भांगरभूंय | प्रतिनिधी
आयज, नोव्हेंबराचे 21 वेर, 2024 तें जानेवारीचे 5 वेर, 2025 मेरेन आमच्या गोंयांत, ‘गोंयचो सायब’ म्हण पाचारलल्या भाग्यवंत फ्रांन्सीस शावियेराचे पवित्र कुडीचो (रेलिकांचो) दर्शन (एक्सपोजिसांव) सुवाळो जावंचो आसा. हो दर्शन सुवाळो हालींच्या वर्सांनी, 10 वर्सांनी गोंय- दामांवचो म्हाधर्मप्रांत घडोवन हाडटा. सरकारूय भौशीक सवलती दिवन आपलो सहकार दिता. ह्या वर्साक जावपी भाग्यवंत फ्रांन्सीस शावियेराचे पवित्र कुडीच्या दर्शन सुवाळ्याचें उक्तावणेचें मीस, पोरण्या गोंयां सकाळीं 9.30 वरांचेर जातलें. दिल्ली म्हाधर्मप्रांताचे आर्सेबिस्प, गोंयकार पूत आर्सेबिस्प अनील कुटो हे येजमान पाद्री कशे हाजीर आसतले. आयज (21नोव्हेंबर) सकाळीं दबाजीक मीस जावन, भाग्यवंत फ्रांन्सीस शावियेराची पवित्र कुड पुरसांव काडून बऱ्या जेजुच्या बाजिलिकेंतल्यान सें काथेद्रालांत व्हरतले.
आमचे आर्सेबिस्प फिलिपे नेरी कार्डीनल फेर्रांव, हे शेवटाच्या दिसा मिसाची येजमानकी चलयतले. उपरांत भाग्यवंत फ्रांन्सीस शावियेराची पवित्र कूड दबाजीक पुरसांव काडून परतून बऱ्या जेजुचे बाजिलिकेंत हाडटले. एक्सपोजिसांवांच्या दिसांनी भाग्यवंत फ्रांन्सीस शावियेराचे परबेच्या मिसाक फिलिपिनचे आर्सेबिस्प, कार्डीनल लुयस आंतोनियो तागले हे मुखेल पाद्री कशे सांगाती दबाजीक मीस भेटयतले.
पवित्र सभेंत (Church) पवित्र कुडी (रेलिको)
पवित्र सभेंत आदीं थावन, सांतांभक्तांच्या पवित्र कुडींक (रेलिकांक) मान दितात. सुरविल्ले पवित्र सभेंत, रग्तसाक्षांच्या (martyrs) आनी सांतांभक्तांच्या पवित्र कुडींक (रेलिकांक) मान दितालीं. क्रिस्ता खातीर आपलो जीव दिल्ल्या रग्तसाक्षांच्यो कुडी पवित्र म्हण मानून घेतालीं. देवाची वरती कुर्पा तांचे कडल्यान फावो जाता, हेय नदरेन तीं पवित्र कुडीं कडेन पळेतालीं. भाग्यवंत पोलिकार्पाच्या मरणा उपरांत, सुरविल्ल्या क्रिस्तांवांनी, ताचीं हाडां, “भांगारा परस मोलादीक” म्हण मानून घेवन, तीं एकठांय केलीं. ताच्या उगडासाक वर्साक एक फावट तीं ताच्या फोंडाशीं वचून, ताची विनंती मागतालीं. हे वरवीं, सुरविल्लीं क्रिस्तांवां, पवित्र कुडींचें (रेलिकांचें) आत्मीक म्हत्व जाणां आसलीं.
भाग्यवंत शावियेराच्या रेलिकांचें दर्शन सुवाळे
जेजुयत पाद्री मोरेनो दे सौजा, आपल्या “गोंयचो सायब : सांत फ्रांन्सीस शावियेर’ ह्या पुस्तकांत खासगी आनी भौशीक दर्शनाची खबर दिता. भौशीक दर्शन आयोजीत करचे आदीं, तांच्या पवित्र कुडीचीं कांय खासगी दर्शना जालीं. भाग्यवंत फ्रांन्सीस शावियेराक 1622 वर्सा, मार्साचे 12 वेर, आल्ताराचो मान मेळ्ळो, म्हळ्यार तांका सांत वा भाग्यवंत म्हण परगटललो. त्या उपरांत दर वर्सा परबे दिसा, ताचे कुडीचे दर्शन घेवप जातालें. पूण, 1553 वर्सा, ताच्या मरणाच्या दोन म्हयने आनी वीस दिसांनी, जेदनां ताची कूड सांचिया जुंव्यार थावन मालाका पावली तेदनां, रात जाल्ली. दर्या कुशीकूच एका घरांत ताची कूड दवरली. विगारान काश्यांव उगडलो, कूड जिवी मेळ्ळी. 1553 वर्सा आगस्ताचे 15 वेर, फा. जुवान दे बेइरा एस. जे. हाणीं मोलुकाचे वाटेर फ्रांन्सीस शावियेराची कूड उगडूंक लायली. तेदनां, कांय लोकांनी ती कूड पळेली. परतून त्याच वर्सा कोचिनांत ताची कूड पावतच काश्यांव उगडलो, अशें म्हणटात आनी कांय लोकांनी ताचें दर्शन घेतलें. ताची कूड भटकळ पावली तेदनां, गोंयचे वाटेर आसतना हाजीर आसलल्यांनी ती कूड देखली आनी तिका नमान केलें.
भाग्यवंत फ्रांन्सीस शावेरियाची कूड गोंयांत
1554 वर्सां, मार्साचे 15 वेर, तारूं मांडवी न्हंयेंत भितर सरलें. रात जाल्ली. ते राती लोकांनी ती कूड पळेली म्हूण इतिहासाचीं पानां सांगतात. मार्साचे 16 वेर, 1554 ह्या दिसा, म्हळ्यारच त्या वर्साच्या प्राचीत काळांतल्या पांचव्या सातळ्याच्या सुक्राराक भाग्यवंत फ्रांन्सीस शावियेराची कूड सांत पावलुचे कॉलेजींत व्हेली आनी तीन दीस, हजारांनी लोक तिचो उमांव घेवंक येतालो. ही दाखवण/ हें दर्शन तीन दीस चालू उरलें. पवित्र सातळ्याची सेवाधर्मीक रीत सुरू जावंची आसली देखून, ती कूड बंद केली. सांत पावलुचे कॉलेजींत ती कूड आसतना, अशीं खासगी दर्शना जावंक नांत.
1613 वर्सा, ती कूड बऱ्या जेजुच्या घरांत पावली. तिसरे माळियेर दवरलली (आतां ती माळी ना) आनी 1622 वर्सा ती कूड इगर्जेंत हाडली, कित्याक त्या वर्सा फ्रांन्सीस शावियेराक सांत वा भाग्यवंत म्हूण परगटललो. उपरांत कांय वेग-वेगळ्या कारणांत लागून, ती कूड उगडूंक पडली.
खासगी दर्शनां बंद
1755 वर्सा एप्रिलाचे 2 तारखेर, पुर्तुगालच्या तेदनाच्या राजान, एक चीट बरोवन भाग्यवंत फ्रान्सीस शावियेराचे पवित्र कुडीचीं खासगी दर्शनां बंद करुंक लायलीं. कूड पळेवंक येतात ते कुडीचे भाग (रेलिको) बी कात्रून व्हरत म्हूण भिरांत आसली. 1759 वर्सा पुर्तुगालान, तांचे बंदखणींत जेजुयतांक वळवळावन मारले तेदनां, जेजुयतांचें घर आनी बऱ्या जेजुची इगर्ज गोंयच्या आर्सेबिस्पाच्या ताब्यांत पडली. जेजुयत गोंयांतले आनी भारतांतले भायर सरतच आनी फ्रांन्सीस शावियेराची कूड बावून सुकून वतच, दबाजीक आनी भौशीक रितीन दर्शना वा एक्सपोजिसांवां सुरू जालीं. पूण भौशीक दर्शना सुरू जायत मेरेन केन्ना- केन्नाय ती रुप्या पेट उगडपाक गरज पडटाली. तशीं कांय खासगी दर्शना जाल्यांत.
197 वर्सांनी जेजुयत पाद्री परतून गोंयांत
197 वर्सा उपरांत, जेजुयत पाद्री परतून बऱ्या जेजुच्या कंवेंतांत भितर सरले. 1956 वर्सा एप्रिलाचे 30 वेर तें घर ताणीं आपले सुवाधीन घेतलें. उपरांतूय कांय खासगी दर्शनां जाल्यांत. 1973 वर्सा, जानेवारीचे 21 वेर भारतांत, पाप सायबाचे दूत, पयलेच फावट गोंयांत पावलले. तेदनां सुमार धा हजार लोकांनी तरी पवित्र कुडीचो (रेलिकांचो) उमो घेतलो. हें निमाणे खासगी दर्शन जालें.
आतांचें 18 वें भौशीक दर्शन (एक्सपोजिसांव)
आयज मेरेन, भाग्यवंत फ्रान्सीस शावियेराचे पवित्र कुडीचीं सतरा भौशीक दर्शनां जाल्यात. ह्या वर्साक आसा तो, भाग्यवंत फ्रांन्सीस शावियेराचे पवित्र कुडीचो (रेलिकांची) 18 वो दर्शन सुवाळो. पयलो भौशीक दर्शन (एक्सपोजिसांव) 1782 वर्सा, फेब्रुवारीचे 10 तें 12 तारखे मेरेन जालो. पयली दाखवण फकत तीन दीस. कित्याक ही दाखवण करची पडली? त्या शेकड्यांत पुर्तुगालाच्या सरकारान पवित्र सभेक धुमाळो दिवंक सुरू केलें. जेजुयतांचें बळ मोडल्यार कॅथलीक पवित्र सभा अशक्त जातली, अशें सरकाराक दिसलें. 1759 वर्सा जेजुयतांक, पोंबालान धांवडायले. बरे जेजुच्या कंवेंतांत जेजुयत पाद्री आसले तांकां कैदी केले. कंवेंताचे भोगणार जाले. जेजुयत आपल्या भावाची कूड घेवन गेले म्हूण पुराय गोंयांत बोवाळ जालो. ही फट म्हूण सिद्ध करुंक ताणीं ताची कूड आसलली पेट उगडून काश्यांवांत कितें आसा तें लोकांक दाखोवंक जाय आसलें. हे तरेन पयले भौशीक एक्सपोजिसांव तेदनां सुरू जालें.
दुसरो दर्शन सुवाळो 79 वर्सां उपरांत 1859 वर्सा डिसेंबराचे 3 तारीख ते 1860 वर्साचे जानेवारीचे 8 वेर मेरेन चल्लो. ह्या, 37 दीस चलपी एक्सपोजिसांवां खातीर पुर्तुगेज राजाची खेरीत परवानगी हाडची पडली. ह्या भौशीक सुवाळ्यांत भारताचो तशेंच श्रीलंकेचो लोक आयललो. सुमार दोन लाख यात्रेकारांनी हांतूत वांटो घेतलो.
तिसरो पवित्र कुडीचो दर्शन सुवाळो,1879 वर्सा, 3 डिसेंबर तें 6 जानेवारी 1880, मेरेन जालो. पयलेच फावट हें दर्शन से काथेद्रालांत जालें. चवथो दर्शन सुवाळो, 1890 वर्सा डिसेंबर 3, तें 1891 वर्सा, जानेवारीचे 1 तारीख मेरेन जालो जाल्यार पांचवो दर्शन सुवाळो, 1900 वर्स, पवित्र वर्स म्हण जाहीर जाल्ल्यान डिसेंबर म्हयन्यांत 4 दीस म्हणल्यारूच 1900 वर्सा, डिसेंबराचे 7 वेर ते 10 वेर मेरेन जालो.
सव्वें एक्सपोजिसांव वा दर्शन सुवाळो, 1910 वर्सा, नोव्हेंबराचे 26 वेर तें डिसेंबर 28 तारीख मेरेन जालो. 1510 वर्सा, आफोन्सो दे आल्बुकेर्क हाणें मुसलमानां कडल्यान, गोंय दुसरे फावटी जिखून घेतललें. हे घडणेच्या चवथ्या शेकड्याच्या उगडासाक हो दर्शन सुवाळो आयोजीत केल्लो.
सातवें एक्सपोजिसांव, भाग्यवंत फ्रांन्सीस शावियेराक, भाग्यवंत म्हूण परगटल्यार तीन शेकडे भरताले, देखून 1922 वर्सा डिसेंबर 3 ते 1923 वर्सा जानेवारी 7 मेरेन भौशीक तरेन जालें. आठवो पवित्र कुडीचो दर्शन सुवाळो, 3 डिसेंबर 1931 तें 10 जानेवारी 1932 मेरेन जालो जाल्यार नव्वे एक्सपोजिसांव 1942 वर्सा, मे 6 ते 17 मेरेन चल्लें. ही नव्वी दाखवण करपाचीं तीन कारणां आसलीं. : 1) भाग्यवंत फ्रांन्सीस शावियेर गोंयांत पावल्यार मे म्हयन्याचे 6 तारखेर चार शेंकडे भरताले. (2) पाप सायब पीऊस बाराव्याक बिस्पाल्लेची अर्द (Episcopal Ordination) मेळ्ळ्यार 25 वर्सां भरतालीं आनी (3) फातिमा गांवांत सायबीण मांय दिश्टी पडल्यार 25 वर्सां जातालीं.
धावें एक्सपोजिसांव, 1952 वर्सा डिसेंबराचे 3 तारखेर सुरू जावन, 1953 वर्सा जानेवारी 6 तारीख मेरेन चल्लें. 1961 वर्सा डिसेंबर १४- ३१, मेरेन घडोवन हाडिल्लें इकरावें एक्सपोजिसांव गोंयकारांक खूप म्हत्वाचें. पुर्तुगेज, गोंय आपलें म्हणटाले आनी भारतूय, गोंय आपलें म्हणटालो. गोंय मुक्त जावपाच्या ह्या काळांत सायबाची पवित्र कुड उगडली. भिरांतेक लागून, हे फावटी दर्शन घेवंक लोक चड येवंक ना, म्हण इतिहास सांगता.
मुंबय शारांत, 1964 वर्सा, नवेंबराचे 28 वेर तें डिसेंबराचे 6 वेर मेरेन Eucharistic Congress भरललो. जायतो भायलो लोक पासून मुंबय येवंचो आसलो. तांकां भाग्यवंत फ्रांन्सीस शावियेराची पवित्र कुड (रेलिको) दाखोवंक एक संद कशी घेवन, बारावें एक्सपोजिसांव 1964 वर्सा, नोव्हेंबराचे 24 तें 1965 वर्सा, जानेवारी 6, मेरेन जालें. तेरावें एक्सपोजिसांव, 3 डिसेंबर, 1974 ते 5 जानेवारी, 1975 मेरेन चल्लें. ह्या एक्सपोजिसांवा खातीर सरकाराच्या पर्यटन खात्यान खूप नेटान जायरात केल्ली. चवदावे एक्सपोजिसांव 1984 वर्सा नोव्हेंबर 21 ते 1985 वर्सा जानेवारी 13 मेरेन जालें जाल्यार पंद्रावें 1994 वर्सा, नोव्हेंबर 21, ते जानेवारी 7, 1995 वर्स मेरेन चल्लें. हे एक्सपोजिसांव 47 दीस चालू उरलें आनी 10,78,174 यात्रेकारांनी आनी पर्यटकांनी सायबाचो उमो घेतलो. सोळावे एक्सपोजिसांव नोव्हेंबर 21, 2004 ते २ जानेवारी, 2005 मेरेन जालें. सतरावें, 2014 वर्सा, नोव्हेंबराचे 22 वेर तें जानेवारीचे 4 तारीख मेरेन जालें.
दर्शन सुवाळ्याचो विशय
‘शुभवर्तमानाचे परगटनार आमी’- अठराव्या पवित्र कूड दर्शन सुवाळ्यांचो विशय. ह्या वर्सा जावपी अठराव्या भौशीक पवित्र कूड दर्शन सुवाळ्यांक (एक्सपोजिसांवांक) आर्सेबिस्प फिलिप नेरी कार्डीनल फेर्रांव हाणीं आदींच फुडें यात्रेकारांक आमंत्रण दिलां आनी गोंयांत जावपी, भाग्यवंत फ्रांन्सीस शावियेराचे पवित्र कुडीच्या दर्शन सुवाळ्यांक आत्मीक तयारी करुंक मागिल्लें. हे विशीं कोंकणी आनी इंग्लेज भाशेंत मागणें तयार करुन दिल्लें दोतोनीच्या भुरग्यांक, वेग-वेगळ्या पांवड्यांचेर, सांतांच्या/ भाग्यवंतांच्या जिविताचेर प्रस्न- मंच सर्त आनी हेरूय कार्यावळी घडोवन हाडल्यात.
कार्डीनल फेर्रांव हाणीं, भाग्यवंत फ्रांन्सीस शावियेराचे पवित्र कुडीच्या एक्सपोजिसांवां खातीर एक खास समिती नेंमलली आसा आनी ताचे निमंत्रक म्हण आदल्या गोंयां आसलल्या खुरीस मिलाग्र नवसरणेच्या केंद्राचे संचालक फा. हेनरी फाल्कांव हांकां नेमल्यात. ताणें आमचे कडेन उलयतना, हें घडीत एक आत्मीक घडीत जातलें म्हण सांगून गोंय- दामांवचो म्हाधर्मप्रांत हें घडीत क्रिस्ती जिविताचे नवसरणे खातीर वापरतलो म्हण सांगलें.
फाटलें फावट म्हळ्यारच 2014 वर्सा जाल्ल्या दर्शन सुवाळ्यांक अदमासान 50 लाख यात्रेकारां गोंयांत आयललीं जाल्यार हे फावटी, संपर्क साधनां वरवीं प्रसिद्धी जाल्या तशेंच यात्रेकारांक येवंक साबार सोंपेपणां आसात म्हणटच 70 लाख अदीक यात्रेकारां येतलीं असो आमचो अदमास आसा म्हण फा. हेनरीन सांगलें.
“ आर्सेबिस्पान ह्या कार्या खातीर 15 जणांची समिती नेमल्या. हो वावर येशस्वी तरेन जावंक, दर एका वांगड्याक जबाबदारी वांटून दिल्या. तशेंच उप-समितीचे फुडारी नेमलेले आसात. उप- समिती मदीं, कलाप्रदर्शन, सेवाधर्म, संपर्क साधनां (आनी हेरांचोआस्पाव आसा.) अशें ताणें नेमलल्या समिती विशीं उलयताना सांगलें. हे समितीन, ‘परगटणार’ हें भाग्यवंत फ्रान्सीस शावियेराचें जिवीत आनी मिसांव दाखोवपी संगीत नाटक गोंयांत सादर केलां. तशेंच, ‘भरवांश्याचीं पावलां’ हें भाग्यवंत फ्रान्सीस शावियेराचेंर चित्र-प्रदर्शन घडोवन हाडलां.
सरकाराचो सहकार आसा
सरकाराच्या आदारा विशीं उलयताना फा. फाल्कांव हाणीं म्हणलें: “ही घडणी, मुखेल तरेन एक आत्मीक घडणी आसून, गोंय- दामांवच्या म्हाधर्मप्रांतांची घडणी ती. 45 दिसांनी लाखांनी लोक गोंयांत येतलो म्हणटच, जायत्या सवलती खातीर सरकाराचो आदार जाय. जाय आसलल्यो वेग-वेगळयो सुविधा (infrastructure)जशे परीं, सुरक्षा, रस्ते, उदका पुरवण, बिजली, अॅम्बुलन्स, उजो पावलवपी दळाची सेवा आदी. इगर्ज दिवंक शकनां. सरकारान सहकार दिललो आसा. सरकारान आपले वतीन ह्या कामा खातीर आयुक्त नेमलले आसात. ही पुराय घडणी आमकां फळादीक आनी उगडासाक उरपा सारकी केलली जाय म्हणटच तांच्या वांगडा, आमची समिती, लागशिल्ल्यान वावुरता.”
सोंपयतना
भाग्यवंत फ्रान्सीस शावियेराचे कुडीचे फाटले स दर्शन सुवाळे, धा- धा वर्सांनी घडोवन हाडल्यात. पयलींच्यो कांय कारणां खातीर जाहीर केल्ल्यो. भाग्यवंत फ्रान्सीस शावियेराचो, आमकां सगळ्यांक अभिमान. आमी, तांका ‘गोंयचो सायब’ म्हणटात. आमचें गोंय ते सांबाळतात. सगळ्या वायटातलीं आमकां राखल्यात, म्हण आमी भावार्थान मानतात. ते जियेलल्या जिविता तशेंच ताणीं चलयलल्या मिसांवांचेर नियाळ करतच, हो भाग्यवंत आमकां नमुनो जाता.
जॉन एम्. आल्फोंसो, कार्मेलीत
7666519837
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
