भांगरभूंय | प्रतिनिधी
काँग्रेसीन स्वताचो सुवार्थ सादलो: मुख्यमंत्री
केपें: भाजपाच्या डबल इंजीन सरकारान लोकां खातीर खूबश्यो येवजण्यो राबयल्यात. पूण काँग्रेस पक्षान स्वताचो सुवार्थ सादला अशें मुख्यमंत्री डॉ. प्रमोद सावंत हांणी म्हणलें.
ते आंबावली पंचायत वाठारांत आयोजीत केल्ल्या भाजपाच्या कोनसो बसकेंत उलयताले.
ह्यावेळार नागालॅण्ड राज्यसभेच्यो खासदार कांगनोन कोन्याक, भाजपा उमेदवार पल्लवी धेंपो, समाज कल्याण मंत्री सुभाष फळदेसाय, आदले उपमुख्यमंत्री चद्रकांत कवळेंकार, आदले आमदार क्लाफास डायस, जिल्हो पंचायत वांगडी संजना वेळीप, सरपंच देविदास देईकार, रानीया कार्दोजो, प्रिती गांवकार, सुदेश भिसे, मछिंद्र देसाय, संजय वेळीप आनी हेर मानेस्त हाजीर आशिल्ले.
गांधी घराब्याच्यो चार पिळग्यो प्रधानमंत्रीपद भुशोवन गरिबी हटावाचो नारो दितात हेंच मोटें हांसपा सारकें आसा. विकसीत भारत करपा खातीर मोदी हांकां परतून सत्तेर हाडपाची गरज आसा. हर घर नल, हर घर शौचालय, हर घर गॅस, नितळ धान्य 100 टक्के दिवपाचो यत्न केला. गरजेवंतांक धेंपो कुटुंबान सदांच मजत केल्या. बायलांक गृह उद्देगा वरवीं 400 ते 500 रुपया अर्थीक लाव जावचो हे खातीर गृह उद्देग चालीक लावपाचो यत्न आसा अशें डॉ. सावंत हांणी म्हणलें.
धेंपो कुटुंबान केन्नाच कसलोच भेदभाव केलो ना. सदांच गरजेवंतांक सहकार्य केलां. गोंयचे मुख्यमंत्री डॉ. प्रमोद सावंत हांच्या फुडारपणा खाला भाजप सरकार बरें काम करता अशें पल्लवी धेंपो हांणी म्हणलें.
भारतीय जनता पार्टी केन्नाच धर्माचें राजकारण करिना. भाजप पक्ष हो सगल्या धर्मांत एक संघ जावन काम करता. फाटले काँग्रेसीचे खासदार फाटल्या पांच वर्सांत एकदां तरी आंबावले गांवांत पाविल्ले. हांगाच्या पंच वांगड्यांनी लोकांक बऱ्यो सुविधा मेळच्यो म्हूण कचेऱ्यो सुरू केल्यात. पूण काँग्रेसीच्या खासदाराची कचेरी तरी आसा? मुख्यमंत्री हेर राज्याचो प्रचार करतना गोंयच्या गांवांगांवांनी वचून प्रचार करतात अशें सुभाष फळदेसाय हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.