भांगरभूंय | प्रतिनिधी
‘८० टक्के सोर्याचे आवटलेट्स भायल्या लोकांचे’ ही ती बातमी
पणजीः मोपा विमानतळार ८० टक्के सोर्याचे आवटलेट्स भायल्या लोकांचे आसात, ‘भांगरभूंय’चे हे बातमेची दखल विरोधी पक्ष फुडारी युरी आलेमाव हांणी घेवन सभाघरांत ‘भांगरभूंय’ दाखयलो. हे बातमेची दखल घेवन मुख्यमंत्री डॉ. प्रमोद सावंत हांणी पूर्ण चवकशी करपाचें आस्वासन दिलें.
शुन्य प्रहरा वेळार आलेमाव हांणी सांगलें, ‘मोपा विमानतळार ११ मदले ९ सोर्याचे आवटलेट्स हे गोंयां भायल्यांक दिल्यात, अशी बातमी ‘भांगरभूंय’न उजवाडाक हाडल्या. मुख्यमंत्र्यांच्या ह्या विशयाचेर लक्ष ओडून घेवपा खातीर आलेमांव हांणी विधानसभेंत ‘भांगरभूंय’ दाखयलो.
११ मदले फकत २ आवटलेट्स हे गोंयकारांचे आसात ही खूब हुस्क्याची गजाल. थळाव्यांक वेवसाय करपाची इत्सा, तांक आनी कापझदाद आसून लेगीत सरकार भायल्या लोकांक आनी वेवसायांक पुराय तेंको दिता, असो गंभीर आरोप आलेमाव हांणी केलो.
मुख्यमंत्री प्रमोद सांवत हांचेकडे अबकारी तशेंच नागरी उड्डाण हीं दोनूय खातीं आसात. थळावे आनी गोंयकारांक बरी वागणूक दिवची अशी मागणी सभाघरांतल्या आमदारांची आसा. मात जी पद्दत सरकारान आपणायल्या ताका लागून गोंयकारां मदीं फुडारा विशीं हुस्को पातळ्ळा, अशें आलेमाव हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
