भांगरभूंय | प्रतिनिधी
गिरीश चोडणकारः अधिसुचोवणी फाटीं घेवपाची मागणी
भांगरभूंय । प्रतिनिधी
मडगांवः भाजपाच्या फुडारपणा खालच्या गोंय सरकारान गोंयांतल्या अल्पसंख्यांकांच्या धर्मीक सणां- परबांनी सदांच आडखळी निर्माण केल्यात, असो दावो आदले काँग्रेस प्रदेशाध्यक्ष गिरीश चोडणकार हांणी केला.
नातलांच्या वेळार सकाळी 6 वरां मेरेन दिल्ली आदली अधिसुचोवणी फाटीं घेवन रातच्या 12 वरां मेरेन लावडस्पिकर लावपाचे परवानगे संबंदांत जारी केल्ले नवे अधिसुचोवणेचेर चोडणकार प्रतिक्रिया दिताले.
भाजपा सरकारान अशे तरेच्यो समस्या निर्माण करपाची ही पयलीच खेप न्हय. हाचे आदींय गूड फ्रायडे आनी सेंट फ्रांसीस झेवियर फेस्ताची भौशीक सुटी फाटीं घेतिल्ल्याचो चोडणकार हांणी उगडास करून दिलो. नातलांच्या काळांत जावपी धर्मीक सणांची उच्च न्यायालयाक म्हायती आसा आनी सकाळीं 6 वरां मेरेन लावडस्पिकर लावपाक दिल्ले परवानगेचे आदले अधिसुचोवणेचेर कसलीच हरकत घेवंक ना, जी उच्च न्यायालयाच्या आदेशा उपरांत लागू जाता. राज्य सरकाराक आदली अधिसुचोवणी फाटीं कित्याक घेवची पडली, तें आपल्याक कळना. नागपूरान राज्य सरकाराक अशी त्रासदिणी अधिसुचोवणी जारी करपाचे निर्देश दिल्ले काय, अशें चोडणकार हांणी म्हणलां. सरकारान सध्याची अधिसुचोवणी बेगोबेग फाटीं घेवची आनी धर्मनिरपेक्ष गोंय राज्यांत धर्मीक आनी परंपरीक उत्सवांक परवानगी दिवची, अशी मागणी चोडणकार हांणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
