भांगरभूंय | प्रतिनिधी
गोंय कर्मचारी निवड आयोगाच्या नुतनीकरण केल्ल्या कार्यालयाचें उक्तावण
पणजी: भरती प्रक्रियेंतल्या पारदर्शकतेक लागून लोकांचो सरकारा वयलो विस्वास घटमूट जाला, अशें मुख्यमंत्री डॉ. प्रमोद सावंत हांणी सांगलें. पाटो- पणजी गोंय कर्मचारी निवड आयोगाच्या नुतनीकरण केल्ल्या कार्यालयाचें उक्तावण केले उपरांत ते उलयताले. जे उमेदवार विवीध पदां खातीर स्पर्धात्मक परिक्षेक बसतात, ते आतां परीक्षा हॉलांतल्यान भायर येवचे पयलीं लेगीत आपलो निकाल पळोवपाक शकतात, अशें मुख्यमंत्र्यान सांगलें.
सगल्या सरकारी खात्यांक भरती प्रक्रियेक पाळो दिवन गरजे प्रमाण भरती करपाचो आदेश सरकारान दिल्लो आसा, अशेंय तांणी सांगलें.
मुखेल सचीव आनी गोंय कर्मचारी निवड आयोगाचे अध्यक्ष डॉ. व्ही. कांदवेलू, आयोगाचे वांगडी नारायण सावंत, सचीव शशांक ठाकूर, दौलत हवालदार आनी हेर अधिकारी ह्या वेळार हजर आशिल्ले. आयोगा खातीर लोगो तयार केल्ले कलाकार सिद्धार्थ गायतोंडे हांचो ह्या वेळार सत्कार जालो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
