भांगरभूंय | प्रतिनिधी
पणजी: भाजप आनी तांच्या युतीतलो घटक पक्ष मगो हांचे मदल्या एका विधाना वेल्यान चर्चा सुरू जाल्या. राज्याचे परिवहन मंत्री मॉविन गुदिन्हो हांणी फाटीं एका सत्कार सुवाळ्याक मगोपचे मांद्रेंचे आमदार जीत आरोलकार हांकां फुडली वेंचणूक भाजपा वतीन लढोवपाचें जें विधान केल्लें ताचे विशीं आतां चर्चा जावपाक लागल्या. प्रदेशाध्यक्ष दामू नायक हांणी ह्या प्रकरणाचेर आतां उलोवप केलां.
आयज पणजेच्या भाजपाच्या मुखेल कार्यालयांत ’भाजप स्थापना दीस’ उमेदीन मनयलो. हे कार्यावळी उपरांत पत्रकारां कडेन उलयतना भाजप प्रदेशाध्यक्ष दामू नायक हांणी मंत्री मॉविन गुदिन्हो हांच्या विधानाविशीं आपली भुमिका मांडली. पक्षांतल्या ज्येश्ठ फुडार्यांनी जापसालदारकेन वागप गरजेचें. संबंधितांक आजूनय पक्षाची कार्यपद्धती खबर नासल्यार तें जापसालदार नाशिल्ल्याचें लक्षण. अध्यक्ष म्हणून संबंधितांचेर योग्य वेळार योग्य कारवाय करतले. भाजपांत कार्यकर्त्यांक प्रशिक्षीत करपा खातीर कार्यशाळ घेतात, हातूंत पक्षाचीं धोरणां आनी शिस्तीचेर र दितात. आपल्याक जाय तशें वक्तव्य करपाची मेकळीक आजूनय पक्षान कोणाकूच दिली ना, फुडार्यांनी हें लक्षांत दवरप गरजेचें. ह्या प्रकरणाची खरपणान दखल घेतल्या, प्रदेशाध्यक्ष म्हणून आमी योग्य वेळार योग्य कारवाय करतले, अशे संकेत तांणी दिले.
दामू नायक हांणी ह्या वेळार फोंडें पोटवेंचणुकेचेरूय उलोवप केलें. भाजप ही वेंचणूक पुराय तांकीन लढटा, ३,५०० परस चड मतांच्या फरकान भाजपाच्या उमेदवाराक जैत मेळटलें, असो विस्वास तांणी उक्तायलो. कॉंग्रेसी कडल्यान जावपी टिकेक जाप दितना तांणी स्पश्ट केलें, भाजप खंयचीच वेंचणूक हलक्यान घेना आनी हेंच पक्षाच्या येसाचें सुत्र जावन आसा.
दोन दोन दिसां आदीं मगोपचे केंद्रीय समितीचे अध्यक्ष दिपक ढवळीकार हांणीय ह्या विशयाचेर आपली प्रतिक्रिया दिली. गुदिन्हो हांच्या विधानाक लागून मगोपचे कार्यकर्ते आनी मतदारां मदीं कारणा बगर संभ्रम निर्माण जावपाक शकता, अशें सांगत तांणी ह्या विधानाचो निशेध केलो.
ढवळीकार हांणी म्हणलें, आमदार जीत आरोलकार हे मगोप कडेन एकनिश्ठ आसात आनी तांणी स्वताय हें स्पश्ट केलां. तशेंच जेन्ना दोन पक्षांची अधिकृत युती आसता तेन्ना अशे तरेचीं विधानां करप युती धर्माक धरून नाशिल्ल्याचेंय तांणी नमूद केलें. मुख्यमंत्र्यांनी असल्या विधानांचेर नियंत्रण दवरप गरजेचें आशिल्ल्याचें सांगून, गुदिन्हो हांणी दुसर्या पक्षाच्या भितरल्या गजालींनी लक्ष दिवचे परस स्वताच्या पक्षाच्या कामाचेर लक्ष दिवचें, अशें ढवळीकार हांणी सुचयलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
