भांगरभूंय | प्रतिनिधी
पणजी : भाजपाच्या आदल्या आनी आतांच्या आमदारांनी एकमेकांचेर ड्रग्ज विक्रीचे आरोप केल्यात. हे विशीं मुख्यमंत्र्यांनी कारवाय करप गरजेचें. अशें जालें ना जाल्यार आमी पुलिशें कागाळ करतले अशें खासदार विरीयातो फर्नांडीस हांणी सांगलें. बिरेस्तारा पणजे जाल्ले पत्रकार परिशदेंत ते उलयताले. ह्या वेळार अमरनाथ पणजीकर, ऍड. जितेंद्र गांवकार, वीरेंद्र शिरोडकार, सावियो डिसिल्वा आनी हेर पदाधिकारी हजर आशिल्ले.
ह्या वेळार फर्नांडीस हांणी, गोंयां ड्रग्स बरेंच पातळिल्ल्याचें कॉंग्रेसीन जायते फावट सांगलां. कांय दिसां पयलीं आदले उपमुख्यमंत्री बाबु आजगांवकार आनी पेडणेंचे आतांचे आमदार प्रवीण आर्लेकार हांणी एकमेकांचेर ड्रग्ज विक्रीचे आरोप केल्ले. हाका लागून तांणी गोंय देशाची ड्रग्ज राजधानी आशिल्ल्याचें सिद्ध केलां. तशेंच भाजप फुडारी ड्रग्ज वेव्हारांत आसात हेंय स्पश्ट जालां. ह्या दोगां सयत ह्या प्रकरणांत आनीक कोणाचो आसपाव आसा काय? हाचीय पुलीस चवकशी जावपाक जाय.
पेडणेंचे लोक हे स्वाभिमानी पेडणेंकार म्हणून वळखतात. मात थंयच्या ह्या दोनूय फुडार्यांच्या वक्तव्यान पेडणेकरांच्या स्वाभिमानाक धक्को बसला. आजगांवकार हांणी पेडणेंची कायदां आनी सुवेवस्थेचेर प्रस्न हजर केल्यात. तांणी सरकाराक उक्तडार हाडलां. ह्या प्रकरणांत भाजप प्रदेशाध्यक्ष दामू नायक हांणी फुडार्यांनी आपले वागणुकेन पक्षाची बदनामी जावची ना हाची जतनाय घेवपाक सांगलें. तांकां गोंयच्या ड्रग्साच्या प्रस्ना परस पक्षाची प्रतिमा व्हडली दिसता, अशें फर्नांडीस हांणी सांगलें.
अमरनाथ पणजीकर हांणी, फाटल्या कांय वर्सांनी राज्यांत ड्रग्ज बरेंच वाडलां. व्हड शारां सयत आतां ल्हान गांवांनीय ड्रग्स सहज उपलब्ध जाता. फाटल्या चार वर्सांनी गोंयांत ६०० किलां परस चड घुंवळे वखदां जप्त केल्यांत. ह्या प्रकरणांत अटक जाल्ल्या ६९१ जणां मदले १९५ गोंयकार आशिल्ले. ही हुस्क्याची गजाल जरी आसली तरी भाजपाक फुडले वेंचणुकेचीच काळजी आसा.
मनोज परब भाजपाचे दलाल : विरियातो
कॉंग्रेस पक्षाचे फुडारी पिर्णाच्यो समस्या जाणून घेवपा खातीर गेल्ले. आमी जेन्ना भाजपाक उक्तडार हाडलां तेन्ना मनोज परब हांकां मिरची लागता. ते दरेक फावटीं आपूण भाजपाचो दलाल आशिल्ल्याचें सिद्ध करतात अशी खर टिका विरीयातो फर्नांडीस हांणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
