भांगरभूंय | प्रतिनिधी
श्रावण, चवथ सोंपसर शिवराक रावपी कुटुंबां उपरांत नुस्तें, तांतयां, चिकनाचेर तुटून पडटात आसतलीं. कारण चवथीचे पांच दीस उलगले काय शेजराच्या राज्यांतल्यान हो म्हाल गोंयचे दिशेन वेगान व्हांवपाक लागता. अक्षरशा टनाचे टन. हरकत ना. हरशीय म्हूण पर्यटन राज्य म्हणटकच मास, नुस्तें येता तितलें उणेंच. पूण तातूंतलें थोडें भलायकेचे नदरेन योग्य नासता. फाॅर्मेलीन, रसायनां मारिल्लें आसता. थोड्यांचेर मोल छापिल्लें नासता. थोडें गुपचूप कसलीच सरकारी परवानगी घेनासतना हाडटात. ताचेर चेक नाके वा अन्न- वखदां प्रशासन कारवाय करता. अर्थांत सदांच न्हय. कांय वेळार म्हाल नकळटां वा शिमे वयल्यांचे हात ओले करून गोंयांत पावता.
कालूच कर्नाटकांतल्यान आयिल्लें सुमार देड टन चिकन (कोंबयेचें मास) अन्न आनी वखदां प्रशासनान (एफडीए) जप्त केलां. हाचें मोल दोन लाख रुपयां वयर आसा. मास, नुस्त्याच्यो पंचविसां वयर गाडयो तपासल्यो. तातूंत हें मेळ्ळें. तें भलायकेक योग्य नाशिल्लें. तें बेकायदेशीरुय आशिल्लें खंय. हो कितें पयलोच प्रकार न्हय. चड करून सदांच तो जाता आसतलो. आॅगस्टांत एफडीएनूच पत्रादेवी, मोल्यां, केरी मध्यानरातीं तपासणी केल्ली. तेन्ना केरी 1760 कील चिकन आनी 500 कील पनीर धरिल्लें. पत्रादेवी 10 कील खोया, तर मोल्यां 700 कील चिकन जप्त केल्लें. हो म्हाल सादारण तीन टन. कांय वर्सां पयलीं नुस्तें तिगपाक जाय म्हूण फाॅर्मेलीन लायतात, असो बोवाळ जाल्लो. फळांच्या बाबतींतूय हें जालां. फळां हाडप, रसायनां लावन ती पिकोवप. खंयूय सांठोवन दवरप. चवथीच्या दिसांनी तर म्हापश्यां बिफ दवरताले ते कुडींत आपोल दवरिल्ले. भायल्यान बेकायदेशीर बिफूय हाडप जाता.
ही सगली आवक नकळटां वा चुकून जाता, अशें म्हणप धाडसाचें थारतलें. सगल्यांक सगलें खबर आसता. कळटा पूण वळना, म्हणटात तसलो प्रकार. हातूंत थोड्यांची चांदी जाता आसली, पूण गोंयकारांची भलायकी इबाडटा. एफडीएच न्हय, तर सगल्याच तपास यंत्रणांनी हे बाबतींत आनीक कडक पावलां उबारपाक जाय. कर्नाटकांतले अबकारी अधिकारी कांय फावटी सोरो धरतात, तो गोंयच्या चेकनाक्यांचेर कसो सांपडना? ह्या घडणुकांक लागून गोंय सरकाराची येणावळ बुडटा, हाचोय विचार तांणी करपाक नाका? कर्मचाऱ्यांचो उणाव आसा जाल्यार नवो भरती करचो. नाजाल्यार उणें काम आशिल्ल्या कर्मचाऱ्यांक तें काम दिवंचें. गोंयचे भलायके कडेन हाचो थेट संबंद आशिल्ल्यान सरकारी यंत्रणांनी चड गंभीर जावपाक जाय. राज्यांत कॅन्सर आनी हेर दुयेंसांनी खूब वाड जाल्या. गोडेंमूत, प्रेशर, किडनी- काळजाचीं दुयेंसां वाडल्यांत. हाका गोंयचो आहारुय जापसालदार आसा.
गोंयचें खाणां उत्पादन वाडोवपा कडेनूय लक्ष दिवंक जाय. आयज ना जाल्यार फुडल्या 10 वर्सांनी ताचो फायदो जातलो. थळाव्या उद्देगां वांगडाच रोजगार वाडटलो. गोंयांत पाॅल्ट्री उद्देग वाडोवपाची संद आसा. हें जाता तेन्ना जाता, पूण सध्या आयातीक कायद्याचें फास्केंत घालपाक जाय. लेबल आशिल्लो म्हाल योग्य जाग्या वयल्यानूच येवचो, एफडीए वरवीं खर तपासणी जावची. गोंयाक वर्साक सादारण स हजार टन चिकन लागता खंय. हेर मास, नुस्तें, फळां, भाजी, पनीर, खोया कितलो लागता आसतलो, ताची कल्पना करची. ‘इबाडिल्लो म्हाल हाडून विकल्यार आमकां गिरायक जातलें??’ असो एक युक्तीवाद भोवतेक विक्रेते करतात. पूण, गिरायकूच इतलें आसता की गाळी संवून पांच गिरायकां कायमचीं गेलीं तरी धा नवीं येतात. केंद्र सरकाराचो कडक कायदो आसा. चिकन, मासाची येरादारी कशी करपाची ताचेय नेम आसात. तरीय…!
विक्रेत्यांनीय आपूण कितें विकता, ताचे दुसऱ्यांचे भलायकेचेर कितें परिणाम जातले, ताचो विचार करपाक नाका? पयश्या फाटल्यान धांवप चुकीचें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
