भांगरभूंय | प्रतिनिधी
(राज कपूरान कार्यावळ सोंपतकूच माचये फाटल्यान वचून नरेंद्राक वेंग मारुन बाबा बुल्ले शाह हांगेलें ‘मस्जिद ढा दे, मंदिर ढा दे, ढा दे जो कुज कैंदा, पर बुलेया किसे दा दिल ना ढावीं, रब दिलां विच रैंदा…’ हें पद गावंक शकतलो काय विचारलें… आतां मुखार…)
उपरांत 1983 वर्सा राजेश खन्नाच्या ‘अवतार’ फिल्मांत नरेंद्र चंचलाचो आवाज रुप्या पडद्याचेर गाजलो. ‘चलो बुलावा आया है, माता ने बुलाया है’…
नरेंद्रान हयकार दिल्या उपरांत राज कपूरान ताका दुसरे दिसा स्टुडियोंत आपयलो. थंय ‘बॉबी’खातीर ‘बेशक मस्जिद मंदिर तोड़ो, बुल्ले शाह ये कहता, पर प्यार भरा दिल कभी ना तोड़ो, इस दिल में दिलबर रहता, जिस पलड़े में तुले मोहब्बत, उसमें चांदी नईं तौलणां, तौबा मेरी ना ढोलणां, मैं नी बोलणां’ हें गीत जल्माक आयलें. ह्या गीतान
नरेंद्राचें जिवीत बदल्लें. ‘बॉबी’1973 वर्सा प्रदर्शीत जालो तेन्ना पार्श्वगायक नरेंद्र चंचलाच्या आवाजा विशीं चर्चा सुरू जाली. कारण असलो आवाज त्या काळांतल्या चित्रपट संगीतांत नवोच नाशिल्लो तर गावपाची तराय पुरायपणान वेगळी आशिल्ली. बॉबींतल्या हेर गितां वांगडा ‘मै नहीं बोलणां जा’ ह्या गिताचे गायक नरेंद्र चंचल सुपरहिट जाले. ह्या पदा खातीर तांकां फिल्मफेअराचो उत्कृश्ट प्लेबॅक सिंगर पुरस्कार मेळो.
नरेंद्राक बुद्द आयली ते पिराये सावन नेमान दुर्गा देवीचीं गितां गातालो. पूण बॉबीचें संगीत हिट जालें तेन्ना ताका मेळिल्ली नामना नरेंद्र चंचलाचे तकलेंत वचून अहंकार जागो जालो. आतां मातेचें जागरण करपाची गरज ना असो विचार मनांत घोळपाक लागलो. एक दीस सदां भशेन देवळांत गेल्लो. पुजाऱ्यान ताका ‘कुछ भेंट सुनाओ’ अशें म्हणटकूच नरेंद्रान भलायकी बरी नाशिल्ल्याचें सांगलें. कारण दुसऱ्या दिसा ताका आग्रा एका शो खातीर वचपाचें आशिल्लें. पूण दुसऱ्या दिस सकाळी ताचो आवाज बंद जाला, अशें जाणवलें. गावप सोडा तर उलोवपूय शक्य नाशिल्लें. दोन म्हयने अशी परिस्थिती आशिल्ली. निमाणें नरेंद्र तागेल्या आध्यात्मिक गुरूक मेळ्ळो. ताणें नरेंद्राक आवाज परतून मेळोवन दिलो. पूण देवी दुर्गामातेन आपली सेवा करूंक नाशिल्ल्यान ही ख्यास्त दिल्या आसतली, असो विचार नरेंद्राच्या मनांत घुंवत रावलो. माता दुर्गा देवीचें जागरण करपाक पयलें प्राधान्य, तीच आपली अस्मिताय हाची तांकां जाणीव जाली.
चंचल हाका लोकप्रियतेचे तेंगशेर पावोवपी आनीक एक पद म्हणल्यार ‘यारा ओ यारा, इश्क ने मारा’. बेनाम ह्या सिनेमांतलें हें पद. हो धारदार समाजीक प्रस्नांचो थ्रीलर सिनेमा आशिल्लो. 18 ऑक्टोबर 1974 वर्सा प्रदर्शित जाल्ल्या बेनामची काणी अल्फ्रेड हिचकॉकच्या ‘द मॅन हू न्यू टू मच’ (1956) सारकीच आसा.
बॉबीच्या उपाट येशा उपरांत नरेंद्र चंचल हाचो हिंदी चित्रपट सृश्टीतलो दरेक संगीतकार सोद घेतालो.1974 वर्सा रोटी, कपडा और मकान ह्या सिनेमां खातीर मनोज कुमार हाका ‘बाकी कुछ बचा तो महंगाई मार गई’ ही कव्वाली रेकॉर्ड करपा खातीर लक्ष्मीकांत प्यारेलाल हांणी जानी बाबू कव्वाल, लता मंगेशकर आनि मुकेश हीं नांवां पार्श्वगायना खातीर निश्चित केल्लीं. पूण मनोज कुमाराक नरेंद्र चंचलाचो आवाज जाय आशिल्लो. नरेंद्राक ताणें मुंबय जुहू वाठारांतल्या एका हॉटेलांत थांबयिल्लो. मात नेमको रेकॉर्डिंगच्या दिसा थंडी जाल्यान आवाज बसलो. मनोज कुमाराक होमिओपॅथीचें बरें गिन्यान आशिल्लें. ताणें नरेंद्राक गाडयेंतल्यान स्टुडिओंत व्हरतना मजगतीं होमियोपॅथीक गुळयो दिल्यान आवाज बरो जालो. हें गीत स्टुडिओंत डब करपाचें नाशिल्लें, तर थेट रेकॉर्ड करपाचें आशिल्लें. जानी बाबूच्या आवाजान कव्वाली सुरू जाली. लताजी आनी मुकेश हांच्यो ओळीं आयल्यो. मजगतीं अभिनेतो प्रेमनाथ नरेंद्र चंचलाक समजावन सांगतालो. नरेंद्र चंचलान गायिल्ली ओळ ताचेर चित्रीत जावपाची आशिल्ली. चंचलाक गावंक आपयलो. ताणें आपलो पहाडी आलाप लायलो ‘पहले मुट्ठी में पैसे लेकर थैला भर शक्कर लाते थे, अब थैले में पैसे जाते हैं, मुट्ठी में शक्कर आती है’.स्टुडिओंत हाजीर आशिल्ल्या सगलें अजापित जाले. नरेंद्र चंचल हो लायव्ह गावपी कलाकार आशिल्ल्यान ताका रेकॉर्डिंग करपाचो भंय दिसतालो. पूण कव्वाली गावप बरें जालें . उपरांत ताका लता मंगेशकरा वांगडा युगल गायन करपाची संद मेळ्ळी.
नरेंद्र चंचलान गुजराती, मराठी, बंगाली, पंजाबी आनी हिंदी भाशांनी जायतीं गितां गायलीं. 1980 वर्सा नरेंद्राक आवडीचो गायक मुहंमद रफी हाचे वांगडा ‘आशा’ सिनेमांत गावपाची संद मेळ्ळी.‘तूने मुझे बुलाया शेरावालिये, मैं आया मैं आया शेरावालिये.’ हें गीत अज्रंवर जालें. उपरांत 1983 वर्सा राजेश खन्नाच्या ‘अवतार’ फिल्मांत नरेंद्र चंचलाचो आवाज रुप्या पडद्याचेर गाजलो. ‘चलो बुलावा आया है, माता ने बुलाया है’. ह्या गीतांत ताका महेंद्र कपूर आनी आशा भोसले हांणी सांगात दिलो. ह्या दोन गीतांक लागून नरेंद्र चंचलाचें नांव भारतांत घरां घरांत पावलें. मागीर आशा भोसले वांगडा ‘दो घूंट पिला के साकिया, हुए हैं कुछ ऐसे वो हमने पराए,’ लता मंगेशकरा वांगडा ‘दो शत्रू’ ह्या सिनेमांत ‘ओह रब ना करे’ हे सारकीं पदां ताणें म्हणलीं. सिने संगीता वांगडा नरेंद्र चंचल माता देवीलीं भजना गायताले. वर्सुकी जावपी वैष्णोदेवील्या दरबारांत हाजेरी लावन गायनां वरवीं सेवा करताले. ताणें धार्मिक गायनाचे जायते अल्बम काडल्यात. तांणी संवसारभर विंगड सुवातांनी माता देवीच्या जागरणात वांटो घेतलो.
भक्ती गायन वाठारांत नरेंद्र चंचल हांचें नांव इतलें वयल्या पांवड्यार पावलां की संवसारांत असलो दुसरो गायक जावपाक शकलो ना. अमेरिकेच्या जॉर्जिया राज्यान नरेंद्र चंचल हाका मानद नागरिकत्वही दिल्लें. कोरोना काळांत कोरोनाचेर आदारित ‘डेंगू भी आया और स्वाईन फ्लू भी आया, चिकन गोनिया ने शोर मचाया, कित्थे आया कोरोना’ हें गाणें गायतनाचो तांगेलो व्हिडीओ सोशल मीडियावर व्हायरल जाल्लो. नरेंद्र चंचल हाणें ‘मिडनाईट सिंगर’ नांवाचें आत्मचरित्र प्रकाशित केलां. धर्मीक गितां वांगडाच आपल्या खाशेल्या आवाजान सिनेमा पळोवप्यांक मोनेळ घालपी नरेंद्र चंचलान 22 जानेवारी 2021 दिसा ह्या संवसाराक निरोप दिलो.
_______
सुदिन वि. कुर्डीकार
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
