भांगरभूंय | प्रतिनिधी
एप्रीलाचे 7 तारखे सावन म्हणल्यार कालच्यान, संवसारीक भलायकी दिसाच्यान आवय आनी नवजात बाळकांचे भलायके विशीं वर्सभर चलपी मोहीम सुरू जाली. ‘भलायकेन सुरवात, आशेचो फुडार’ हे संकल्पने खाला तयार केल्ली ही मोहीम सरकारांक, भलायकी वाठारांत वावुरपी घटकांक, आवय आनी नवजात शिशूंचें मरण प्रमाण उणें करपाचे यत्न वाडोवपाक आनी बाळंत बायलांची दीर्घकाळ भलायकी हांचे खातीर प्राधान्य दिवपाक उलो मारता. ह्या निमतान संवसारीक भलायकी संघटणा आनी भागिदार भलायकीपूर्ण गुरवारपणांक, बाळक जल्मांक आनी बांळटेरा उपरांतचे बरे भलायके विशीं आदार दिवपाक उपेगी म्हायती वांटून घेतले.
दरेक अस्तुरेक, भुरग्याक जियेवंक आनी बरे तरेन वयर सरपाक मजत करप हें काम म्हत्वाचें. खंतीची गजाल म्हणल्यार संवसारांत उजवाडाक आयिल्ल्या अदमासा प्रमाण दरवर्सा सुमार 3,00,000 बायलांक गुरवारपण वा बाळंतपणाक लागून जीव व्हगडावचो पडटा, जाल्यार 20 लाखां वयर भुरगीं जिणेच्या पयल्या म्हयन्यांत मरतात. सुमार 20 लाख भुरगीं मेल्ले अवस्थेंत जल्मांक येतात. म्हणल्यार दर 7 सेकंदाक अदमासान 1 आडावपाक येवपी मरण, हें प्रमाण आंगार कांटो काडपी. हेंच गरीब देशांनी चडांत चड घडटा.
सद्याची परिस्थिती पळयत जाल्यार, 5 मदले 4 देश 2030 मेरेन आवयच्या जिवितांत सुदारणा करपाचे ध्येय पुराय करपाचे वाटेर नात. जाल्यार 3 मदल्या 1 देशाक नवजात शिशुंचें मरण उणें करपाचें लक्ष्य पुराय करपाक अपेस येतलें. हीं चिन्नां हुस्क्याचीं. परिस्थिती बदलपाक जाय तर बायलांचें आयकप आनी कुटुंबांक आदार दिवप हो मंत्र म्हत्वाचो. सगले कडेन बायलांक आनी कुटुंबांक जल्मा पयलीं, जल्मा उपरांत शारिरीक आनी भावनीक नदरेन आदार दिवपी उच्च दर्जाची आरोग्य जतनाय जाय.
आवय आनी नवजात शिशू हांचे भलायकेचेर परिणाम करपी जायत्या भलायकी समस्यांचें वेवस्थापन करपाक भलायकी वेवस्था व्हड प्रमाणांत विकसीत जावंक जाय. तातूंत फक्त प्रत्यक्ष प्रसुती गुंतागुंत न्हय तर मानसीक भलायकेची स्थिती, असंक्रामक रोग आनी कुटुंब नियोजन हांचो आस्पाव जाता. आवय, भुरग्यांची भलायकी ही भलायकेन समृद्ध कुटुंबांची आनी समाजाची बुन्याद आसा, जी आमकां सगल्यांक आशेचो फुडार सुनिश्चीत करपाक मजत करता.
ह्या वावरांत सगल्या समाजान, एके वटेन समाज जागृताये पासत आनी दुसरे वटेन सरकारांक गंभीरपणान कामाक लावपाक समावेशकतायेन सहभागी जावचें पडटलें. संवसारीक भलायकी दिसान होच संदेश वर्सभर चलनाच्या मोहिमेंतल्यान दिला.
प्रकाश वा. कामत
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
