भांगरभूंय | प्रतिनिधी
-फुडाऱ्यांच्या दिल्ली भेटीक लागून मंत्रीमंडळ फेरबदल चर्चेक ओतोपणजी : भाजप प्रदेश अध्यक्ष दामू नायक हांचे दिल्ली भेटी उपरांत भलायकी मंत्री विश्वजीत राणे हे अचकींत दिल्लींत गेल्ल्यान मंत्रीमंडळ फेरबदलाच्या चर्चेन नेट घेतला. प्रधानमंत्री नरेंद्र मोदी आनी राष्ट्रीय सरचिटणीस बी. एल. संतोष हांची भेट घेवन दामू नायक बिरेस्तारा सांजे गोंयात पावले. भलायकी मंत्री विश्वजीत राणे हांणी लेगीत दिल्लींत सरचिटणीस बी. एल. संतोष हांची भेट घेतिल्ल्याची म्हायती गोपांनी दिली.
दिल्ली भेटींत प्रधानमंत्री नरेंद्र मोदी हांची भेट घेतले उपरांत बिरेस्तारा सरचिटणीस बी. एल. संतोष हांची भेट घेवन तरेकवार विशयांचेर चर्चा केली, अशी म्हायती अध्यक्ष दामू नायक हांणी दिली. भलायकी मंत्री विश्वजीत राणे हांचें दिल्ली भेटी विशीं कसलीच म्हायती ना, अशें तांणी सांगलें.
राज्यांत बरोच तेंप मंत्रीमंडळ फेरबदलाची चर्चा सुरू आसा. मंत्र्यांच्या कामगिरीचेर आदारीत मंत्रीमंडळांत फेरबदल जातलो तशेंच खात्यातूय बदल जातलो. हे बदल बेगीनूच दिसतले, अशें अधिवेशना पयलीं सभापती रमेश तवडकार हांणी स्पश्ट केल्ले. दोन सप्तकां पयलीं पक्षाचे सरचिटणीस बी. एल. संतोष हे गोंयांत आयिल्ले. आमदार तशेंच मंत्र्यां कडेन तांणी तरेकवार विशयांचेर चर्चा केल्ली. हाचे उपरांत फुडाऱ्यांच्या दिल्ली भेटींत वाड जाल्या. अधिवेशना पयली मुख्यमंत्री डॉ. प्रमोद सावंत आनी अध्यक्ष दामू नायक हांणी दिल्लींत फुडाऱ्यांच्यो भेटी घेतल्यो. हाचे उपरांत अर्थसंकल्प सादर जाल्ले दिसाच दामू नायक हांणी प्रधानमंत्र्यांची भेट घेतली. अर्थसंकल्पी अधिवेशन सोंपले उपरांत भलायकी मंत्री विश्वजीत राणे हे दिल्ली गेल्या.
मंत्रीपदा खातीर मायकल लोबो, डिलायला लोबो, संकल्प आमोणकार हांच्या नांवाची चर्चा आसा. मजगती, मायकल लोबो हांकां योग्य पद मेळटलें. मंत्रीपद दिवपा विशींचो निर्णय पक्ष घेतलो, अशें वक्तव्य मुख्यमंत्री डॉ. प्रमोद सावंत हांणी कळंगूट जाल्ल्या पक्षाच्या मेळाव्यांत केला. हे वक्तव्य मंत्रीमंडळ फेरबदलाच्या चर्चेक बळगें दिवपी आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
