भांगरभूंय | प्रतिनिधी
पणजी : राजकी पक्षा कडल्यान उमेदवारांची घोशणा सुरू आसतनाच आतां अर्ज भरपाक लेगीत सुरवात जाल्या. बिरेस्तारा दत्त जयंती दिसा भारतीय जनता पक्षाच्या ७ जाल्यार कॉंग्रेसीच्या १ उमेदवारान अर्ज भरलो. तशेंच ३ अपक्षांनी लेगीत उमेदवारी सादर केली. हाचे पयलीं एका अपक्षान उमेदवारी अर्ज भरला. हाका लागून आयच्या ११ अर्जां सयत जिल्लो पंचायती खातीर वट्ट १२ अर्ज दाखल जाल्यात. राज्य वेंचणूक आयोगा कडल्यान ही म्हायती मेळ्ळी.
भारतीय जनता पक्षाच्या फ्रँझीलीया रॉड्रिग्ज (कळंगुट), अमीत अस्नोडकार (सुकुर), रेषमा संदीप बांदोडकार आनी सुश्मिता पेडणेंकार (रेईश मागूश), संदीप साळगांवकार (पेन्ह द फ्रान्स), मोहन गांवकार (सावर्डे) आनी रूपेश देसाय (धारबांदोडा) हांणी उमेदवारी अर्ज सादर केल्यात. रेईश मागूश मतदारसंघांत भाजपाच्या दोगां जाणांनी उमेदवारी अर्ज भरल्यात. एक उमेदवार अर्ज फाटीं घेतलो, अशी आस्त आसा.
उजगांव -गांजे मतदारसंघांतली कॉंग्रेस उमेदवार मनीशा शेणवी उजगांवकार हांणी लेगीत उमेदवारी अर्ज सादर केलो. हे भायर दिक्षा पागी, विपीन गांवकार (पैंगीण), सुनील जल्मी (बेतकी – खांडोळा) ह्या अपक्षांनी उमेदवारी अर्ज सादर केल्यात.
हाचे पयलीं वेळ्ळी मतदारसंघांत जॉन पेद्रो पेरेरा ह्या अपक्षान उमेदवारी अर्ज सादर केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
