भांगरभूंय | प्रतिनिधी
मंत्रीपद, म्हामंडळ काडून भाजप आमदाराक दिवपाची मागणी
भांगरभूंय । प्रतिनिधी
पणजी : गोंयांत भाजपा कडेन पुराय भोवमत आसा. फुडलीं दोन वर्सां थीर सरकार आसतलें, असो ठाम विस्वास आशिल्ल्यान भाजपाचे कोर समितीनक मगो कडली युती नाका. मगोक मेळिल्लें एक मंत्रीपद आनी एक म्हामंडळ भाजपाच्याच आमदारांक दिलें जाल्यार ताचो पक्षाक अदीक फायदो जातलो. कोयर समितींतल्या कांय पदाधिकाऱ्यांनी मगोक आतांच सत्ते भायर काडपाची मागणी मुख्यमंत्री डॉ. प्रमोद सावंत हांचे कडेन केल्ल्याची म्हायती सुत्रांनी ‘भांगरभूंय’ कडेन उलयतना दिली.
मुख्यमंत्री डॉ. सावंत हांणी कांय दिसां आदीं मांद्रेंच्या कार्यकर्त्यांच्या मेळाव्यांत उलयतना फुडले विधानसभा वेंचणुकेंत मांद्रें मतदारसंघांत भाजप उमेदवार दितले, अशी घोशणा केल्ली. मांद्रें सध्या मगो कडेन आसतना आनी मगो सत्तेंत आसतना लेगीत मुख्यमंत्र्यान अशे तरेचो ‘बॉम्ब’ घातिल्ल्यान मगो फुडाऱ्यां मदीं खवदळ पडलो. ते उपरांत कांय दिसांनी मगो ज्या प्रियोळ मतदारसंघाचेर दावो करता, थंय वचून मुख्यमंत्र्यान प्रियोळांत लेगीत भाजपाचोच उमेदवार आसतलो, अशें जाहीर केलें. जांकां हो निर्णय मान्य ना तांणी आतांच भायर सरचे, असोय सल्लो तांणी दिल्ल्यान मगोच्या पंगडांत परतून खवदळ पडलो. ते उपरांत मंत्री तशेंच मगोचे ज्येश्ठ फुडारी सुदिन ढवळीकार आनी अध्यक्ष दीपक ढवळीकार हांणी तत्काळ दिल्ली वचून भाजपाचे राष्ट्रीय सरचिटणीस बी. एल. संतोष हांची भेट घेतली.
भाजप – मगो मदल्या कांसकिसावांचे फाटभुंयेर दोन दिसां आदीं जाल्ले कोर समितीचे बसकेंत लेगीत हो विशय चर्चेक आयिल्लो. तातूंत कांय पदाधिकाऱ्यांनी सध्याचे स्थितींत सरकाराक मगोची गरज नाशिल्ल्याचें स्पश्ट करून, मगोक आतांच सत्ते भायर काडपाची मागणी केली. मगोच्या दोन आमदारां मदले सुदिन ढवळीकार मंत्री आसात. जाल्यार जीत आरोलकार हांचे कडेन गृहनिर्माण म्हामंडळ आसा. मगोक सत्ते भायर काडून हें मंत्रीपद आनी म्हामंडळ भाजपाच्या हेर आमदारांक दिल्यार फुडारांत पक्षाक ताचो फायदो मेळपाक शकता, हाचो विचार करून मुख्यमंत्र्यांनी तत्काळ हे विशींचो निर्णय घेवचो, अशेंय ह्या पदाधिकाऱ्यांनी मुख्यमंत्र्यांक सुचयलां. मजगतीं, भाजपान मगोच्या दोनूय आमदारांक न्याय दिला. आलेक्स रेजिनाल्ड, डॉ. चंद्रकांत शेट्ये आनी आंतोन वाझ ह्या तिनूय अपक्ष आमदारांक म्हामंडळां दिल्यांत. पूण भाजप आमदार आशिल्ले दिगंबर कामत, मायकल लोबो, संकल्प आमोणकार हांकां कांयच दिवंक ना. हो तांचेर अन्याय आसा. हाचोय सरकारान गंभीरपणान विचार करचो, अशी स्पश्ट भुमिका लेगीत ह्या पदाधिकाऱ्यांनी मुख्यमंत्री आनी प्रदेशाध्यक्ष दामू नायक हांचे मुखार मांडल्या, अशें सुत्रांनी सांगलें.
भाजपांत लेगीत ‘घरभेदी’
भाजपांतलेच कांय जाण मगोच्या फुडाऱ्यांक फूस लायतात. तातूंत पक्षांत दोन गट पडटात, अशें प्रदेशाध्यक्ष दामू नायक हांच्या लक्षांत आयलां. अश्या फुडाऱ्यांचेर भाजपाच्या वरिश्ठांनी लक्ष केंद्रीत केलां. तांचेर खंयच्याय खिणाक कारवाय जावपाक शकता, अशेंय सुत्रांनी म्हणलां.
फुडली विधानसभा वेंचणूक युतिनूच लडटले : दीपक ढवळीकार
पणजी : भाजप – मगो युतींत सगळें बरें चल्लां. 2027 ची विधानसभा वेंचणूक आमी युतीनूच लडटले. दोनूय पक्षांचे सर्व्हे उपरांत सुवातांचें वांटप जातलें, अशें मगोचे अध्यक्ष दीपक ढवळीकार हांणी बुधवारा पत्रकारां कडेन उलयतना स्पश्ट केलें.
मुख्यमंत्री डॉ. प्रमोद सावंत हांणी प्रियोळांत केल्लें विधान आनी ते उपरांत मंत्री गोविंद गावडे हांणी सुरू केल्ले टिके उपरांत ढवळीकार भावांनी दिल्ली वचून भाजपचे राष्ट्रीय सरचिटणीस बी. एल. संतोष हांची भेट घेतली आनी तांचे कडेन युती संबंदांत चर्चा केली. भाजप – मगो युती फुडलीं दोन वर्सां कायम उरतली, अशी हमी केंद्रीय नेतृत्वान आमकां दिल्या. ते प्रमाण आमी काम करतले. भाजप आनी मगो हे दोनूय पक्ष समिविचारी आसात. येता ते विधानसभा वेंचणुकेंत हे दानूय पक्ष युती करूनूच लडटले, अशें दीपक ढवळीकार हांणी सांगलें.
विधानसभा वेंचणुकेंत सुवातांचें वांटप दोनूय पक्षां कडल्यान जावपी सर्व्हे उपरांत जातलें. भाजप व्हड पक्ष आसा, तांचो सर्व्हे लेगीत बिनचूक आसता. ते खातीर भाजपाचो सर्व्हे आयले उपरांत खंयचो मतदारसंघ खंयच्या पक्षाक वतलो, हें निश्चीत जातलें, अशें ढवळीकार हांणी सांगलें.
मजगतीं, मुख्यमंत्री डॉ. सावंत हांची कोणेतरी दिशाभूल केल्या आसुंये. तेच खातीर तांणी युती संबंदांत विधानां केल्यात जावंये, अशेंय ढवळीकार हांणी सांगलें.
म्हजी दिशाभूल कोण करतलो?: मुख्यमंत्री
मगोचे अध्यक्ष दीपक ढवळीकार हांणी ‘दिशाभूल’ संबंदांत केल्ल्या विधाना विशीं मुख्यमंत्री डॉ. प्रमोद सावंत हांकां विचारलें, तेन्ना तांणी, ‘म्हजी दिशाभूल कोण करतलो?’ इतलेंच सांगून ह्या विशयाचेर उलोवप टाळ्ळें. राजकी मळार परतून दुबावाचें वातावरण पातळ्ळां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
