भांगरभूंय | प्रतिनिधी
उदका स्रोत खात्याच्या अधिकाऱ्यांनी केली खानापूरच्या कामाची पळोवणी
भांगरभूंय । प्रतिनिधी
पणजीः गोंयची जिवनदायिनी आशिल्ले म्हादय न्हंयेच्या उदका संबंदांतल्या खटल्याचेर सर्वोच्च न्यायालयांत सुनावण्यो चालू आसतनाच, कर्नाटक सरकारान खानापूरच्या नेरसे वाठारांत पायप बांदपाचो कारखानो सुरू करपाच्यो हालचाली चलयल्यात. ते खातीर लागपी सामान लेगीत थंय हाडटात. उदका स्रोत खात्याचे अधिक्षक अभियंतो दिलीप नायक हांणी हालींच खानापूरांत प्रत्यक्षा भेट दिवन ह्या कामाचें खरेंपण तपासलां.
म्हादय संबंदांत केंद्र सरकारान स्थापन केल्ल्या उदक तंटो लवादाच्या अंतीम आदेशा उपरांत लेगीत कर्नाटकान म्हादय न्हंयेचें उदक मलप्रभेंत घुंवडावपाचें लिपचोरयां कारस्थान चालू दवरलां. ताका लागून गोंय सरकारान सर्वोच्च न्यायालयांत धांव घेतल्या. म्हादय वयल्यान गोंयांतलें राजकी वातावरण तापिल्लें आसतनाच, केंद्रीय उदका आयोगान कर्नाटकाच्या कळसा- भांडुरा संबंदांतलो सविस्तर प्रकल्प अहवालाक (डीआरपी) मान्यताय दिल्या. तेन्नाच्यान कर्नाटकाचे मुख्यमंत्री परतून परतून प्रधानमंत्री नरेंद्र मोदी हांची भेट घेवन कळसा- भांडुरा प्रकल्पा खातीर गरजेचे हेर पर्यावरणीय दाखले दिवपाची मागणी तांचे कडेन करीत आसा.
हो वाद सध्या सर्वोच्च न्यायालयांत आशिल्ल्यान केंद्रान कर्नाटकाक पर्यावरणीय दखले दिवंक नात. तरी लेगीत कर्नाटकान भांडुरा कानालाचें उदक घुंवडावपाचे नदरेन खानापूर वाठारांत पायपां तयार करपाचो कारखानो उबारपाच्यो हालचाली सुरू केल्यात. हाची म्हायती मेळटाच दिलीप नायक हांणी खानापूर वाठाराक भेट दिवन ह्या कामाची प्रत्यक्ष पळोवणी केल्या. हे विशींचो अहवाल ते सरकाराक दितले, अशी म्हायती उदका स्रोत खात्याच्या सुत्रांनी दिली.
बसकेची तारीख परतून बद्दली
म्हादय संबंदांत स्थापन केल्ल्या सभाघर समितीची बसका 10 जानेवारी बदला 8 जानेवारीक आपयल्या. 8 जानेवारीक दनपारां 3.30 वरांचेर ही बसका विधानसभेंत जातली, अशी म्हायती विधानसभा सचीव नम्रता उल्मन हांणी ‘भांगरभूंय’ कडेन उलयतना दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
