भांगरभूंय | प्रतिनिधी
प्रदेश भाजपाच्या संघटनात्मक कामाचो घेतले आढावो
पणजी : राज्य मंत्रिमंडळांतल्या फेरबदलाच्या चर्चांक नेट आयिल्लो आसतनाच भाजपाचे राष्ट्रीय सरचिटणीस बी. एल. संतोष फुडल्या सप्तकांत गोंयांत येवपाचे आसा. संतोष हे गोंयांत येवन प्रदेश भाजपाच्या संघटनात्मक कामाचो आढावो घेतले अशी म्हायती भाजप प्रदेशाध्यक्ष दामू नायक हांणी ‘भांगरभूंय’ कडेन उलयतना दिली.
बी. एल. संतोष फुडल्या सप्तकांत गोंयांत येतले. फुडल्या काळांत प्रदेश भाजपाच्या विवीध समित्यांची फेररचना जातली. हे विशींची म्हायती संतोष आमचे कडेन बसका घेवन जाणून घेतले. तशेंच पक्षाक गोंयांत आनीक घटमट करपा विशीं ते आमचे कडेन चर्चा करतले, अशें दामू नायक हांणी म्हणलें.
राज्य मंत्रिमंडळ फेरबदला विशीं केंद्रांत य कसलीच चर्चा सुरू जावंक ना. ताका लागून बी. एल. संतोष ते विशीं आमचे वांगडा चर्चा करतले काय ना, हें आजूनय स्पश्ट जावंक ना, अशें तांणी म्हणलें.
मजगतीं, भाजपाचे राष्ट्रीय सरचिटणीस आशिल्ले बी. एल. संतोष हांची पक्षाचे संघटन आनी ज्या राज्यांत भाजपाचें सरकार आसा, त्या सरकारांत बदल घडोवपांत म्हत्वाची भुमिका आसता. कॉंग्रेसीचे आठ आमदार भाजपांत आयिल्ल्याक गोंयांत मंत्रिमंडळ फेरबदलाच्यो चर्चा परत परत जायत आसात. अशें स्थितींत लोकसभा वेंचणुके पयलीं एकदांच मंत्रिमंडळांत फेरबदल जावन कॉंग्रेसींतल्यान आयिल्लो आलेक्स सिक्वेरा हांकां मंत्रिपदाची लॉटरी लागली. उपरांतच्या काळांत कॉंग्रेसींतल्यान आयिल्ल्या आनीक तिगांक मंत्रिपद मेळपाची शक्यताय उक्तायल्या. मुख्यमंत्री डॉ. प्रमोद सावंत आनी राज्यसभा खासदार तशेंच आदले प्रदेशाध्यक्ष सदानंद शेट तानावडे हांणीय सुरवातेक मंत्रिमंडळ फेरबदलाक फाटबळ दिल्लें. मात, उपरांतच्या काळांत तांणीय राज्य मंत्रिमंडळांत तूर्त बदल जावचे ना हें स्पश्ट केल्लें. अशे स्थितींत बी. एल. संतोष फुडल्या सप्तकांत गोंयांत आयिल्ल्यान मंत्रिमंडळ फेरबदलाच्या चर्चांक परत नेट येतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
