भांगरभूंय | प्रतिनिधी
कोंकणी खातीर सदांच वावुरतलों : कॅप्टन विरीयातो फर्नांडीस
पणजी : प्रुडंट मिडीयाचें कोंकणी दिसाळें ‘भांगरभूंय‘ दिल्लींत संसदेच्या वाचनालयांत वाचपा खातीर आतां उपलब्ध जातलें. ‘भांगरभूंय’ हें गोंयांतलें कोंकणींतलें एकमेव दिसाळें आसा. कोंकणी भाशा तिगोवन दवरून तिचे उदरगती खातीर हांव सेगीत वावुरतलों अशें दक्षीण गोंयचे खासदार कॅप्टन विरीयातो फर्नांडीस हांणी सांगलें.
भारतांतल्या कोंकणी मोगींक मान दिवपा खातीर ‘भांगरभूंय’ आनी ‘वावराड्यांचो इश्ट’ हें संसद वाचनालयांत उपलब्ध करपाची मागणी हांवें संचालकां कडेन केल्ली. कोंकणीक दोन ज्ञानपीठ इनामां फावो जाल्यांत. तियात्र कलाकार, शिक्षक, विद्यार्थी हांणी कोंकणी खातीर दिल्ल्या योगदानाक आमी सन्मान दिवपाक जाय. साहित्य आनी तरणाट्यांक वावर करपाक उर्बा दिवन कोंकणी भास आनीक बळीश्ट करपाची गरज आसा. भाशा ह्यो संवाद सादपा सयत गिन्यान वाडोपा खातीर म्हत्वाच्यो थारतात. कोंकणी भाशेचे उदरगती खातीर हांव सेगीत येत्न करीत रावतलों, अशें कॅप्टन फर्नांडिस हांणी म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
