भांगरभूंय | प्रतिनिधी
पणजी ः भाजपांत प्रवेश करुन २०२७ ची विधानसभा वेंचणूक भाजपा उमेदवारीचेर लढपाक तयार आसा, अशें दिवचलचे अपक्ष आमदार डॉ. चंद्रकांत शेट्ये हांणी स्पश्ट केलें. भाजपाचे सरचिटणीस बी. एल. संतोष हांची भेट घेवन तांणी वेगवेगळ्या विशयांचेर चर्चा केली.
संघटनात्मक कार्याचो नियाळ घेवपा खातीर भाजपाचे राष्ट्रीय सरचिटणीस बी. एल. संतोष हांणी मंगळारा बसका घेतल्यो. पदाधिकाऱ्यां कडेन बसका घेवपा वांगडाच पक्षाचे आमदार आनी मंत्र्यां कडेनय तांणी चर्चा केली. दिवचलचे आमदार डॉ. चंद्रकांत शेट्ये हांणीय तांची भेट घेतली.
अपक्ष आमदार आशिल्ल्यान तांची भेट एक चर्चेचो विशय थारलो. भाजपा प्रवेश करतले कांय? अशें विचारलें उपरांत तांणी सकारात्मक (होकारार्थी) जाप दिली. भाजपांत प्रवेश करुन येवपी विधानसभा वेंचणूक भाजपा उमेदवारीचेर लढपाक आपली तयारी आसा. हे बाबतींत भाजपा फुडाऱ्यांनी निर्णय घेवचो, अशेंय तांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
