भांगरभूंय | प्रतिनिधी
वेंचणूक प्रक्रिया जैसे थे दवरपाचो आदेश कायम
पणजी : भंडारी समाज गैरवेव्हार कागाळीचे चवकशे खातीर जिल्हो निबंधकांनी आनीक एका म्हयन्याचो वेगळ मागला. वेळेची मागणी करपी अर्ज तांणी उच्च न्यायालयांत दाखल केला. परतून नोटिसो जारी करून सुनावणी घेवची पडटली. हाका लागून सोमारा जिल्हो निबंधकांनी आदेश जारी करूंक ना. वेंचणूक प्रक्रिया जैसे थे दवरपाचो आदेश मात कायम आसा.
सुनावणी घेवन आदेश दिवपा खातीर उच्च न्यायालयान सात दिसांची मुजत दिल्ली. ही मुजत सोंपिल्ली आसली तरी मुजत वाडोवन दिवपाची मागणी जिल्हो निबंधकांनी केल्या.
भंडारी समाजाचे वेंचणुकेंत गैरवेव्हार जाल्ल्याचो दावाे करीत वेंचणूक रद्द करपाची मागणी आतीश मांद्रेंकार आनी अनीश बकाल हांणी केल्ली. जिल्हो निबंधक तुषान कुंकळ्ळकार हांणी सुनावणी घेतली. मात थारिल्ले प्रमाण सोमारा तांणी आदेश दिवंक ना.
भंडारी समाजाची वेंचणूक फाटल्या सोमारा जावन देवानंद नायक हांच्या पॅनलान जैताचो दावो केला. वेंचणुके आड अॅड. आतीश मांद्रेंकार आनी अनीश बकाल हांणी जिल्हो निबंधकां कडेन कागाळ केली. कागाळदार अॅड. आतीश मांद्रेंकार हांणी युक्तिवाद केलो. हाचे उपरांत अशोक नायक हांच्या गटाच्या आदवोगादान बाजू मांडली. भंडारी समाजाचे घटनेंत दुरुस्ती करून ते प्रमाण वेंचणूक घेतल्या. ह्यो दुरुस्त्यो लेगीत बेकायदाे आसात. हाका लागून वेंचणूक घेवपाची प्रक्रिया बेकायदाे आसा. भंडारी समाजाच्या कारभारांत आनीक बेकायदाे गजाली जावच्यो न्हय म्हूण बेगोबेग प्रशासकाची नेमणूक करची, अशी मागणी कागाळदारा वतीन जाली.
जिल्हो निबंधकाच्या आदेशा प्रमाण भंडारी समाजाच्या वेंचणुकेचो फुडार थारतलो. घटना दुरुस्ती बेकायदाे थारावन वेंचणूक रद्द केली जाल्यार देवानंद नायक हांची निवड रद्द जातली. वेंचणूक प्रक्रिया योग्य थारावन निवड ग्राह्य आशिल्ल्याचो आदेश दिलो जाल्यार देवानंद नायक हांच्या फुडारपणा खालच्या समिती कडेन भंडारी समाजाचो कारभार वतलो. हाका लागून सध्याचे घडयेक जिल्हो निबंधकांच्या निर्णयाचेर भंडारी समाज वेंचणूक आनी देवानंद नायक समितीचो फुडार निंबून आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
