भांगरभूंय | प्रतिनिधी
कृती घटनाबाह्य आशिल्ल्याचो लडाख बौद्ध संघटनेचो दावो
नवी दिल्ली, खबरां संस्था ः लडाखांतल्या आयुष्मान भारत हेल्थ अॅण्ड वेलनेस सेंटराचें नांव आयुष्मान आरोग्य मंदीर अशें बदलपाक लडाख बौद्ध संघटणेन विरोध उक्तायला. भारत हो धर्मनिरपेक्ष देश आनी सरकारी कार्यालयांत धर्मीक नांवां आनी प्रतीक वापरप हें घटनाबाह्य आनी मान्य ना अशें तांचें म्हणणें आसा.
लडाख स्वायत्त दोंगरी उदरगत मंडळाचे अध्यक्ष आनी मुखेल कार्यकारी सल्लागार आशिल्ले भाजपा फुडारी ताशी ग्याल्सन हांणी बौद्ध संघटणेच्या विरोधाक लागून लेफ्टनंट गव्हर्नर पदाचो राजिनामो दिला. ब्रिगेडियर बी. डी. मिश्राक तांणी पत्र बरयलां. केंद्रांचीं नांवां बदलिल्ल्यान लोकां मदीं असंतोश निर्माण जालां, ताचो विचार करचो पडटलो अशें तांणी बरयलां.
भलायकी मंत्रालयाच्या निर्देशाचो उल्लेख करून आयुष्मान आरोग्य मंदिराचो राज्य भाशांनी अणकार करपाक मेळटलो अशी अट आसा अशें तांणी बरयलां. अशे परिस्थितींत संघटनेचें नांव बदलप ही एक सामकी संवेदनशील गजाल. लोकांच्या भावनांचो आदर करप म्हत्वाचें.
लडाख बौद्ध संघटनेचे अध्यक्ष चारिंग दोर्जे हांणी लेह आनी कारगिल हांगाच्या लडाख स्वायत्त परिशदेक पत्र बरयलां. सरकारी वैजकी मजत केंद्राचें नांव बदलून आयुष्मान आरोग्य मंदीर हें दुर्दैवी आनी लडाखांतल्या लोकांच्या भावनां कडेन खेळप अशें तांणी सांगलें.
भारत हो धर्मनिरपेक्ष देश आनी सरकारी कार्यालयांत धर्मीक नांवां आनी प्रतीक वापरप हें घटनाबाह्य आनी अस्वीकार्य अशें तांणी फुडें बरयलां. देखून लडाख बौद्ध संघटणेन एलएएचडीसी लेह आनी एलएएचडीसी कारगिल हांकां गरजेची कारवाय करून हो प्रस्न उच्च अधिकाऱ्यां कडेन मांडपाची विनंती केल्या.
ह्या वाठारांतलो सगळ्यांत बळिश्ट धर्मीक गट लडाख बौद्ध संघटना संविधानाच्या सव्या अनुसुची खाला लडाखा खातीर राज्यीकरण आनी सुरक्षा उपाय येवजण्यो करपाची मागणी करीत आयला.
आयुष्मान भारत भलायकी आनी निरोगीपण केंद्राचें नांव आयुष्मान आरोग्य मंदिर अशें बदलपाचो निर्णय केंद्रीय भलायकी आनी कुटुंब कल्याण मंत्रालयान फाटल्या वर्सा नोव्हेंबरांत घेतिल्लो. 31 डिसेंबर 2023 मेरेन सगल्या राज्यांक आनी केंद्रीय प्रदेशांक तो चालीक लावपाचे निर्देश मंत्रालयान दिल्ले.
आतां लडाख बौद्ध संघटणेन ताका हरकत घेतल्या. तशेंच तें नांव बदलपाक सांगलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
