भांगरभूंय | प्रतिनिधी
मोगाळ गौरीश वेर्णेंकार,
तु का आयज भांगराळ्या वाडदिसाचीं भांगराळी परबीं. तुज्या घराण्यांत पिळग्यान पिळग्यो भांगराचो वेवसाय केला आसतलो.
पूण तुवें मात तुज्या जिविताचें भांगर करपाक कलेचो आदार घेतलो. वालोर तुका. भांगराचें मोल दिसानदीस वाडटा ही गजाल खरी, तरी भांगर कोणूय चोरून व्हरपाक शकता. तुवें जोडल्या ती कला मात कोण चोरूंक शकचो ना. ह्या तुज्या कलेच्या भांगराक पेटलांत बंद दवरपाची गरज ना. जितलें उक्तें तितलें अदीक चकचकतलें.
गौरीश, तुजें कलाक्षेत्रांतलें भांगर शंबर नंबरी चोख. कला म्हाविद्यालयांत शिकतना प्राचार्य महेश वेंगुर्लेकार हांचे कडसून तुवें जे जे गूण आपणायले ताचे तर तूं सदांच रीण मानता. तुका तांचे विशीं खूब आदर आसा. तेच कित्याक, कला आनी सरस्वतीच्या प्रांगणांत जे जे गुरू तुका वेळाकाळाक मेळ्ळे त्या सगल्यां कडसून मेळिल्ल्या ज्ञानाचें तुवें भांगर केलें.
गौरीश, आमच्या गोंयाक सुनापरान्त म्हणटात. ‘सुनापरान्त’ म्हणजेच ‘भांगरभूंय’. तूं सदां हे भुंयेचें रीण मानता. भांगरभुंयेंत जल्म घेवपी तुजे सारको भुंयपूत स्वातंत्र्यगीतां रचून ताच्यो ध्वनीमुद्रिका अर्थ प्रॉडक्शनाच्या माध्यमांतल्यान प्रसारीत करता. तूं जरी नास्तीक न्हय तरी दिसरात देव देव करणाऱ्यांतलोे न्हय हें हांव जाणा. पूण कोंकणींत भक्तीसंगिताचो उणाव आसा हाची जाणीव दवरून तूं तुजे तांकी प्रमाण भक्तीसंगीत रचता आनी संगिताचे साथीन सादर करता. महामाया, म्हाळसा, मल्लिकार्जून अशे उणेच ते चार- पांच आल्बम तुवें कोंकणी भक्तीसंगिताक दिल्यात. कविता, चारोळीचे संग्रह उजवाडायल्यात. नाटक, सिनेमा, मुर्तीकला, डिजिटल कलाकुशळटाय कितेंच तुका परकी न्हय. जंय हात घालता ताचे भांगर करता.
गौरीश, तुजें संघटन कुशळटाय दुबावा विणें मानपा सारकें. केवळ गोंयांतूच न्हय तर मालवण, मंगळूर, बेळगांव, कारवार, कुमटा, कोचीन, मुंबयच्या कोंकणी वावुरप्यां कडेन तुजो लागींचो संबंद. अखील भारतीय साहित्य परिशद, कोंकणी लेखक संघ, विश्व कोंकणी केंद्र, कलांगण, कविता ट्रस्ट अश्या साबार साहित्यीक संस्थां बरोबर तुजो वावर. सोशल मिडियाचेर कोणाचे वाडदीस, कोणाक भौमाना खातीर परबीं, कोणाचे पुस्तक प्रकाशन तुजो व्हिडियो वा पोस्ट आसताच.
गौरीश, हें सगळें खरें. पूण म्हाका केन्ना केन्ना दिसता तूं तुज्या तांकी परस मात्सो चड वावर करता. आयज बेळगांव, फाल्यां गोंया, परवां मंगळूर. सकाळीं इश्कोलांत, सांजे पणजे कविसंमेलनाक, राती कडेन कोणाचो भौमान सुवाळो. घरा पावतकीर सोशल मिडिया खातीर व्हिडियो तयार करप. हें सगळें करता करता तुजे खातीर वेळ केन्ना काडटा? वेळ काडूंक जाय.
आयच्यान तुजो भांगराळो काळ सुरू जालो. भांगर सगल्यांक जाय जायशें दिसतलेंच. भांगरूच तें. आतां तुवें आनीक चड चकचकूंक जाय. धांव धांव उणी करून सृजनशील कलेक इल्लो चड वेळ दिवंक जाय. तूं शंबर नंबरी भांगर. एक इश्ट आनी तुजे परस पिरायेन तेरा वर्सांनी व्हड ह्या अधिकाराच्या नात्यान इतलेंच सांगता, भलायकेची काळजी घे. येता त्या काळांत आमकां तुजी नवी साहित्य रचना वाचपाक हांव आवडेतां. नवीं गीता आयकुपाक कान आशेल्यात. काळजाच्या कुरकुटांत भितर खोल आशिल्लो तुजे विशींचो मोग उलयता. म्हजे कडसून आपसूक बरोवन जालां.
न्हिदेंत आसूं वा जागेपणी तुजें सदां बरें मागपी तुजो इश्ट,
उदय नरसिंह म्हांबरो
9420766769
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
