भांगरभूंय | प्रतिनिधी
पणजीः नवी कार्यकारी समिती वेंचणूक घेवपा खातीर 11 ऑगस्टाक थारायिल्ली गोमंतक भंडारी समाजाची वर्सुकीं सार्वत्रीक बसका पणजे दिवाणी न्यायालयान रद्द केल्या. हाचे भायर खंयच्याय वांगड्याक वर्सुकीं साबार बसका घेवपाक बंदी आसा. हे संबंदीचो आदेश पणजे दिवाणी न्यायालयाच्या न्यायाधिशानी जारी केला.
गोमंतक भंडारी समाजाचे अध्यक्ष अशोक नायक आनी सरचिटणीस फक्रू पणजीकार हांणी ह्या प्रकरणांत न्यायालयांत दिवाणी याचिका दाखल केल्या. तातूंत उपेंद्र गांवकार आनी गोमंतक भंडारी समाजाचे उपाध्यक्षांक प्रतिवादी केल्यात. ते प्रमाण आदले सरचिटणीस उपेंद्र गवकार हांणी 27 जुलय 2024 दिसा सोसायटीचे मुखेल कार्यकारी म्हणून नोटीस जारी करून 11 ऑगस्टाक वर्सुकीं साबार बसका आपयिल्ली. तशेंच उपेंद्र गांवकाराक सेगीत तीन बसकांक हाजीर रावंक नाशिल्ल्यान 2020 वर्सा काडून उडयिल्लो. हे संबंदीं ताका 19 नोव्हेंबर 2020 दिसा सोसायटीन नोटीस जारी केल्ली. हाचे भायर सद्याचे समितीन 1 मे 2024 दिसा समितीचे वेंचणुके संबंदी चर्चा केल्ली. तशेंच फक्रू पणजीकार हे सोसायटीचे मुखेल कार्यकर्तो आशिल्ल्यान तांणी वेंचणुके संबंदी कसलीच नोटीस जारी करूंक ना. ते खातीर उपेंद्र गांवकारान जारी केल्ली नोटीस रद्द करची. तशेंच समाजांतल्या खंयच्याय वांगड्याक नवी कार्यकारी वेंचपा खातीर वर्सुकी सार्वत्रीक बसका घेवपाक बंदी घालपाचो वाद याचिकादार अॅड. हनुमंत नायक हांणी न्यायालयांत सादर केलें. ह्या प्रकरणांत न्यायालयान सगल्या पक्षांची बाजू आयकून घेवन वयलो अंतरीम आदेश जारी केला. ते प्रमाण 11 ऑगस्टाक आशिल्ली वर्सुकी साबार बसका रद्द केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
