भांगरभूंय | प्रतिनिधी
म नीस सदांच आपलें जिवीत धादोशी करूंक वावुरता. सुखान जियेवप हें सगल्यांचें चिंतप जावन आसा. आनी ह्याच खातीर मनीस दीस रात वावर करता, घाम वारयता आनी दुडू जोडटा. असो एक समाज जाल्लो आसा, दुडू आनी गिरेस्तकाय आसल्यार मनशान आपलें जिवीत धादोसपणान सारूं येता म्हूण, हो विचार सारकोच कुशीक दवरूंक जायना. कित्याक आयच्या समाजांत आमी हेंच पळयतात. जांचे लागीं दुडू आनी गिरेस्तकाय आसा ते बरें- बरें जेवतात. जानोत न्हेसतात. व्हडल्यो- व्हडल्यो फोसपायो मारतात, आदीं करता तें आमकां दिसता. दुसरे वटेन गरीब धाकटे लोक अर्दे विंगळे भोंवतात, भुकेन दीस सारतात, आदीं हेय आमी आमच्या समाजांत पळयतात. म्हणटकच दोळ्यांक दिसता, त्या प्रमाणें मनशाचें धादोसपण दुडवांचेर आदारिल्लें आसा अशें दिसना?
दुडू आनी भलायकी
जरीय दुडू आनी गिरेस्तकाय मनशाक गरजेची आसा. तरीय ते दुडू आनी गिरेस्तकाय तुज्या जिविताच्या धादोसपणाची बुन्याद आसा अशें बिल्कूल म्हणूंक जायना. हाचें कारण म्हणल्यार व्हड-व्हड दुडवांकार आनी गिरेस्त मनीस, जांचे लागीं कितेंच ना म्हूण ना. जायते पावटी तांकां रातींची फावो ती झेंम पडना. लाखांनी दुडू मोडून सजयिल्लो बॅड रुम आसा. ऍर कंडिशन आनी हेर दुस-यो सगल्यो वस्तू आसात. पूण चुरचुरे हें सगळें आसून लेगीत ताकां फावो ती झेंम पडना. हाचें कारण म्हणचें ताची भलायकी सारकी ना. जेन्ना मनशाची भलायकी सारकी आसना वा तो पिडेस्त आसता, तेन्ना ताचें जिवीत भायल्यान कितलेंय धादोशी दिसलें जाल्यार भितरल्यान दुख्खी आसता. आनी त्रासान भरिल्लें आसता.
पिडा
जेन्ना मनशाक पिडा लागता. ताची भलायकी इबाडटा. पिडा ही शारिरीक आसूं येता. जेन्ना तुज्या आंगांक वा तुज्या कुडिच्या खंयच्याय भागाक मार वा रोग लागता. दुसरे तरेची पिडा म्हणल्यार मानसीक. जाचे वरवीं मनीस हुसक्यान वेळ सारता. ताचें मन कित्याकूच लागना. खरेंपणीं शारिरीक पिडा मानसीक पिडे परस खूब बरी.
वेयाम
आयच्या समाजांत मनशाच्या जिविताचेर नदर मारूंया. दिसान दीस हॉस्पिटलां वाडटात. कित्याक? दुयेंस वाडटा. दुयेंस कित्याक वाडटा काय? आयचो मनीस , ह्या वेगान धांवपी संवसारांत सारको आळशी जाला. आदीं भोंवतालो, बांयचें उदक काडटालो. आपले कपडे धुतालो. आपल्या भुजांचेर घेवन वस्तू व्हरतालो. घरांत रांदतालो, घरांत जेवतालो आदीं. हो मनीस आंगलटीन अखंड आसतालो. आनी 80 ते 100 वर्सां मेरेन सोंपेपणी जियेतालो. ताची भालयकी ताच्या वावराचेर आदारुन आशिल्ली.
आधुनीक सवलती
आयचो मनीस पयले सुवातेर शेतां-भाटांनी काम करीना. तो कचेरेंत बसून वावर करता. ए.सी. घालून थंड केल्लीं ऑफिसां तीं. मोटार सायकलीन भोंवता. उदक नळांतल्यान येता. कपडे धुंवपाक वॉशींग मशीन आसा. कसलींच वस्त एके सुवातेर सावन दुसरे सुवातेर व्हरतालो जाल्यार कुली जाय. घरांत जेवण रांदूंक तर वेळूंच ना. फास्ट फूड खावन दीस सारता. आदीं..आदीं.. हाकाच लागून आयचो मनीस आंगलटीन अखंड आसना. ताच्या जिविताचो काळ 80 ते 100 वर्सांक उरूंक ना. पूण तो काळ आतां 60 ते 70 वर्सांचेर पावला. आयच्या मनशान नव्या नव्या विज्ञानीक वस्तू वरवीं जायतें जोडलां जायत. पूण खरेंपणीं आपली भलायकी वगडायल्या हातूंत मातूय दुबाव ना.
भिरांकूळ पिडा
आयज रस्त्याचेर अबसुयोग जावन शेंकड्यांनी लोक मरतात. तें आमी पळयतात. तरेकवार दुयेंस आमचेर कांपरो हाडटात. एका काळार टी.बी. हें दुयेंस चड भिराकूळ आशिल्लें. उपरांत कॅन्सर ही पिडा पिडूंक लागली. आयज एड्स ही पिडा अख्खा संवसाराचेर कांपरो हाडटा. हांचें कारण इतलेंच ह्यो सगळ्यो पिडा आमच्याच कर्ण्यां वरवीं आमी आमचेर आपोवन हाडल्यात. म्हणचें आमींच आमची भलायकी वगडायल्या.
समाजीक भलायकी
दुसऱ्या अर्दान समाजीक जिवीतान नदर मारल्यार दिसान दीस डिवोर्स वाडटात. देवाच्या बेंसावांनी घडून घडिल्लीं काजरां मोडटात. फामिलीं फुट्टात. भुरगीं बाळांच्या जिविताचो इबाड जाता. आवय – बापूय आनी भुरग्यां भितरलो मोग आनी मनीसपण उणें जायत वता. संबंद तुट्टात. जाणट्या आवय- बापायक आमच्या घरांनी जागो ना. दिसान दीस ‘ हॉम फॉर ऍजड ’ वाडत आसात. जीं घोव बायलां ‘डिवोर्स’ दिवंक तयार जातात. तीं म्हजे नदरेंतल्यान मानसीक पिडेस्त जावन आसात. तांची भलायकी इबाडिल्ली आसा. ही पिडा आमी निवारतले जाल्यार संवसारांतल्या दोतोरांचे लागीं हे पिडेक वखद ना. देवाचे शिकवणे वरवीं आमी जियेलें जाल्यार हे दळदिरे पिडेचो नास जावंक शकता.
सोंपयतना..
धर्मीक मुल्ल्यां आमच्या जिवितांत आपणायलीं जाल्यार आमचीं मनां शांत आनी धादोस जावंक शकता. शांत आनी धादोस मनां सुखी जिविताची बुन्याद आसा. हिच बुन्याद आमच्या जिवितांत अखंड करूंक वावुरूंया…
लिप्यांतरः
विशाल खांडेपारकार, 8080622370
तोमाझीन कार्दोज
9822170102
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
