भांगरभूंय | प्रतिनिधी
पणजीः म्हायती आनी प्रसिद्धी खात्यान धारबांदोड्यां आयोजीत केल्ले भौशीक कार्यावळींत सत्ताधारी भाजपाचे सांवड्डें जिल्हो परिशदचे वांगडी मोहन गांवकार हांणी पत्रकारांक दिल्ले धमकेचो गोवा पत्रकार संघटणेन खर निशेध केला.
सरकारी माचये वयल्यान पत्रकारांक धमकावप म्हणल्यार लोकशायेचेर केल्लो थेट हल्लो. पत्रकारांच्या कल्याणाक वावुरपी म्हायती आनी प्रसिद्धी खात्याचे कार्यावळींत अशी भास वापरप योग्य न्हय.
धारबांदोडें, साकोड्डेंच्या सातपाल मैदानाचेर दोन दिसांची ‘शिव महोत्सव 2026’ कार्यावळ आयोजीत केल्ली. तातूंत अभंग रिपोस्ट आनी विवीध कार्यावळी जाल्ल्यो.
मोहन गांवकार हांणी बेगोबेग माफी मागची आनी म्हायती आनी प्रसिद्धी खात्याचें मुखेली डॉ. प्रमोद सावंत हांणी ह्या प्रकरणांत हस्तक्षेप करचो अशी मागणी गुजान केल्या.
गोंयांत प्रसार माध्यमांक धमकी दिवप वा सत्य लिपोवपाचेर चेंपण हाडपाचो कसलोय यत्न करप असले प्रकार सोंसचे नात अशेंय गुजान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
