भाजपान लोकसभे खातीर प्रसिद्ध केलो जाहीरनामो

भांगरभूंय | प्रतिनिधी

नवी दिल्ली, खबरां संस्थाः भारतीय जनता पक्षान आयज (14 एप्रिल) दिल्लींत लोकसभे खातीर जाहीरनामो प्रसिद्ध करुन ताका ‘संकल्प पत्र’ अशें नांव दिलां. हे खेपे भाजपान घोशणापत्रांत तरणाटे, शेतकार आनी बायलां कडेन लक्ष केंद्रीत केलां. ह्या वेळार प्रधानमंत्री नरेंद्र मोदी, गृहमंत्री अमित शाह, भाजपा अध्यक्ष जेपी नड्डा हाजीर आशिल्ले. ह्या घोशणापत्रांत व्हड घोशणा केल्यात. हातूंत मुद्रा येवजणेची रिणाची मर्यादा 20 लाख रुपया मेरेन वाडयल्या, देशांत नवी बुलेट ट्रेन येतली, गरीबांक आनीक तीन कोटी घरां, पीएम सूर्य घर येवजण, लखपती दीदी येवजण, बायलांचें सशक्तीकरण आदी. घोशणा केल्या.
शेतकारांचो सन्मान, ग्रीन एनर्जी हब, फार्मा हब, इलेक्ट्रॉनीक हब, बायलां शक्तीचें सशक्तीकरण, ल्हान वेपारी आनी बांदकाम मजुरांचें सशक्तीकरण, 3 कोटी लखपती दीदींची गॅरंटी, जागतीक उत्पादन केंद्र, सुरक्षीत, समृद्ध भारत, ऑलिंपिक यजमानपद, शिक्षण आदी म्हत्वाचे मुद्दे ह्या घोशणापत्रांत आसात.
प्रधानमंत्री आवास येवजणेंत दिव्यांगांक प्राधान्य दितले, जेनेरिक मेडिसीन्स सेंटर आनीक वाडयतले, उज्ज्वला येवजणेची अनुदान फुडल्या एका वर्सा खातीर वाडयतले, बायलां खेळगड्यांक खाशेली सुविधा दितले, कोटी लोकांच्या वीज बिलां शून्य करपाचेर भर दितले , शेतकी क्षेत्राचेर खासा लक्ष केंद्रीत करतले, देशांत अन्न प्रक्रिया केंद्र तयार करतले, बायलां सशक्तीकरणाक प्राधान्य दितले, 3 कोटी बायलांक लाखपती करतले, मुद्रा येवजण 10 लाखां वयल्यान 20 लाखां मेरेन वाडयतले, नवी बुलेट ट्रेन उत्तर जातली, वंदे भारताचे स्लीपर, चेयर, मेट्रो अशें तीन प्रकार करतले, फ्री रेशन येवजण फुडले तीन वर्सा चालू उरतली अश्यो व्हड घोशणा प्रधानमंत्री नरेंद्र मोदी हांणी केल्या.
गरीबांक परवडपी पोशक अन्न दितले, 70 वर्सां वयर आशिल्ल्या दरेका ज्येश्ठ नागरिकाक आयुष्मान येवजणेचो फायदो जातलो, 70 वर्सां वयर आशिल्ल्या दरेका ज्येश्ठ नागरिकाक 5 लाख रुपया मेरेन फुकट वैजकी सुविधा मेळटली, गरीबां खातीर आनीक ३ कोटी घरां बांदतले, आयुष्मान भारत येवजण तृतीयपंथी समाजाक दितले, घरां घरां मेरेन पायपलायनीतल्यान गॅस गॅस पावयतले, धा कोटी शेतकारांक पीएम किसान येवजणेचो फायदो चालूच उरतलो. देशभरांत दुग्ध आनी सहकारी संस्थांचो आंकडो वाडटलो अश्यो घोशणा भाजपान केल्या.