भांगरभूंय | प्रतिनिधी
जनार्दन भंडारीः फुकटचें स्रय घेवपाक सोदिल्ल्याचो विरोधकांचो आरोप
भांगरभूंय । प्रतिनिधी
काणकोणः आपूण फक्त काणकोणचेच न्हय जाल्यार गोंयांतल्या हेर वाठारांतल्यो लेगीत समस्या सुटाव्यो जावच्यो हे खातीर संबंदितांक निवेदनां दितां. आपणें निवेदनां दिल्ल्यानूच खूबश्या वाठारांतलीं कामां जाल्यांत. मात लोकोत्सवा निमतान रस्ते दुरुस्त करचे अशें निवेदन दिल्ल्यान सभापतीक वायट कित्याक दिसचें तें आपल्याक कळूंक ना. खरें म्हणल्यार तांणी आपलें कवतूक करपाक जाय आशिल्लें, पूण ताणें आपले कडेन वाद केलो. सभापतीन वाद घातलोच, ते भायर थंय हाजीर आशिल्ल्या भाजपा कार्यकर्त्यांनी लेगीत आपल्याक वायट वागणूक दिली, अशें जनार्दन भंडारी हांणी पत्रकार परिशदेंत सांगलें.
राष्ट्रपती येवपाची आशिल्ल्यान पर्तगाळ ते आमोणें मेरेनच्या रस्त्याच्या नुतनीकरण करपाच्या कामाक हे आदींच सुरवात केल्या. तरी लेगीत जनार्दन भंडारी फुकटचें स्रय घेवपाक सोदता. अशें दिशिल्ल्यान हे संबंदांत काणकोणचे आमदार तशेंच सभापती रमेश तवडकार हांणी बिरेस्तारा दनपारां श्रीस्थळ वाठारांतल्या रावतिकेंत जनार्दन भंडारी हांकां आपोवन हाडलो आनी जाब विचारलो. ते फायभुंयेर भंडारीन पत्रकार परिशद घेतिल्ली.
डिसेंबरांत काणकोणां लोकोत्सवाचें आयोजन केलां. हे कार्यावळीक राष्ट्रपती येवपाची आसा. ते निमतान काणकोणचे रस्ते दुरुस्त करचे ना जाल्यार आंदोलन करतले, अशी शिटकावणी दिवपी निवेदन भंडारी हांणी काणकोणचे आमदार तशेंच भौशीक बांदकाम खात्याच्या रस्ते विभागाच्या वरिश्ठांक दिल्लें.
मजगतीं, हे संबंदांत काणकोण भाजपा मंडळान घेतिल्ले पत्रकार परिशदेंत सभापती तवडकार करता त्या कामांचें जनार्दन भंडारी फुकटचें स्रय घेवपाक सोदता, असो आरोप केलो.
पर्तगाळ ते खोतीगांव मेरेनच्या रस्त्याच्या दुरुस्तीकामाक 18 ऑक्टोबराक अर्थीक मंजुरी मेळ्ळ्या. 6 कोटीं परस अदीक खर्च करून रस्त्यांची दुरुस्ती करतले. रस्त्याच्या कामाक सुरवात जाले उपरांत भंडारी हांणी निवेदन भेटोवन फुकटचें स्रय घेवपाचो यत्न केला, अशें काणकोण भाजपा मंडळ अध्यक्ष विशाल देसाय हांणी सांगलें.
ह्या वेळार दिवाकर पागी, महेश नायक, विनय तुबकी, संजीव तिळवे, खोतीगांवचे सरपंच आनंदू देसाय, श्रीस्थळचे पंच राजेश वेळीप हाजीर आशिल्ले. सभापतीक मेळपाक आयिल्लो तेन्ना भंडारी वयल्या आवाजान उलयतालो. तरी लेगीत खंयच्याच कार्यकर्त्यान ताका वायट वागणूक दिवंक ना, अशें दिवाकर पागी आनी आनंदू देसाय हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
