भांगरभूंय | प्रतिनिधी
पणजी ः भलायकी मंत्री विश्वजीत राणे हांणी शेनवारा 7 जूनाक जीएमसींक अचकीत भेट दिवन कामाची पळोवणी केली. ह्या वेळार ताणें एका दोतोरान कामात हलगर्जीपणा केल्ल्याचो आरोप करून रोखडोच सेवेंतल्यान निलंबीत केलो.
मेळिल्ले म्हायतीप्रमाण, जीएमसींत उपचारा खातीर दाखल केल्ल्या दुयेंती कडेन उल्लेख केल्लो दोतोर सुबेजपणान वागिल्ल्याची कागाळ भलायकी मंत्र्यां कडेन आयिल्ली. वेगवेगळ्या वॉर्डांनी नियमित तपासणी मजगतीं ताणें डॉ. रुद्रेश हांकां तांचे वागणुके विशीं विचारलें. ह्या वेळार समाधानकारक जाप दिवंक नाशिल्ल्यान भलायकी मंत्र्यान उल्लेख केल्ल्या दोतोराक रोखडोच निलंबीत केलो. हे घडणुकेचो व्हिडियो सध्या सोशल मिडियाचेरूय व्हायरल जावपाक लागला. मात कांय नेटिझन्सांच्या मतान, मंत्र्यान सगल्यां सामकार अशें तापोवप योग्य नाशिल्लें.
व्हिडियो- भलायकी मंत्र्यांची जीएमसींक अचकीत भेट, एका दोतोराक केलो निलंबीत
जीएमसींतले दोतोर सगळ्या दुयेंतींची योग्य जतनाय घेतात. पूण कांय जाणांच्या चुकीचे वागणुकेक लागून सगळ्यांक गरजे भायर त्रास सोंसचे पडटात. ह्या लोकांक सामान्य मनशाची सेवा लेगीत करपाक कळना जाल्यार तांकां सरकारी सेवेंत दवरपाचो कांय फायदो ना. मंत्री म्हूण म्हाका हें पावल उखलचें पडटा अशें पत्रकारां कडेन उलयतना भलायकी मंत्र्यान सांगलें.
काँग्रेसीचे अमित पाटकार हांणीय भलायकी मंत्र्यान अशें वागपाक जायनाशिल्लें, अशी प्रतिक्रिया दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
