भांगरभूंय | प्रतिनिधी
पणजी : भारतीय जनता पक्षान उत्तर गोंयची उमेदवारी केंद्रीय मंत्री श्रीपाद नायक हांका सेगीत सवे खेपे दिल्या. दक्षीण गोंयच्या उमेदवार विशीं अजून निर्णय जावपाचो आसा. प्रदेश अध्यक्ष, निरिक्षक हांणी केंद्रीय फुडाऱ्यां कडेन मतां मांडली आसली तरी मुख्यमंत्री डॉ. प्रमोद सावंत हांचे मत निर्णायक थारतलें अशी स्थिती आसा.
उत्तर गोंया खातीर केंद्रीय मंत्री श्रीपाद नायक हांचें सयत चार नांवांची शिफारस वेंचणूक समितीन केल्ली. शिफारस केल्ले चौगूय जाण भंडारी समाजाचे आशिल्ले. दयानंद सोपटे, दिलीप परूळेकार आनी दयानंद मांद्रेंकार ह्या तिगांची वेंचणूक लडोवपाची इत्सा आशिल्ली. तरी लेगीत मुख्यमंत्री डॉ. प्रमोद सावंत हांणी आपले वजन श्रीपाद नायक हांचे वटेन घालें आनी तांकां परतून उमेदवारी मेळ्ळी.
दक्षीण गोंय मतदारसंघ हो भाजपा खातीर प्रतिश्ठेचो मतदारसंघ आसा. 2019 वर्सा अॅड. नरेंद्र सावयकार हे कांय मतांनी पराभूत जाल्यात. ह्या मतदारसंघात ख्रिस्ती मतां आशिल्ल्यान निर्णय घेवप कठीण जालां. चंद्रकांत कवळेंकार आनी अॅड. नरेंद्र सावयकार हीं दोन नांवां चर्चेंत आसात. संसदीय मंडळाचे बसकेंत ह्या दोन नांवांचेर विचार जालो. अॅड. नरेंद्र सावयकार हांचो फाटले वेंचणुकेंत पराभव जाल्लो. परतून तांकां उमेदवारी दिवची काय? असो प्रस्न आसा. आदले मुख्यमंत्री दिगंबर कामत हे सक्षम उमेदवार आशिल्ले. तांणी वेंचणूक लडोवपाक पयलींच न्हयकार दिलो. चंद्रकांत कवळेंकार हे केडराचे कार्यकर्ते नात. परतून फाटले विधानसभा वेंचणुकेंत ते पराभूत जाल्यात. तशेंच फाटले वेंचणुकेंत सांगें मतदारसंघांत भाजप उमेदवारा आड तांची घरकान्न वेंचणुकेंत उबी राविल्ली. तांचेर भ्रश्टाचाराचे आरोप जाल्ले आसात. हे फाटभुंयेर मुख्यमंत्री डॉ. प्रमोद सावंत हे कोणाक पसंती दितात, ताका उमेदवारी मेळटली अशें सध्याचे चित्र आसा. दक्षीण गोंयचो उमेदवार जाहीर जावचे पयलीं परत एकदा विचारविनीमय जातलो, अशी म्हायती गोपांनी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
