भांगरभूंय | प्रतिनिधी
पणजी ः जिल्हो निबंधकांक बदलपाची भंडारी समाजाच्या अशोक नायक गटाची मागणी उच्च न्यायालयान न्हयकारिल्ल्यान सध्याचेच जिल्हो निबंधक गोमंतक भंडारी समाजाच्या वेव्हाराची चवकशी करतले. जिल्हो निबंधकांक बदलपाची मागणी करपी अशोक नायक गटाचो अर्ज उच्च न्यायालयान आयज न्हयकारलो.
उपेंद्र गांवकार गटाचे अॅड. कार्लोस फेरेरा हांणी ही म्हायती दिली. तशेंच कारणां दाखोवपाची नोटीस जिल्हो निबंधका कडल्यान मेळूंक ना, असोय दावो उच्च न्यायालयांत केलो. तशेंच अर्जदारांनी आपली बाजू मांडपाक वेळ मागलो. परतून कारणां दाखोवपाची नोटीस जारी केले उपरांत दोन सप्तकां भितर चवकशी पुराय करपाचे निर्देश जिल्हो निबंधकांक दिल्या, अशी म्हायती अॅड. फेरेरा हांणी दिली.
मजगतीं, भंडारी समाजाची वेंचणूक प्रक्रिया अजूनय तशीच आसा. जिल्हो निबंधकां मुखार वेंचणूक प्रक्रिया संबंदी सोमारा सुरू जाल्ली सुनावणी मंगळारा सांजवेळार परतून सुरू जातली. फाटल्या सोमारा (4 तारखेर) भंडारी समाज वेंचणुकेंत गोंदळ जाल्लो. अशोक नायक गटाच्या देवानंद नायक हांणी आपल्या पॅनेलान वेंचणूक जिखल्या असो दावो केल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
