भांगरभूंय | प्रतिनिधी
देवानंद नायक समितीची मागणी : मुख्यमंत्री, दामू नायक सकारात्मक
भांगरभूंय । प्रतिनिधी
पणजी : उपेंद्र गांवकार हांणी भंडारी समाजाची स्वतंत्र समिती स्थापन करून भंडारी समाजाचो स्वतंत्र सर्व्हे करपाची घोशणा केले उपरांत आक्रमक जाल्ल्या देवानंद नायक हांचे अध्यक्षते खालचे समितीन बिरेस्तारा मुख्यमंत्री डॉ. प्रमोद सावंत आनी भाजप प्रदेशाध्यक्ष दामू नायक हांची भेट घेतली. ह्या वेळार तांणी सगल्याच जातींचे गणनेची मागणी केली. हे मागणेक दोनूय फुडाऱ्यांनी सकारात्मक प्रतिसाद दिला, अशी म्हायती देवानंद नायक हांणी शुक्रारा ‘भांगरभूंय’ कडेन उलयतना दिली.
भंडारी समाजाचे दयानंद मांद्रेंकार, किरण कांदोळकार हे फुडारी कांय म्हयन्यां सावन सरकारा कडेन भंडारी समाजाचो सर्व्हे करपाची मागणी करतात. तातूंत कांय म्हयन्यां आदीं जाल्ले भंडारी समाजाचे वेंचणुके उपरांतच्या वादा उपरांत उपेंद्र गांवकार गटान भंडारी समाजाची नवी समिती स्थापन केली. तशेंच गोंयांतल्या ओबीसी प्रवर्गांत येवपी जातीं मदीं भंडारी समाजांतल्या लोकांची संख्या अदीक आशिल्ल्यान गोंयभरांतल्या भंडारी समाजाच्या लोकांची गणना करून ओबीसी आरक्षणांतलो 20 टक्के वांटो भंडारी समाजाक मेळचो, हे खातीर नवी समिती यत्न करतली, अशी घोशणा लेगीत तांणी केल्ली.
उपेंद्र गांवकार हांणी घेतिल्ल्या ह्या निर्णयाक लागून भंडारी समाजांतले दोन गट परतून एकदां चव्हाट्यार आयल्यात. हे मजगतीं, देवानंद नायक हांच्या गटान बिरेस्तारा रातीं मुख्यमंत्री डॉ. सावंत आनी भाजप प्रदेशाध्यक्ष दामू नायक हांची भेट घेतली आनी फकत भंडारी समाजाचीच न्हय जाल्यार गोंयांतल्या सगल्याच जातींचे गणनेची मागणी केली. समाजाचे आदले अध्यक्ष अशोक नायक आनी हेर सगले पदाधिकारी ह्या वेळार हाजीर आशिल्ले.
भंडारी भवनाची मागणी पुराय करपाची हमी
पिळर्ण कोनुनिदादची 5 हजार चौखण मिटर जमीन भंडारी भवना खातीर दिवची, अशी मागणी आमी खूब वर्सां आदीं केल्ली. ती मागणी अजून लेगीत प्रलंबीत आसा. ही मागणी बेगिनात बेगीन पुराय करची, अशीय मागणी आमी मुख्यमंत्री डॉ. प्रमोद सावंत आनी दामू नायक हांचे कडेन केल्या. ती लेगीत मागणी पुराय करपाची हमी दोनूय फुडाऱ्यांनी आमकां दिल्या, अशेंय देवानंद नायक हांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
