भलायकी यंत्रणेक दिका दिवपी निर्णय !

भांगरभूंय | प्रतिनिधी

कोरोना म्हामारी उपरांत देशांतल्या सरकारी आनी खाजगी हॉस्पिटलांत आशिल्ल्या आयसीयूंतल्या कॉटींच्या आंकड्यांत बरीच वाड जाली अशें म्हणपाक जावचें ना. तरी लाख- सव्वालाख मेरेन हो आंकडो आसतलो असो अदमास आसा.

एका दोतोर इश्टान दिल्ले म्हायती प्रमाण आयसीयू कक्षाचो दिसाचो सरासरी खर्च पांच तें सात लाखां मेरेन आसता. ताका
लागून तो खर्च भरून काडपा खातीर कांय फावट हॉस्पिटलांत नाकाशिल्ली दुयेंती भरती करपाची आडवादात्मक प्रकरणां जाता आसतलीं पूण ताचें खापर सरसकट सगल्यांचरे फोडक सारकें जावचें ना.
कोरोना म्हामारीन आमच्या देशातले वट्ट भलायके वेवस्थेंत जाल्ल्या दर्जात्मक सुदारणां कडेन तशी आडनदर करपाक मेळची ना हें कोणूय न्हयकारपाक शकना. आमचे सुपुल्लें गोंय आसूं वा मुंबय-बगळुरू- दिल्ली सारकीं शारां आसत वा उत्तर प्रदेश, बिहार सारक्या व्हडल्या राज्यांचो विचार केल्यार कोरोना म्हामारीच्या पयलींच्या आनी आतांचे भलायके वेवस्थे कडेन तुळा केल्यार बरोच फरक पडिल्लो दसून येतलो. कोरोना म्हामारीच्या भिरांकूळ अश्या अध्यायांतल्यान कांय सकारात्मक घेवपाचें जाल्यार निश्चीतूच वट्ट भलायके वेवस्थेंत जाल्ल्या सुदारणा कडेन पळोवपाक जाता. कोरोनाची धाम एका विशिश्ट मर्यादेच्या भायर गेले उपरांत आमचे भलायके वेवस्थेंतल्यो त्रुटी ठळकपणान सामकार आयल्यो आनी त्यो पयस करप अपरिहार्य जालें. सरकारी आसूं वा खाजगी हॉस्पिटलांतली आयसीयू म्हणल्यार अती दक्षता विभागांतल्यो कॉटी आनी व्हेन्टिलेटर्साचो आशिल्लो उणाव मतींत घेतल्यार अशे परिस्थितींत कोरोना कडेन दोन हात करप अशक्यकूच आशिल्लें, आनी तातूंत अश्या हॉस्पिटलांतल्या आयसीयूंतल्यो कॉटी आनी व्हेन्टिलेटर्साचो आंकडो बराेच वाडिल्लो. ऑक्सिझन म्हणांत वा ‘लाईफ सेव्हर’ वखदांस व्हेन्टिलेटर्स हांचें उत्पादन वाडोवपाचें कोरोना हें एक कारण थारलें. आयसीयू विभागांतल्या दुयेंतीच्या उपचारा विशीं ह्याकाच लागून नवी दृश्टी आनी जाग्रुताय तयार जाली हाचे कडेन आडनदर करपाक जावची ना. आतां अशे धामीक परत घडये तोंड दिवपाचो वेळ आयल्यार काचाबूल जावपाचें कारण आसचें न्हय अश्या वेळार आयसीयू विभागांतल्या दुयेंती विशीं केंद्रीय भलायकी मंत्रालयान ज्यो मार्गदर्शक सुचोवण्यो जारी केल्यात तांचे कडेन गंभीरपणान पळोवपाचो वेळ आयला.
केंद्रीय भलायकी मंत्रालयान ज्यो नव्यो मार्गदर्शक सुचोवण्यो जारी केल्यार ताचे वयल्यान मात्सो गोंदोळ जाला आनी इंडियन मेडिकल असोसिएशन सारक्या संस्थाय ते विशीं अजून ठोस असो निर्णय घेवपाक शकना अशेंच चित्र दिसता. जायत्या दुयेंतींक आयसीयू विभागांत उपचार मेळप ना आनी कांय दुयेंतींक नाकासतना थंय भरती करून तांचेर उपचार करप हो विरोधाभास दिसचो न्हय ह्या हेतान ह्या सुचोवण्यो जारी केल्यात आनी संवसारांतल्या जायत्या वैजकी तज्ञांनो सल्लो घेवनूच हो निर्णय घेतला अशें सांगतात. इत्सा नासतनाय दुयेंतींक तश्या उपचारांची गरज आशिल्ल्याचे सांगून आयसीयू विभागांत दाखल केलें वता अश्या कागाळींक लागून हो निर्णय घेतलो ना मूं, अशें समजवपाक लेगीत सुवात आसा. दुयेंती आनी तांच्या सोयऱ्यांक आयसीयूं विभागांत उपचार घेवपाची इत्सा ना जाल्यार तांणी तें मानून घेवन ताचे इत्से आड अशी भरती करची न्हय अशें केंद्रीय भलायकी मंत्रालयाच्या मार्गदर्शक सुचोवण्यांत म्हणलां. आतां ह्या सुचोवण्यांक अर्थातूच सरसकट येवकार मेळटलो. कारण आजूय जायत्या जाणांक आयसीयूतले उपचार म्हणल्यार हॉस्पिटलां कडल्यानन लुटपाचो एक प्रकार दिसता आनी हो गैरसमज सगल्यांत पयलीं पयस करपाची गरज आसा. हो समज कितलो खरो वा फट आसा हो लेगीत संशोधनाचो वा अभ्यासाचो विशय आसा तरी सगल्याच हॉस्पिटलांक तशें प्रमाणपत्र दिवपाक मेळचें ना हेंवूय तितलेंच खरें आसा.
कोरोना म्हामारी उपरांत देशांतल्या सरकारी आनी खाजगी हॉस्पिटलांत आशिल्ल्या आयसीयूंतल्या कॉटींच्या आंकड्यांत बरीच वाड जाली अशें म्हणपाक जावचें ना. तरी लाख- सव्वालाख मेरेन हो आंकडो आसतलो असो अदमास आसा. आमच्या गोंयांत वहो आंकडो सव्वाशें, देडशें आसत, गोंय मेडिकल कॉलेज हॉस्पिटलांतल्या वेगवेगळ्याा विभागांत मेळून शंबरा परस चड हो आंकडो आशिल्ल्याची म्हायती मेळ्ळी जाल्यार जिल्हो हॉस्पिटलांनी अजून आयसीयू कॉटी उपलब्द नात ही वस्तुस्थिती सामकार आयली. खाजगी हॉस्पिटलांत आयसीयू कॉटी उपलब्ध करप ही सामकी खर्चाची गजाल आशिल्ल्यान व्हडल्या हॉस्पिटलांचो आडवाद सोडल्यार थोड्याश्याच हॉस्पिटलांनी ही वेवस्था दिसून येता. लोकसंख्येच्या प्रमाणांत हो आंकडो सामको उणो आसपाचे हें एक कारण आसा. एका दोतोर इश्टान दिल्ले म्हायती प्रमाण आयसीयू कक्षाचो दिसाचो सरासरी खर्च पांच तें सात लाखां मेरेन आसता. ताका लागून तो खर्च भरून काडपा खातीर कांय फावट हॉस्पिटलांत नाकाशिल्ली दुयेंती भरती करपाची आडवादात्मक प्रकरणा जाता आसतलीं पूण ताचें खापर सरसकट सगल्यांचरे फोडप सारकें जावचें ना. जायते फावट दुयेंती बरो जावपाची शक्यताच आसना पूण आयसीयूंत दवरून त्या दुयेंतीचें मरण लांबणेर उडयतात आनी ताचो भूर्दंड सोयऱ्यांचेर पडटा. ह्या सगल्या गजालींचो अभ्यास करून केंद्रीय भलायकी मंत्रालयान निर्णय घेतलो आसतलो आनी ताका येवकार दिवपाक जाय.
गरजे परस कमी आशिल्ल्या आयसीयूंतल्याा कॉटींचो खरो वापर जो दुयेंती वाटावपाची शक्यताय आसा ताचेंच खातीर जावपाक जाय हाचे कडेन कोणून असहमत आसपाचो प्रश्नूच उप्रासना. आयसीयूंचो वापर चड दुयेंतीइश्ट पद्दतीन जावपाक हातूंतल्यान मजत जावपाची आस्त बाळगुवपाक जाता. देशाचे भलायके यंत्रणेत अजून सुदारणा जावपाक जाय हे विशीं कोणाचे दुमत आसा अशें दिसना. गोंयांत ते तुळेंत हे आघाडेर खूब बरी स्थिती आसा हें मान्यून घेवपाकूच जाय. आयसीयू सुविधांचो वापर फावो ते पद्दतीन जावपाक जाय अशें तज्ञांक दिसता जाल्यार वट्ट भलायके वेवस्थेक फावो ती दिका दिवपाच्या यत्नांची ही सुरवात म्हणपाक जाता. नव्या मार्गदर्शक सुचोवण्यांची इंडियन मेडिकल असोसिएशनाच्या गोंय फांट्यान दखल घेतल्या. मुख्यमंत्री डॉ प्रमोद आनी भलायकी मंत्री विश्वजीत राणे हांचे कडेन चर्चा करून ते विशींची कार्यपद्दत निश्चीत करतले अशी म्हायती आयएमएच्या दिवचल फांट्याचो अध्यक्ष डॉ शेखर साळकार हाणे दिल्या नव्या प्रगत मार्दर्शक सुचोवण्या विशीं लोकां मदीं जाय तितली जाग्रुताय करपाचें काम आतां इंडियन मेडिकल असोसिएशनां सारक्या संस्थांक करचें पडटलें.

वामन प्रभू
9823196359