भांगरभूंय | प्रतिनिधी
श्रीपाद नायकः नगरगांव, सांवर्डें पंचायत वाठारांत म्हासंपर्क मोहीम
भांगरभूंय । प्रतिनिधी
वाळपयः भाजपा हो सर्वसामान्यांची जतनाय घेवपी राजकी पक्ष. ह्या पक्षान आतां मेरेन समाजसेवेच्या माध्यमांतल्यान राजकारण केलां. ताका लागून फुडारांत ह्याच पक्षाचें केंद्रांत सरकार हाडचे खातीर दरेकल्यान आदार करचो. देशाचे सर्वांगी वाटचालींत सर्वसमान्यांनी वांटो घेवप सामकें गरजेचें आसा, अशें केंद्रीय मंत्री तशेंच उत्तर गोंयचे खासदार श्रीपाद नायक हांणा सांगलें.
वाळपय मतदारसंघांतल्या नगरगांव आनी सांवर्डें पंचायत वाठारांतले म्हासंपर्क मोहिमे खाला खूबशां कुटुंबांक तांणी मरेंद्र मोदी सरकाराच्या नव्या वर्साचे कारकिर्दींतल्या म्हत्वाचे कामगिरी संबंदांत पुस्तिका तांकां दिल्यो. तेचवरी तांचे वांगडा साबार विशयांचेर थेट संवाद सादलो. ह्या वेळार तांचे वांगडा वाळपय मतदारसंघ भाजपाचे संघटक विनोद शिंदे, सावर्डेंची सरपंच उज्वला गांवकार आनी नगरगांवची सरपंच संध्या खाडीलकार हाजीर आशिल्ली.
केंद्रांतलें सरकार बरो वावर करता. देशांतल्या सर्वसामान्यांक उदरगतीच्या प्रवाहांत वांटेकार करून घेवपाचे नदरेन विवीध कल्याणकारी येवजण्यो चालीक लायल्यात. ह्या येवजण्यांचो व्हड प्रमाणांत सर्वसामान्य घटक फायदो घेतात, ही खऱ्यानीच कवतुकाची गजाल. केंद्राच्यो खूबश्यो कल्याणकारी येवजण्यो आसासत. त्यो तळागाळां मेरेन पावोवप तितलेंच म्हत्वाचें आसा. हे खातीर भाजपा कार्यकर्त्यांनी विशेश योगदान दिवप गरजेचें आसा. फुडारांत देशाची खऱ्या अर्थान उदरगत करपाची आसत जाल्यार दरेका मळार व्हड कामगिरी जावप गरजेचें आसा. हेच दिशेन नरेंद्र मोदी सरकार काम करता, अशें नायक हांणी स्पश्ट केलें.
मोदी सरकार हे सर्वसामान्यांक आपलेशें दिसपाक लागलां, कारण जे पद्दतीन फाटल्या 9 वर्सांत ह्या सरकारान देशाचे उदरगती संबंदांत काम केलां, तें खऱ्यांनीच तोखणायेचें आसा. फुडल्या वर्सा लोकसभेची वेंचणूक जातली. हे खातीर फाटल्या 9 वर्सांतल्या सरकाराच्या कामाचो नियाळ सगळ्या मेरेन पावचो हे खातरी भाजपान म्हासंपर्क मोहिमेचें आयोजन केलां. हे मोहिमे खाला वेगवेगळ्या मतदारसंघांनी पक्षाचे फुडारी आनी कार्यकर्ते भेटी दिवन केंद्र सरकाराच्या वावराची म्हायती दिवपाचो यत्न करतात.
नगरगांव पंचायतींतले भेटी वेळार खासदार नायक हांचे वांगडा सरपंच संध्या खाडीलकार, पंच राजेंद्र अभ्यंकर, देवयानी गांवकार, उर्मिला गांवस, चंद्रकांत माईणकार, रामा करवत, मामू खरवत आनी हेर मुखेल कार्यकर्ते हाजीर आशिल्ले. सावर्डें पंचायतींतले भेटी वेलार सरपंच उज्वला गांवकार, नितेंद्र बाळासाहेब राणे, शिवा कुडशेंकार, शिवाजी देसाय, बुधाजी गांवकार, यशोदा गावडे हाजीर आशिल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
