भंडारी समाजाचे वेंचणुकेचे फायलीक मंजुरी दिवची

भांगरभूंय | प्रतिनिधी

मागणी मांडपा खातीर भंडारी समाजाचें आंदोलन

पणजीः भंडारी समाजाचे समितीची वेंचणूक घेवपाच्या आदेशांक सरकारान पाळो दिवन जी वेंचणुकेची फायल पडून आसा ती फायल बेगीनूच मंजूर करची. सरकार फकत भंडारी समाजाचो वापर करून समाजा भितर फुट घालता. आमचे आनीक पासीयेंस पेड्ड्यार करिनासतना कर नासतना सरकारान वेंचणुके विशींचो निर्णय घेवचो, अशी मागणी भंडारी समाजाचे फुडारी संजीव नायक हांणी केल्या.
उच्च न्यायालायाच्या आदेशा प्रमाण सामाजाची नवी वेंचणूक घेवपाचे मागणेक नेट धरीत भंडारी समाजाच्या एका गटान आझाद मैदानाचें धरणें धरलें. ह्या वेळार संजीव नायक, उपेंद्र गांवकार आनी हेर फुडारी हजर आशिल्ले.
भंडारी समितीचे आनी म्हाल पांवड्यावेल्या फुडार्‍यांक आपोवन सरकाराक एक संदेश दिवपा खातीर आमी हें आंदोलन केलां, अशें नायक हांणी म्हणलें.
एक वर्स मायज जावन गेलें, कायदो खाते आमची फायल घेवन न्हिदलां. राज्य निबंधक आसा तो उश्या पोंदाक ही फायल घेवन न्हिदला आनी हे कुंभकरण जाल्ल्या निबंधकांक गोंयचे रावण राज्य चलोवपी सरकार तांकां साथ दिता. आमचे कडेन खेळों नाकात. आमी बंडखोर भंडारी, आमी खूब पासियेंस का़डलें, जाता तितले बेगीन ही फायल हालोवन उच्च न्यायालयाच्या आदेशाक पळो दिवचो, अशी मागणी नायक हांणी केली.
आठ ऑक्टोबराक आमचें शिश्टमंडळ मुख्यमंत्र्याक वचून मेळिल्लें. आमचे वांगडा भाजप प्रदेशाध्यक्ष दामु नायक आसले. मात आमचे कडेन फटींगपणां जालीं. दुसरे दिसा फायल मंजूर करपाचें आस्वासन मुख्यमंत्र्यान दिलें. मात हे अजून मेरेन येवंक ना. सरकाराक भंडारी समाजाचें पडूंक ना. जेन्ना वेंचणूक येता तेन्ना तांकां समाजाचो उगडास येता. आमच्या फुडार्‍यांक वापरतात आनी जेन्ना न्याय मागपाची पाळी येता तेन्ना सरकारान फुट घालपाचें राजकारण करता, असो आरोप नायक हांणी केलो.
भाजप सरकार दोन फुडार्‍यां मदीं फुट घालपाक शकता. मात आमच्या समाजा भितर फुट घालप शक्य ना. आमी रवी नायक हांचो आदर्श घेवन फुडें वयतात तशेंच आमचे वांगडा रवी आनी देव रुद्रेश्वर आसा. आमी ह्या आंदोलन वरवीं सरकाराक एक संदेश दिला. उपरांत आमची फुडली कृती थारतली. ह्यान फुडें आंदोलन जायत जाल्यार एससी, एसटी, ओबीस आनी अल्पसंख्यांक हांणी आपलो तेंको जाहीर केला, अशें नायक हांणी सांगलें.