भांगरभूंय | प्रतिनिधी
अनवळखी वाहनांन धपको दिल्ल्याचो दुबाव
फोंडें: फोंडें-पणजी राष्ट्रीय म्हामार्गार कोने-प्रियोळ वाठारांत मध्यान रातीं पावणे एक वरांच्या सुमाराक अनवळखी वाहनाचो धपको बसून दुर्मीळ अशा ब्लॅक पॅन्थराक मरण आयलें. रान खात्याच्या अधिकाऱ्यांनी आनी फोंडें पुलिसांनी घडणूक थळाव धांव घेवन ब्लॅक पॅन्थराची कूड ताब्यांत घेतली. तशेंच रानां मंत्री विश्वजीत राणे हांणी ह्या प्रकरणाची गंभीर दखल घेवन चवकशीचे आदेश दिल्यात.
कोने-प्रियोळ वाठारांत रस्तो हुपतना अनवळखी वाहनांन धपको दिल्ल्यान अपघात जाल्ल्याची घडणूक घडली आसुये, असो दुबाव रानां खात्याच्या अधिकाऱ्यांनी उक्तायलो. ह्या मार्गा वेल्यान वचपी एका नागरिकाक ब्लॅक पॅन्थर जखमी अवस्थेंत पडिल्ल्याचें दिसून आयलें. ताणें रोखडीच पुलिसांक हाची म्हायती दिली.
पुलीस आनी प्राणीमित्रांनी घडणूक थळार धांव घेतली. सुरवातेक जाळे घालून ब्लॅक पॅन्थराक बंदिस्तो केलो. उपरांत ताची पळोवणी करतकूच तो जितो आशिल्ल्याचें नदरेक आयलें. पूण त्या पॅन्थराक वेळारूच उपचार मेळूंक नाशिल्ल्यान ताका मरण आयिल्ल्याची म्हायती प्राणीमित्रांनी दिली.
मजगतीं, पुलिसांनी घडणुकेचो पंचनामो केलो, आनी त्या वाहनाचो सोद पुलीस घेत आसात. ते खातीर वाठारांतले सीसीटीव्ही फुटेज तपासतात.
खोलायेन चवकशी करतले: राणे
कोने-प्रियोळा अनवळखी वाहनान धपको दिल्ल्यान ब्लॅक पॅन्थराक मरण आयिल्ले घडणुकेची रानां मंत्री विश्वजीत राणे हांणी गंभीर दखल घेतल्या. रान अधिकाऱ्यांक सविस्तर अहवाल सादर करपाचे निर्देश दिल्यात. पुलिसांकूय चवकशीत वांटेकार करून घेतले. हे घडणुके विशीं राणे हांणी दुख्ख उक्तायलां. तांणी म्हणलें की, ह्या प्रकरणाची खोलायेन चवकशी करून गरजेची ती कारवाय करतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
