भांगरभूंय | प्रतिनिधी
वेंचणूक जिखपा खातीर धेंपे ब्रॅण्डाचो वापर केल्ल्याचो दावो
भांगरभूंय । प्रतिनिधी
मडगांवः भाजपाक सगळेच सुवातांचेर बरी लडत दिवपाची आसता. जंय संद नासता थंय लेगीत संद सोदपाचो यत्न भाजप करता. गोंयांत धेंपे हें व्हड नांव. ह्याच धेंपे ब्रँण्डाचो वापर करून भाजप दक्षीण गोंयांत वेंचणूक जिखपाक सोदता. काँग्रेसीन उमेदवार जाहीर करूंक ना आनी भाजपाचे कार्यकर्ते कितलो प्रचार करतात, हाचेर फुडलें निंबून आसा. पूण आपूण भाजपा वांगडा आसचो ना, अशें गोवा फॉरवर्ड अध्यक्ष विजय सरदेसाय हांणी सांगलें.
दक्षीण गोंय मतदारसंघांत लोकसभा वेंचणुके खातीर भाजपा वतीन पल्लवी धेंपे हांकां उमेदवारी दिल्या. हाचेर सरदेसाय आपली प्रतिक्रिया दिताले. भाजपान आमदारांक पक्षांत प्रवेश दिला तरी लेगीत तांकां दक्षीण गोंयांत लोकसभा वेंचणूक जिखपाची आशा ना. जांणी लोकांचो विस्वासघात केला, तांकां लोकांच्या दारार व्हेल्यार लोक मत दिवचे नात. हे परिस्थितीचो अभ्यास केले उपरांत भाजप पक्ष श्रेश्ठींनी धेंपे ह्या ब्रँण्डाचो वापर करून वेंचणूक जिखपाचो यत्न सुरू केला. भाजपाच्या पक्ष श्रेश्ठींनी गोंयांतले परिस्थितीचो बरो अभ्यास केला. पक्षांतर केल्ल्या आमदारांच्या नांवान मतां मेळचीं नात. जीं नांवां पक्षा वतीन दक्षीण गोंयांतले उमेदवारी खातीर दिल्ली धाडिल्लीं, तातूंतलें एकूय नांव जिखपाक शकचें ना, अशें दिशिल्ल्यान भाजपान नारीशक्तीक फुडें हाडपाचो निर्णय घेतलो. पूण भाजपा महिला मोर्चा कडेन लेगीत एकूय अशें नांव नाशिल्लें, जें वेंचणूक जिखपाक शकतलें. हेच खातीर धेंपे हांचें नांव फुडें काडलां. धेंपे हें गोंयांतलें एक व्हड न्व आसा. बाबा धेंपे हांचो वावर सगळ्यांक खबर आसा. भाजपाच्या ब्रँण्डाचेर वेंचणूक जिखपाक शकना हें दिसताच धेंपे ब्रँण्डाचेर वेंचणूक जिखपाचो यत्न भाजपान चलयला. बाबा धेंपे हे आपले इश्ट आसले तरी लेगीत तांचे इश्ट सगळ्या पक्षांनी आसात. पूण सध्या राजकारण बदल्लां. मतदान प्रक्रियेंतल्यान जिखप हें वेगळें आसा. भाजपाचे कार्यकर्ते कितलो यत्न करतले, प्रचार करतले, हे सगळें पळोवचें पडटलें. काँग्रेसन अजून लेगीत उमेदवार जाहीर करूंक ना, पूण आपूण भाजपा वांगडा आसचों ना, अशें सरदेसाय हांणी सांगलें.
मतदार विचारपूर्वक मतदान करतलेः सरदेसाय
भाजपाच्या पक्षचिन्नाचो इतलो प्रभाव आशिल्लो जाल्यार आपूण आमदार म्हूण वेंचुनूच येवचो नाशिल्लों. आपूण एकदां अपक्ष आनी दोनदां नाल्ल ह्या चिन्नाचेर वेंचणूक लडोवन वेंचून आयलां. गोंयांतल्या सुशिक्षीत लोकांक सगळें खबर आसा. मतदार विचारपूर्वक मतदान करतले, अशें विजय सरदेसाय हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
