भांगरभूंय | प्रतिनिधी
उदय भेंब्रे हांच्या विधानाचो मगो पक्षा वतीन निशेध
पणजीः आदले मुख्यमंत्री भाऊसायब बांदोडकार हांणी जनमत कौलाचें समर्थन केल्लें. ते भायर महाराष्ट्रवादी गोमन्तक पक्षान कोंकणी आनी मराठी मदीं केन्नाच भेदभाव करूंक ना. उदय भेंब्रे हांचे सारक्या कांय जाणांक भोवजन समाज वयर सरिल्लो नाका देखून ते मगो पक्षाचो दुस्वास करतात, असो गंभीर आरोप मगो पक्षान केलो. भेंब्रे हांणी बांदोडकारा आड केल्लें विधानाचोय पक्षान निशेध केला.
उदय भेंब्रे हांणी कोंकणी भास आनी जनमत कौला विशीं व्हिडियोंत उलयतना मगो पक्षाचे फुडारी आनी पयले मुख्यमंत्री भाऊसायब बांदोडकार हांचे विशीं भाश्य केल्लें. तांच्या ह्या विधानाचो निशेध करपा खातीर मगोन आपले कचेरेत पत्रकार परिशद आपयिल्ली. तिका पक्षाचे उपाध्यक्ष नारायण सावंत आनी भांडारी अनंत नायक हाजीर आशिल्ले.
अनंत नायक हांणी सांगले, 5 ते 6 दीस पयली मडगांवचे आदले आमदार आनी कोंकणी मोगी उदय भेंब्रे हांणी मगो पक्षाचेर तथ्यहीन आरोप करून मराठी, मगो, बांदोडकर आनी काकोडकार हांचे आड दुस्वासान भरिल्लीं विधानां केल्यांत. मगो पक्षाचे तशेंच भोवजन समाजाचे फुडारी हाचो निशेध करतात. भेंब्रे सारकिल्ले उच्च वर्गीय लोकांक लागून भोवजन समाज फाटलीं 40 वर्सां फाटी उरलो. भाऊसायब मुख्यमंत्री जाले उपरांतूच तो वयर सरलो, असो दावो नायक हांणी केलो.
भोवजन वंचित आसले आनी भेंब्रे सारकिल्ले लोक तांकां वयर सरपाक दिनासले. पुर्तुगीजां बरोबर बरें संबंद दवरून भोवजन समाजाचेर चेपण हाडपाचो तांणी यत्न केल्लो. भाऊसायबान भोवजन समाजाक एकठांय हाडिल्ले कारणान भेंब्रे तांच्या नांवान टिका करतात. भाऊच्या मंत्रीमडळांत क्रिस्तांव, सारस्वत आनी बारीक समाजाचे लोकूय आसले, अशें श्री. नायक हांणी सांगलें.
गोंय, महाराष्ट्रात वा कर्नाटकांत विलिन करचे वा संघप्रदेश उरचो ह्या तीन मुद्दयांचेर केंद्रान जनमत कौल घेवपाचें थारयलें. भाऊसायबान जॅक सिक्वेरा बरोबर चर्चा करून जनमत कौल घेवपाचो विचार केलो. तांणी जनमत कौलाक तेंको दिवन जो निकाल आयला तो मान्य केलो. भाऊसायबान कोंकणीक केन्नाच दुय्यम मानूंक ना, मराठी आनी कोंकणीक तांणी समान वागणूक दिली. उदय भेंब्रे भाशेच्या नांवान फुट घालपाक सोदता, असो आरोपूय नायक हांणी केलो.
आमची संस्कृताय सांगता की आमी शिक्षण, अणभव आनी जाण्ट्यांचो मान राखपाक जाय. मराठी शिकून ती आमकां हें गिन्यान आयलां, अशें पक्षाचे उपाध्यक्ष नारायण सावंत हांणी सांगलें. 50 वर्सा उपरांत अचकीत तांकां जनमत कौलाची कशी याद येता? मगो पक्षान उक्त्या मनान जनमत कौल स्विकारलो. गोंयचे काय घटक गोंय हो भारताचो अभिवाज्य भाग मानिनासले आनी गोंय भारता पसून वेगळे करपाची मागणी करताले. ह्या भंयान मगो पक्षान विलीनीकरणांक तेंको दिल्लो. ते भायर मगो पक्ष कोंकणी आनी मराठी भाशांक समान मानता, असो दावो सावंत हांणी केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
