भांगरभूंय | प्रतिनिधी
उमेदवारांची पारखणी सुरू आसा, थोडाे वेळ जायः उत्पल पर्रीकार
पणजी: पणजी म्हापालिका वेंचणुके खातीर बाबूश मोंसेरात हांचें भाजप पॅनल आनी उत्पल पर्रीकार हांच्या पॅनला मदीं लडत जावपाचें निश्चीत जालां. भाजप पॅनलाचे उमेदवार जाहीर जातकच उत्पल पर्रीकार आपल्या पॅनलाचे उमेदवार जाहीर करतलो. हाका लागून उमेदवारांची नांवां बेगीन जाहीर जावपाची चिन्नां नात.
हांंव पत्रकार परिशद घेवन पयलीं पॅनलाचें नाव तशेंच धोरण जाहीर करतलों. उमेदवारांची पारखणी सुरू आसली तरी नांवां निश्चीत करपाक वेळ जाय पडटलो अशें उत्पल पर्रीकार हांंणी सांंगलें.
म्हापालिका वेंचणुकेची तारीख जाहीर जाले उपरांत राजकी पक्ष आनी उमेदवारांची धांवपळ सुरू जाल्या. उमेदवार थारावपा खातीर भाजपा कार्यालयांत सोमारा बसका जाली. मंत्री तशेंच आमदार बाबूश मोंसेरात, म्हापौर रोहीत मोंसेरात, प्रदेश भाजप अध्यक्ष दामू नायक हांचे सयत मुख्यमंत्री डॉ. प्रमोद सावंत बसकेक हाजीर आशिल्ले. चडश्या प्रभागातलीं संंभाव्य नांवां जाहीर जाल्ली आसली तरी ती निश्चीत जावंंक नात. काय नांवांं मदीं मतभेद आसात. हाका लागून शुक्रारा मेरेन तरी भाजप उमेदवारांचीं नांवां जाहीर जावचीं नात. आदले म्हापौर सुरेंद्र फुर्तादो, दत्तप्रसाद नायक तशेंच भाजपाच्या कांय कार्यकर्त्यां कडेन उत्पल पर्रीकार हांंची चर्चा सुरू आसा. उत्पल पर्रीकार हांच्या पॅनलाक तेंको दिवपा विशीं काँग्रेसीन मात अजून कसलीच ठोस भुमिका घेवंंक ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
