भांगरभूंय | प्रतिनिधी
जोयडा, खबरां संस्था: कर्नाटकाच्या नियोजीत भांडूरा प्रकल्पा खातीर खानापूर म्हालांतल्या करंबळ, रुमेवाडी, शेडेगाळी आनी आसोगा हांगच्या जमिनींचें संपादन करपाची आतां सरळ कर्नाटक सरकारा वतीन अधिसुचवणी जारी केल्या. थळाव्या शेतकारांचो विरोध आसूनय तांच्या हरकतींक केराची टोपली दाखयत ही अधिसुचवणी जारी केल्या.
भांडूरा व्हाळांतलें उदक मलप्रभा न्हंयेंत वळोवपाचे येवजणे खातीर चार गांवांतलें शेतजमिनींचे संपादन केल्ल्याचें अधिसुचवणेंत म्हणलां. हेरूय कांय शेतकारांक ह्या संकटाक तोंड दिवचें पडटलें.
दोन म्हयन्यां पयलीं बागलकोटच्या विशेश भुसंपादन विभागान भूसंपादना खातीर शेतकारांक नोटीस जारी केल्ली. तशेंच अधिकार्यां वतीन खानापूराक पळोवणी केल्ली. तेन्ना शेतकारांनी भूसंपादनाक विरोध करीत हरकती नोंद केल्ल्यो. मात, हो प्रकल्प पिवपाच्या उदका खातीर आशिल्ल्यान हरकतींची दखल घेवपाक शकना, अशें राज्यपालांक जारी केल्ले अधिसुचवणेंत म्हणलां. हुबळी-धारवाड आनी कुंदगोळ आनी हेर गांवांक पिवपाचें उदक दिवपाक कळसा-भांडूरा येवजण आशिल्ल्याचें नमूद केलां.
वट्ट ९ एकर २७ गुंठे जमनीचें संपादन करपाचें आशिल्ल्यान असोगाच्या २ एकर ३८ गुंठे, करंबळच्या १५ गुंठे, शेडेगाळीतली १४ गुंठे जाल्यार रुमेवाडीचे सगल्यांत चड ६ एकर जमिनीचो आसपाव आसा. शेतकारांचे हरकतींची दखल घेनासतनाच अधिसुचवणी जारी केल्ल्यान शेतकारांनी तिडक उक्तायल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
