भांगरभूंय | प्रतिनिधी
जळगांव, खबरां संस्था: भांगर-रुपें वाडतूच आसा. भांगराच्या दरांत एके रातीन परत १५०० रुपयांची वाड जाल्या. भांगराचें मोल ९९,००० रुपया जालां. तशेंच जीएसटी सयत हो दर १०२००० रुपया जाला. आयज भांगराच्या दरांत आनीक वाड जावपाची शक्यताय आशिल्ल्या भांगरा वेवसायिकांनी सांगलें.
अमेरिका आनी चीनाच्या वेपार झुज हें भांगराचे दर वाडपाक कारण थारिल्ल्याचें मानतात. मजगतीं, कांय दिसांनी अक्षय तृतीया आशिल्ल्यानूय भांगर वाडपाची शक्यताय आसा.
१ लाख २१९ रुपयांनी तोळो
सोमारा सकाळीं भांगराच्या दरांत ६०० आनी सांजेवेळार परत ७०० रुपयांनी वाड जाल्ली. हाका लागून भांगर ९७.३०० रुपया प्रती तोळो जालां. जाल्यार जीएसटी सयत १ लाख २१९ रुपया प्रती तोळो जालां. तशेंच, रुप्यांत १२०० रुपयांची वाड जावन ती ९७,५०० रुपया प्रती किलोचेर पावल्या.
सकाळीं भांगरा-रुप्याचें दर दरेकी ९६,५०० रुपयांचेर आशिल्लें. पावणे पांच वर्सां उपरांत काल (सोमार) सकाळीं भांगरा- रुप्याचें दर एकसारके (भांगर प्रती तोळो आनी रुपें प्रती किलो) जाल्ल्याचें दिसून आयलां. पयलेच फावट रुप्या परस भांगराचो दर वाडला. एप्रीलांत २४ कॅरेट भांगराच्या दरांत वट्ट ६,१०० रुपयांची वाड जाली. शेनवारच्या ९५,८०० रुपयांचे तुळेंत भांगर १,७०० हजारांनी वाडून ९७,५०० रुपयांचेर पावलें. जाल्यार रुप्याचें दर ७०० हजारांनी वाडून ९६,३०० रुपयांचे तुळेंत दर ९७ हजारां वयर पावलां.
अक्षय तृतीये दिसा आनीक म्हारग
३० एप्रिलाक अक्षय तृतीया. हो साडेतीन शुभ म्हुर्तां मदलो एक. ह्या दिसा भांगराचो दर एक लाखां वयर वतलें असो अदमास आसा. ह्यान पयलींच भांगराचें सर लाखांचेर पावलां. जानेवारी सावन भांगराचें दर चडटा-देंवतना दिसतात. १ जानेवारी २०२५ दिसा २४ कॅरेट भांगराचो दर ७७,५७७ रुपया प्रती १० ग्रॅम आशिल्लो. जाल्यार ३१ जानेवारीक तो ८३,१०७ रुपया प्रती १० ग्रॅम मेरेन पावलो. उपरांत आतां भांगर प्रती १० ग्रॅमाक ९९,५०० इतलें जालां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
