भाजपाची लोकसभा वेंचणुकेची तयारी

भांगरभूंय | प्रतिनिधी

एकूणच ह्या तिनूय राज्यांतले नवे फुडारपण लोकसभे खातीर भाजपाक व्हड आघाडी दितले काय ना हें लोकसभा वेंचणुके उपरांतूच दिसून येतलें.

हालींच पांच राज्यांनी विधानसभेच्यो वेंचणुको जाल्यो. तातूंत तीन राज्यांत भाजपाक भोवमत मेळ्ळें. ह्या तिनूय राज्यांनी
 भाजपान मुख्यमंत्री वेंचल्यात. विशेश म्हणल्यार ह्या तिनूय राज्यांनी दोन उपमुख्यमंत्री दरेक राज्यांत आसात. मध्य प्रदेशांत फाटलीं सुमार 18 वर्सां मुख्यमंत्री म्हूण काम करपी आनी बायलां खातीर खूबशो येवजण्यो चालीक लावन विधानसभेची वेंचणूक व्हड फरकान जिखपी शिवराज सिंह चौहान हांकां मुख्यमंत्रीपदाची संद दिनासतना ती डॉ. मोहन यादव ह्या उच्च शिक्षीत मनशा कडेन दिल्या.
डॉ. मोहन यादव हे उजैन दक्षीणेंतल्यान वेंचून आयल्यात. ते एक हिंदुत्ववादी फुडारी म्हूण वळखतात. तांणी खूबशीं आंदोलनां केल्यांत. 2020 वर्सा शिवराज सिंह चौहान हांच्या मंत्रीमंडळांत ते शिक्षण मंत्री आशिल्ले. बीएससी, एलएलबी, एमए, एमबीए, पीएचडी अश्यो पदव्यो तांणी मेळयल्यांत. तांणी अभविपच्या माध्यमांतल्यान राजकारणांत प्रवेश केलो. पयलीं सावनूच मुख्यमंत्री म्हूण हे वेंचणुकेंत तिनूय राज्यांनी कोणाचेंच नांव जाहीर करूंक नाशिल्लें. त्याच वेळार शिवराज सिंह चौहान हांकां लेगीत तिकेट बेगीन जाहीर जावंक नाशिल्ली.
अशीच परिस्थिती राजस्थानांतूय आशिल्ली. फाटलीं कितलींशींच वर्सां राजकारणांत आशिल्ली आनी भाजपाची मुख्यमंत्रीपदाची दावेदार आशिल्ली वसुंधरा राजे हांकां लेगीत मुख्यमंत्री म्हूण वेंचणुकेंत जाहीर करूंक नाशिल्लें. पक्षांतले खूबशे आमदार तांचे फाटल्यान आसात.
छत्तीसगडांत भाजपान आदले मुख्यमंत्री रमण सिंह हांचे बदला नवो चेरो मुख्यमंत्रीपदा खातीर दिलो. निकालाच्या सात दिसा उपरांत भाजपान विष्णुदेव साय हांची मुख्यमंत्री म्हूण घोशणा केली. छत्तीसगडांत भाजपान दोन उपमुख्यमंत्री दिल्यात. अरूण साव आनी विजय शर्मा हे उपमुख्यमंत्री आसतले. जाल्यार आदले मुख्यमंत्री रमण सिंह विधानसभेचे अध्यक्ष म्हूण काम पळयतले.
ह्या तिनूय राज्यांत एक पिळगीच बदल्ल्या. तिनूय राज्यांतले मुख्यमंत्री 60 वर्सां पिराये परस उणें आसात. छत्तीसगडांत रमण सिंह, मध्य प्रदेशांत शिवराज सिंह चौहान, नरेंद्र सिंह तोमर, प्रल्हाद सिंह पटेल, कैलास विजयवर्गीय, राजस्थानांत वसुंधरा राजे, केंद्रीय मंत्री गजेंद्र सिंह शेखावत, अर्जुनलाल मेघवाल हांचे मदल्या कोणाकूच मुख्यमंत्रीपद दिनासतना ते नव्या चेऱ्यांक दिल्यात. भाजपान सद्याच्या फुडारपणाक एके तरेन शिटकावणीच दिल्या.
हे वेंचणुकेंत छत्तीसगडांत विष्णुदेव साय हे आदिवासी समाजांतले आसात. थंय 29 विधानसभा मतदारसंघांनी आदिवासी लोकांचें वर्चस्व आसा. दोन उपमुख्यमंत्र्यां मदले अरूण साव हे ओबीसी आनी विजय शर्मा हे ब्राह्मण आसात. मध्य प्रदेशांत ओबीसींची संख्या सुमार 60 टक्के आसा. थंय डॉ. मोहन यादव हे ओबीसी मुख्यमंत्री आसात. जाल्यार उपमुख्यमंत्री जगदीश देवडा हे अनुसुचीत जातीचे आसात. दुसरे उपमुख्यमंत्री राजेंद्र शुक्ला हे ब्राह्मण समाजांतले आसात. राज्यस्थानांत 13 टक्के ब्राह्मण आसा. भजनलाल शर्मा हे ब्राम्हण आसून उपमुख्यमंत्री दिया कुमारी राजपूत आनी प्रेमचंद बैरवा हे एससींतल्यान आयल्यात. एकूणच भाजपान ह्या तिनूय राज्यांनी जातीचें समिकरण राखून निवड केल्या.
हाचे पयलीं गुजरातांत फाटले वेंचणुकेंत नव्या चेऱ्याक संद दिल्ली. ताचोच धडो ह्या तिनूय राज्यांनी भाजपान गिरयला. येता त्या कांय म्हयन्यांनी लोकसभेची वेंचणूक जावपाची आसा. ते नदरेन भाजपान हें पावल उबारलां. ह्या तिनूय राज्यांचे मुख्यमंत्री, उपमुख्यमंत्री हांची निवड करतना भाजपाचे राष्ट्रीय अध्यक्ष जेपी नड्डा, गृह मंत्री अमीत शाह आनी प्रधानमंत्री नरेंद्र मोदी हांचें म्हत्वाचें योगदान आसा. पोरण्या फुडारपणाक कायम दवरून नव्या फुडारपणाक सत्तेंत हाडप ही लोकसभेच्या वेंचणुकेची तयारी अशें म्हणत जाल्यार चुकीचें थारचें ना.
विधानसभा वेंचणुकां वेळार निरशेणी नाका म्हूण पोरण्या फुडाऱ्यांक तिकेटी दिल्यो, ताचो फायदो ह्या तिनूय वेंचणुकांनी भाजपाक जालो. हे वेंचणुके उपरांत छत्तीसगड आनी मध्य प्रदेशांत रमण सिंह आनी शिवराज सिंह चौहान हे व्हडलेशे निरशेल्ले दिसले नात. पूण राजस्थानांत मात वसुंधरा राजे ह्यो निरशेल्ल्याचें दिसून आयलें. एकूणच ह्या तिनूय राज्यांतले नवे फुडारपण लोकसभे खातीर भाजपाक व्हड आघाडी दितले काय ना हें लोकसभा वेंचणुके उपरांतूच दिसून येतलें.

शांताराम वाघ
9623452553