भांगरभूंय | प्रतिनिधी
भांगरभूंय । खबरां संस्था
नागपूर : हांगाची भाजपा फुडारी सना खान हिची जबलपूरांत हत्त्या जाल्या. त्या प्रकरणांत दुबावीत अमित उर्फ पप्पू साहू हाका पुलिसांनी अटक केल्या. अमितान सनाक मारून तिची कूड न्हंयेंत उडयिल्ल्याचें मान्य केलां. सनान चार म्हयन्यां पयलीं ताचे वांगडा कोर्ट मॅरेज केल्लें. पुलिसांनी आनीक दोगांक ताब्यांत घेतल्यात. हो खून कित्याक आनी कसो केलो तें पुलिसांक अजून कळूंक ना.
सना खान २ ऑगस्टाक जबलपुराक गेल्ली. तेन्नाच्यान ती बेपत्ता आशिल्ली. कोर्ट मॅरेजा वेळार सनान अमिताक भांगराची सरपळी दिल्ली. पूण फाटल्या कांय दिसां सावन ती अमिताच्या गळ्यांत दिसनाशिल्ली. ह्या कारणा वयल्यान तांचें मदीं वाद जाल्ले. सना खानाकूय भांगराच्या वस्ती घालपाची आवड आशिल्ली. उणेंच पांच लाखांचें भांगर ती गळ्यांत घालताली. अमितान ती सरपळी विकिल्ल्याचो दुबाव सनाच्या लागिच्यांनी उक्तायला.
भाजपा फुडारी सना तीन फोन वापरताली. तांचे कडेन १० वेगवेगळीं सीमूय आशिल्लीं. ताचेर ती कोणा कडेन आनी कितें उलयताली, ताचो तपास पुलीस करतात. तिचे हे मोबायल आनी सीमकार्डांय गायब आसात. २ ऑगस्ट पसून सना आनी अमिताचे फोन बंद आशिल्ले.
अमितान एके पुलीस बायले कडेन पयलें लग्न केल्लें. तो सोरो हाडून आपल्या ढाब्याचेर विकतालो, हें तिका आवडनाशिल्लें. म्हणून तिने ताका सोडिल्लो. ती आनी सना एकमेकां कडेन उलयतालीं.
पुलिसांनी अमिताच्या ढाब्याचेर काम करपी जितेंद्र ह्या नोकराक ताब्यांत घेतला. घडणुकेच्या अमित साहू जे मोटारींत ढाब्याचेर आयिल्लो, तातूंत रक्ताचे दाग दिशिल्लें. हांवें विचारतकच ताणें म्हाका गाळी संविल्ल्यो, अशें जितेंद्रान पुलिसांक सांगलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
