भांगरभूंय | प्रतिनिधी
पणजी ः राष्ट्रीय भलायकी मिशन खाला भलायकी खात्यांत कंत्राटी पद्दतीन 10 पदांची भरती जातली. हीं सगळीं पदां एका वर्साच्या कंत्राटाचेर भरतले. हातूंत 2 मानसोपचार तज्ञ, व्हिजीटिंग सल्लागार, समुपदेशक, मानसशास्त्रीय परिचारिका, मानसोपचार सामाजिक कार्यकर्तो, आयकुपाक येना अशा भुरग्यां खातीर प्रशिक्षक, ऑडियोलोजिस्ट, ऑडियो मेट्रीक सहाय्यक आनी डेटा एंट्री ऑपरेटर (दरेक एक) ह्या पदां खातीर भरती जातली.
ह्या पदां खातीर नोंदणी आनी मुलाखती फुडल्या सप्तका सावन सकाळीं 10 ते दनपारां 12.30 मेरेन भलायकी खात्यांत घेतले. व्हिजिटिंग सल्लागार पदा खातीर मेडिसीनांत एमडी वा समतुल्य पदवी आसपाक जाय. ह्या पदा खातीर म्हयन्याक 1 लाख रुपया पगार मेळटलो. उमेदवाराक एक वर्साचो अणभव आसपाक जाय. सल्लागार पदा खातीर समाजीक शास्त्र वा हेर समतुल्य विशयाची पदवी आसप गरजेचें आसा.
मानसोपचार तज्ञ पदा खातीर उमेदवारांक एमडी मानसोपचार पदवी आसपाक जाय. तशेंच उमेदवाराक हॉस्पिटलांत एक वर्साचो कामाचो अणभव आसूंक जाय. ह्या पदा खातीर म्हन्याक 85 हजार रुपया दितले. परिचारिका पदा खातीर बीएससी नर्सिंग आनी मानसशास्त्र डिप्लोमा आसपाक जाय. हाचे खातीर म्हयन्याक 25 हजार पगार आसा. सामाजिक कार्यकर्तो पदाचेर 40 हजार रुपया पगार आसतलो. जाल्यार ऑडियोलॉजीस्ट पदा खातीर 30 हजार रुपया पगार आसतलो.
अपवाद सोडल्यार सगळ्या पदां खातीर उमेदवारां कडेन 15 वर्सांचें रेसिडेन्सी प्रमाणपत्र आसूंक जाय. उमेदवारांक कोंकणीचेंय गिन्यान आसपाक जाय. वेंचून आयिल्ल्या उमेदवारांची राज्यांतल्या वेगवेगळ्या सुवातींनी नेमणूक जातली. कांय पदां खातीर मेडिकल कौन्सिलची नोंदणी आसप गरजेचें आसा. मुलाखती खातीर येतना गरजेची सगळी कागदपत्रां आपल्या वांगडा हाडची असो उलो खात्यान केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
