भांगरभूंय | प्रतिनिधी
युरीः लावडस्पिकर निर्बंधांत सदळसाण दिवपाची मागणी
भांगरभूंय । प्रतिनिधी
मडगांवः भाजपान फाटल्या 10 वर्सांत गोंयची वळखूच काबार केल्या. इव्हेंट मॅनेजमेंट आनी वेवसायीक कार्यावळींक उर्बा दिवपाच्या धोरणांत आमचें परंपरीक उत्सव, कला आनी संस्कृती काबार जाल्या. सरकारी अधिकारी आमच्या थळाव्या परंपरीक आयोजकांक त्रास दितात, मात रेव्ह पार्ट्यां खातीर विदेशी नागरिकांक पुराय स्वातंत्र्य मेळटा, असो आरोप विरोधी पक्ष फुडारी युरी आलेमांव हांणी केला.
गोंयांत परंपरीक सण आनी उत्सवांत आयोजीत करतात त्या सगळ्या परंपरीक, सांस्कृतीक आनी समाजीक कार्यावळींनी लावडस्पिकर वापरपाचेर घाल्ले बंदींतल्यान बेगोबेग सदळसाण दिवची अशी मुख्यमंत्र्यां कडेन मागणी करता, अशें आलेमांव हांणी म्हणलां.
गोंयांत विदेशी लोकांचे कार्यावळींक रॅड कार्पेटीन येवकार दितात, मात परंपरीक नातलां आनी नव्या वर्साच्या नाचाचे कार्यावळीक सरकाराचे बंदीक फुडो करचो पडटा. सरकाराक बरी बुद्द येतली आनी थळाव्या कार्यावळींक जावपी त्रास बंद जातलो अशी आपल्याक आस्त आसा, अशें आलेमांव हांणी म्हणलां. सरकारान बेगोबेग लावडस्पिकर वापरपाचेर निर्बंध घातल्यात ताचे सदळसाणी खातीर अधिसुचोवणी काडची. जाका लागून थळाव्या आयोजकांक तयारी करपा खातीर फावोसो वेळ मेळटलो आनी तांच्या बरें मागप्यांक तशेंच हे कार्यावळींनी दर वर्सां वाटो घेवप्यांक आगावू म्हायती दिवपाक सोंपे जातलें, अशें आलेमांव हांणी म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
