल्या. सर्गेस्त रवी नायक हांचे कार्य फुडे व्हरपा खातीर रितेश नायक हांकाच भाजपाची पसंती आसा. रवी नायक हांची पारंपरीक मतां आनी सहानुभूतीचो सगळ्यांत चड लाव पूत रितेश नायक हांकाच जातलो, हे गणित हाचे फाटल्यान आसा.

फोंडें मतदारसंघा खातीर 9 एप्रीलाक मतदान जातलें. उमेदवारी अर्ज दाखल करपाची 23 मार्च ही निमणी तारीख आसा. अर्ज सादर करपाची निमणी तारीख लागी पाविल्ल्यान हेर राजकी पक्षांनी लेगीत उमेदवाराची निवड करपाची तयारी सुरू केल्या.

फोंडें मतदारसंघाची पोटवेंचणूक जाहीर जावचे पयलीच प्रचाराक सुरवात जाल्या. भाजपाचे संभाव्य उमेदवार रितेश नायक, काँग्रेसीचे केतन भाटीकार हांणी पयली सावन जनसंपर्क सादपाक सुरवात केल्या. हे खेपे फकत फोंडें मतदारसंघांत पोटवेंचणूक आशिल्ल्यान प्रचारा खातीर सगळ्या राजकी पक्षांचे फुडारी फोंडें मतदारसंघात ठाण मांडून रावतले.