भांगरभूंय | प्रतिनिधी
कर्नाटक विधानसभा वेंचणुकेच्या प्रचाराक नेट आयला. 2024 वर्सा लोकसभा वेंचणूक आशिल्ल्यान ही लोकसभेची सेमी
फायनल असोय बोवाळ आसतलोच. दर मतदारसंघाची बेरीज -वजाबाकी करतना प्रधानमंत्री नरेंद्र मोदी उदरगतीच्यो गजाली भाशणांनी सांगपाक लागल्यात. उदरगतींत कर्नाटक राज्य सदांच मुखार आशिल्ल्यान नवे राजकी पक्ष हे नवीं इक्वेशना घडोवपा पासत वेंचणुकेत देंवल्यात. उमेदवारांक जिखून हाडचे परस अस्तित्व तिगोवप राजकी पक्षांक म्हत्त्वाचें आसता. आदीं वेंचणूक हारिल्ल्यांक घेवन 25 – 30 टक्के मतां मेळोवप, वेंचणुकेचे सर्तीत रावन चार पयशे बोल्सांत घालून समेटाचें राजकारण खेळप नवें न्हय. राजकी पक्षांच्यो संघटनाच न्हय जाल्यार समाजीक संस्था, पंचायत, जिल्हो पंचायत, नगरपालिका वेंचणुकांनी समेटाचें राजकारण भितर सरपाक लागलां. सत्तेंत आशिल्ले कालचे मंत्री, आमदार फाल्यां विरोधकय जायत आनी विरोधी वांगडी सत्ताधारी कित्याक जावचे ना? एका तेंपार आमच्या राज्यान आमदार हेवटेन, तेवटेन वतात, उडक्यो मारतात म्हणून नामना जोडिल्ली. तेंच राजकारण देसांतच कित्याक विदेसांतय दिसता. फुटीच्या राजकारणाच्यो नव्यो देखी कर्नाटकाचे वेंचणुके वेळार आयल्यो तरी देसांतल्या राजकारणाचेर व्हड परिणाम जावचे नात. चडांत चड स- आठ म्हयने आदींच लोकसभा वेंचणूक आनी वांगडा दिल्ली, महाराष्ट्र, मध्य प्रदेशावरीं राज्याच्यो वेंचणुकोय जातल्यो.
सांखळी, फोंडे नगरपालिका वेंचणुकोय गोंय सरकारान प्रतिष्ठेच्यो केल्यात. लोकसभा वेंचणुके खातीर प्रदेश भाजपा तयार जाता, हेर राजकी पक्षांनीय लोकसभेची पिल्लूक वाजोवंक आरंभ केला. प्रदेश भाजपाक उमेदवार मेळूंक आडमेळीं ना, लोकांचे मन समजून घेतल्यार दोनय मतदारसंघांत जैत भाजपाचेंच आसतलें. राष्ट्रीय, राज्य पांवड्यार भाजपान तरनाट्यांक राजकारणात हाडपाक सुरवात केल्ल्यान लोकसभा वेंचणुकेंत गोंयांतय बदल जावपाचें चिन्न आसा. जे पद्धतीन भाजपाचे प्रदेशाध्यक्ष सदानंद तानावडे गोंयभर भोंवतात, प्रश्नांच्यो जापोय दितात तें पळेल्यार तेच भाजपचे उत्तर गोंयचे लोकसभा उमेदवार, असो दुबाव घेवपीय आसात. उत्तर गोंयचे खासदार केंद्रीय मंत्री श्रीपाद नायक हांकां वेंचणुकेंत उमेदवारी मेळ्ळ्यार भिवपाची गरज ना. श्रीपादबाबांक उत्तर गोंयचे खांची कोनशे खबर आसात, मुख्यमंत्र्यां वांगडा तांचें बरें नातेंय आसा, पिरायेन तशे श्रीपाद नायक प्रधानमंत्र्यां परस ल्हान, मंत्री म्हणून मोन्यांनी वावरय जाला. लोकसभा वेंचणुकेच्या आंगणात ते खूब फावटीं आशिल्ल्यान तांकां हारोवपा खातीर येत्न जावपाची शक्यताय आसा.
उत्तर गोंयांत भाजप बळिश्ट आसा, पूण भितल्ल्या किजिलांक लागून सादूर रावन उमेदवार बदलपाचो निर्णय भाजपाचे फुडारी घेतले अशें म्हाका दिसता. आदले मुख्यमंत्री मनोहर पर्रीकार आयज आमचे मदीं आशिल्ले जाल्यार परिवर्तना खातीर कितें करूया तें श्रीपादबाबांकच विचारतले आशिल्ले. गरज पडल्यार तांचेर प्रदेशाध्यक्षाची जापसालदारकीय घालतले आशिल्ले. गोंयांत भाजपाक सत्तेर हाडपांत श्रीपादबाबांचोय वांटो आसा हें मतींत दवरून कसलीय राजकी चाल खेळचेआदीं प्रदेश भाजपा फुडाऱ्यांनी तांकां विश्वासांत घेवप समा जातलें. लोकसभा उमेदवारी पासतच न्हय जाल्यार राज्य मंत्रिमंडळांत बदल करचे पयलीं तांचे कडेन भासाभास केल्यार, आमदार दिगंबर कामत हांचेर विश्वास दवल्ल्यार भाजपांतलो भितल्लो खवदळय निवळतलो. श्रीपादभाऊन आपलो व्हडलो पूत सिद्धेश हांकां राजकारणात शिस्तीन गांवगिऱ्या पावंड्या वेल्यान हाडलां. उत्तर गोंय जिल्लो पंचायत अध्यक्ष आशिल्ल्यान गोंयचे फुडले विधानसभा वेंचणुकेचेय तयारेक ते लागल्यात. वेंचून आयल्यार फकत आमदारच न्हय जाल्यार मंत्रीपद तर तांकां मेळटलेंच, पूण फुडारांत तांच्या रुपान भाजपाक आनीक एक तरनाटे मुख्यमंत्री मेळूं येतात. सिद्धेश शिकिल्ले, उद्येजकय आसात. श्रीपादभाऊंचे संस्कृतायेंतल्यान लोकां मेरेन पावप तांकां शक्य आसा.
काँग्रेसीचे आमदार भाजपांत आयिल्ल्यान भाजपाक बळगें मेळ्ळांच, मुख्यमंत्र्यांनी हालींच म्हळ्ळां ते प्रमाण, आमदार दिगंबर कामतय भाजपा बराबरच उरतले. दिगंबरबाबांक केंद्रीय मंत्रीपद मेळ्ळ्यार गोंयचे प्रश्न सुटावे जातलेच, निधी मेळोवपाची कळाशी तांचे कडेन आसा, राज्य, केंद्रांतले बरेच अधिकारीय तांचे वळखीचे आसतले. दिगंबरबाब पयलींचे मुख्यमंत्री, प्रधानमंत्र्यां कडेन तांची इश्टागत आसा, केंद्रीय मंत्रीय तांकां वळखतात. राज्यसभा वेंचणुकेंतल्यान तांकां केंद्रीय पावंड्यार भाजपान धाडपाक जाय. तांच्या अणभवाचो केंद्र सरकाराक लाव मेळटलोच, पूण गोंयकारांकय राज्यसभेर बरें नेतृत्व मेळटलें. दक्षीण गोंय लोकसभा वेंचणुकेचे उमेदवार म्हणून श्री. कामत हांकां संद मेळ्ळ्यार ते वेंचून येतले. तांच्या मडगांव मतदारसंघांतल्यान भाजपा कडेन एका परस चड पर्याय आसात.
विधानसभा वेंचणुके वेळार, उपरांत काँग्रेसीन केल्ल्या घाळपणान आमदार कामत हांचे सयत हेर आमदारय दुखाविल्ले. ते भाजपात वतना व्हडली आशा दवरून गेल्ले जाल्यार परतून परतून मुख्यमंत्र्यांच्या फाटल्यान लागून आपल्याक पदांय मेळयतले आशिल्ले. सरकारी म्हामंडळां तांकां सोंपेपणान मेळूं येतालीं, पूण म्हामंडळांनी कितें आसा कितें ना हें तांकां खबर आसा. आपूण भाजपात गेल्ल्यान मूळ कार्यकर्त्यां मदीं अस्वस्थताय येवंक येता हाची जाणवीकाय तांकां आसा. मंत्रिमंडळांत कोणाक आसपावन घेवप, कोणाक भायर उडोवप हो अधिकार मुख्यमंत्री डाॅ. प्रमोद सावंत हांचो. हायकमांड संस्कृती भाजपांतय आसा, पूण मुख्यमंत्र्यांक विचारले बगर बदलाक मान्यताय मेळत अशें दिसना.
येरादारीची कोयंडी, अपघात उणे जावपाक सरकारान लक्ष दिवचें. पंचायत, जिल्लो पंचायत पावंड्या वयले प्रश्नय वाडत आसात ते कित्याक? पर्यटनाची कूस बदलल्यार येणावळीक नवी दिका मेळटली, पर्यटनातलीं बेकायदेशीरपणा कमी जातलीं. स्वयंपूर्ण येवजणेतल्यान ‘हर घर स्वयंसिद्ध’ करपा पासत मुख्यमंत्र्यांच्या येत्नाक केंद्रा कडल्यान तेंको मेळपाक जाय. स्वयंपूर्ण येवजण देसाच्या हेर राज्यांनी आपणायतात जाल्यार गोंय सरकाराचो चडावत निधी दिवन भोवमानय जावपाक जाय. गोंय राज्योत्सवा निमतान आपले सकारात्मकतेची, शांतीकायेची व्हडवीकाय केंद्र सरकारा मुखार मांडपाक जाय.
सुहासिनी प्रभुगांवकार
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
