भांगरभूंय | प्रतिनिधी
पणजी : भंडारी समाज वेंचणूक कागाळीचेर जिल्हो निबंधकां मुखार आयज सुनावणी जावन निकाल जावपाची आस्त आसा. उपेंद्र गांवकार गटाचे अॅड. अनीश बकाल हांणी ही म्हायती दिली. नोटीस मेळूंक नाशिल्ल्याचे कारण सांगून अशोक नायक गटाच्या आदोगादान बिरेस्तारा सुनावणी वेळार वेळ मागून घेतलो. हाका लागून जिल्हो निबंधकांनी सुनावणी शुक्रार मेरेन फुडे धुकल्ली.
भंडारी समाजाची वेंचणूक सोमारा पणजेच्या कार्यालयांत जाली. अशोक नायक गट आनी उपेंद्र गांवकार गट हांचें मदीं वादावादी जाली. वेंचणुके उपरांत अशोक नायक गटान जैताचो दावो केलो. देवानंद नायक हे अध्यक्षपदाचेर वेंचून आयिल्ल्याचो दावो अशोक नायक हांच्या गटान केला. वेंचणूक प्रक्रिया जैसे थे दवरपाचो आदेश आशिल्ल्यान देवानंद नायक हांच्या अध्यक्षते खाला वेंचून आयिल्ली समिती बेकायदाे आसा, असो दावो उपेंद्र गांवकार हांच्या गटाचो आसा. हे विशींच्या कागाळीचेर जिल्हो निबंधका मुखार आयज सुनावणी जातली.
जिल्हो निबंधकांनी जारी केल्ली नोटीस आमकां मेळूंक ना. हाका लागून जाप दिवपाक वेळ दिवचो, अशी मागणी अशोक नायक गटाच्या आदोगादान केली. हाका लागून सुनावणी शुक्रार मेरेन फुडें धुकल्ली. वेंचणूक प्रक्रिया मात पयली भशेन ‘जैसे थे’ आसतली. उपेंद्र गांवकार गटाचे आदोगाद अॅड. अनीश बकाल हांणी ही म्हायती दिली.
……………
अशोक नायक गटा आड पुलिशेंत कागाळ
भंडारी समाजाच्या वेंचणुकेंत कागदपत्रांमदीं फेरफार आनी फटींगपणा केल्ल्याची कागाळ अशोक नायक गटा आड पणजी पुलिशेंत नोंद जाल्या. गोरखनाथ केरकार, सुनील सांतइनेजकार, जनार्दन ताम्हणकारा सयत 24 जाणांच्यो सह्यो कागाळीचेर आसा. भारतीय न्याय संहिते खाला गुन्यांव नोंद करून कारवाय करपाची मागणी कागाळेंत केल्या. अशोक नायक, देवानंद नायक, जोगुसो नायक, फक्रु पणजीकार, रामदास पेडणेंकार, केदार शिरगांवकार, शिवानंद तळकार, सुरेश चोपडेकार, वामन वैद्य हांचे आड ही कागाळ आसा. भंडारी समाजाच्या कागदपत्रां मदीं फेरफार करून मतदार वळेरेंतली काय नांवा काडून वडयल्यात, अशें कागाळेंत नमूद केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
