भांगरभूंय | प्रतिनिधी
-दयानंद सोपटे, दामू नायक हांच्या नांवाची लेगीत चर्चापणजी : प्रदेश भाजप अध्यक्षपदा खातीर आदले मंत्री दिलीप परूळेकार आनी आदले खासदार अॅड. नरेंद्र सावयकार हांचीं नांवां आघाडीचेर आसात. दिलीप परूळेकार आनी अॅड. नरेंद्र सावयकार हांचे सयत आदले आमदार दयानंद सोपटे आनी दामू नायक हांच्या नांवाची लेगीत चर्चा आसा. डिसेंबर सोंपपाक वा जानेवारीच्या सुरवातीक नव्या प्रदेश अध्यक्षांची निवड जातली. चर्चेत आशिल्ल्यां मदी एकलोय हाचे पयली अध्यक्ष जावंक ना.
प्रदेश अध्यक्षपदा खातीर हांव इत्सूक आसा. सध्याचे अध्यक्ष सदानंद शेट तानावडे हांचे कडेन लेगीत हांवेन चर्चा केल्या. पक्षाचे फुडारी देवेंद्र फडणवीस हांचे कडेन लेगीत हांवे अध्यक्षपदाक इत्सूक आशिल्ल्याचो प्रस्ताव मांडला. भारतीय जनता पक्षाचे कार्य हांव फाटली बरीच वर्सां करता. फांटले वेंचणुकेंत म्हाका उमेदवारी दिवंक ना, तरी लेगीत हांवेन बंडखोरी करूंक ना. अध्यक्षपदा खातीर हांवेन नेतृत्वा कडेन दावो केलो, अशें दिलीप परूळेकार हांणी सांगलें.
अॅड. नरेंद्र सावयकार हे लेगीत बरीच वर्सां भारतीय जनता पक्षाचे कार्य करीत आसा. अध्यक्षपदा विशीं पक्ष निर्णय घेतलो. अजून विचार जावंक ना, अशें अॅड. नरेंद्र सावयकार हांणी सांगलें.
पक्षा कडेन एकनिश्ट आनी कार्यक्षम व्यक्तीची निवड अध्यक्ष पदाचेर जावपाक जाय. पक्ष दिता ती जापसालदारकी हांवेन स्विकारल्या. अध्यक्षपदाची जापसालदारकी पक्षान दिली जाल्यार म्हाका ती स्विकारचीच पडटली, अशें दयानंद सोपटे हांणी सांगलें.
देशा सयत गोंयांत भाजपाची वांगडी नोंदणी मोहीम सुरू आसा. पक्षान 4 लाख वांगडी नोंदणी करपाचें उद्दिश्ट पुराय केलां. संघटणात्मक वेंचणूक प्रक्रिया आतां सुरू जातली. डिसेंबर मेरेन नव्या अध्यक्षांची निवड जातली, अशें प्रदेश अध्यक्ष सदानंद शेट तानावडे हांणी सांगलें.
29 नोव्हेंबराक मार्गदर्शनपर कार्यशाळा जातली. पक्षाचे राष्ट्रीय पदाधिकारी रेखा वर्मा आनी राज्याचे प्रभारी आशीश सूद हे कार्यशाळेक हाजीर आसतले. हे कार्यावळींत वेंचणुकेची कार्यावळ निश्चीत जातली. राष्ट्रीय मळार संघटणात्मक वेंचणुकेची प्रक्रिया जानेवारी मेरेन पुराय जातली. गोंयांत ती डिसेंबर मेरेन पुराय जातली अशी म्हायती गोपां कडल्यान मेळ्ळी. महाराष्ट्र तशेंच झारखंड ह्या राज्यांनी विधानसभा वेंचणूक आनी लोकसभा पाेटवेंचणूक जाले उपरांत राज्यांतल्या तशेंच देशांतल्या फुडाऱ्यांक आतां विसव मेळटलो. हाका लागून संघटणात्मक वेंचणुके कडेन लक्ष दिवप फुडाऱ्यांक शक्य जातलें. हाचोच भाग म्हूण आयतारा पक्षाची बसका जाली. हे बसकेक बूथ पांवड्या वेल्या वेंचणूक प्रक्रियेचेर चर्चा जाली. बूथ समित्यांची निवड जाले उपरांत हेर समित्यांची निवड जातली. निमाणे अध्यक्षांचें नांव जाहीर जातलें, अशी म्हायती गोपांनी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
