भांगराळें गोंय अस्मिताय संस्थेच्या नव्या वावुरपी समितीची जाली वेंचणूक

भांगरभूंय | प्रतिनिधी

मडगांव: भांगराळें गोंय अस्मिताय ही संस्था फाटलीं साबार वर्सां कोंकणी संगीत, कला, नाट्य आनी कोंकणीच्या हेर मळांचेर सातत्यान वावर करीत आसा. कोंकणी भजन सर्त, श्रीमती सुमती रामा नाईक यादस्तीक हौशी कोंकणी उत्सवी नाटक सर्त, नव्या कलाकारांक घुमट- शामेळ वादन कार्यशाळा ही संस्था सातत्यान आयोजीत करता. तशेंच कोंकणीच्या मळार वावर केल्ल्या म्हालगड्यांक ‘भांगराळो गोंयकार पुरस्कार’ आनी संघटनात्मक वावर करपी तरणाट्यांक ‘नित्य युवा पुरस्कार’ भेटयतात. भांगराळें गोंय अस्मिताय ही संस्था आज गोंयभर आनी गोंयां भायर कोंकणीच्या ह्या वावरा खातीर नांवां रुपाक आयल्या.
भांगराळें गोंय अस्मिताय ची वावुरपी समितीची वेंचणूक बुधवार, ता. 17 सप्टेंबर दिसा मडगांवां जाली. हे संस्थेचे आदले अध्यक्ष राजेश प्रभू हांच्या यजमानके खाला दोन वर्सां खातीर नव्या वावुरपी समितीची वेंचणूक जाली.
हे नवे समितीचे अध्यक्ष म्हूण ऍड. पंढरीनाथ परब हांची निवड जाली. तशेंच उपाध्यक्ष सुरज कोमरपंत, सरचिटणीस रजत हेगडे, जोडचिटणीस उदय गुडे, भांडारी एकनाथ मराठे, जोड भांडारी पंकज नमशीकार हांची निवड जाली. त्या भायर वावुरपी समितीचे वांगडी म्हूण डॉ. मिथील फळदेसाय, केदार संतोष सावंत आनी मंजू शंके हांची निवड जाली. स्विकृत वांगडी म्हूण सुहास वेर्णेकार, गुरुदत्त किर्तनी, अँड. दिपा भांडारी, डॉ. पूर्णानंद च्यारी आनी राजेश प्रभू हांची निवड जाली.