भांगरभूंय | प्रतिनिधी
नवी दिल्ली, खबरां संस्था ः भारत आनी पाकिस्तान हांचे मदीं चालू आशिल्ल्या तणावांतल्यान बिरेस्तारा (8 मे) भारतांतल्या 15 परस चड शारांनी वीज पुरवण खंडीत जाली. पाकिस्तानी ड्रोन आनी क्षेपणास्त्रांचो उपेग करून अस्तंत आनी उत्तर शिमेवयल्या भारतीय लश्करी सुविधांक निशाणो केलो. हाचे उपरांत भारतीय सशस्त्र दळान प्रतिहल्लो सुरू केल्ल्यान ब्लॅकआवट केलो. कांय थारायिल्ल्या वाठारांनी सगळ्यो लायटी बंद करप वा मर्यादीत प्रमाणांत चालू दवरप म्हणल्यार ब्लॅकआवट.
हल्लो जाल्यार ब्लॅकआउवट करप म्हणल्यार कितें?
दुस्मानांनी हल्लो केल्यार संघर्शाच्या काळांत ब्लॅकआवट जाल्यार उक्त्या जाग्या वयल्यान दिसपी सगळे उजवाडाचे स्रोत नश्ट जातात. ते प्रकाश येवजणेच्या निर्बंधांचो एक भाग आसून ताका लागून नागरी संरक्षण यंत्रणा घटमूट करपाक मजत करता. भारताचेर हल्लो जाल्यार नागरिकांनी कितें करचें हाची म्हायती मेळची म्हूण भारताच्या रणनितीचो एक भाग म्हूण 7 मेक आयोजीत केल्ल्या मोक ड्रिलांत ब्लॅकआवट चांचण्यो केल्यो.
केंद्रीय गृह मंत्रालयाच्या नागरी संरक्षण महासंचालनालयाच्या 2003 च्या आदेशांत भारतांत नागरी संरक्षणाची सामान्य तत्वां नांवाचे नेम सादर केल्ले. हवाई हल्ल्या पसून वाटावपा खातीर घेवपाक जाय आशिल्ल्या खबरदारीच्या उपायांत उजवाडाचेर निर्बंध हें म्हत्वाचें खाशेलपण आसा अशें तातूंत स्पश्ट केलां. तशेंच सामान्य दृश्टीकोन परिस्थितींत जमनीवयल्यान 5 हजार फूट उंचायेचेर मात पसून उजवाड दिसूंक फावना अशें नेमांत म्हणिल्लें.
‘ब्लॅकआवट’ कसो मजत करता?
रातच्या वेळार दुस्मानाच्या विमानां पसून काळखाचो हुस्को करिनासतना लोकांक स्वताची आनी तांच्या भौतिक मुळाव्या साधनसुविधांचो बचाव करपाक मेळचो हो ब्लॅकआवटाचो हेत आसा. ब्लॅकआवट जाल्ल्यान वेगान चलपी विमानांक लेगीत जमनी वयल्या लक्ष्यांक लॉक करप कठीण जाता. नागरी संरक्षण महासंचालनालयाच्या आदेशांत अशेंय म्हणलां, जर वाठार काळोखांत आसल्यार कॉकपिटांतल्या दुस्मानाच्या पायलटांकय अडचणी निर्माण जावंक शकतात.
प्रकाश येवजणेचेर निर्बंध कशें घालचे?
सगळे प्रकाश येवजणेचेर निर्बंध एकाच वेळार घालप शक्य ना अशेंय ह्या आदेशांत म्हणलां. ही हालचाल ल्हवू ल्हवू करप हो सगळ्यांत बरो उपाय. जाका लागून नागरिकांक उण्यांत उण्या उजवाडान तांचे सामान्य काम करपाक मेळटलें. हातूंत रस्त्या वयले दिवे, इमारती आनी वाहनांतले दिवे, व्हड संकुल हांचो आस्पाव जाता.
म्हणल्यार रस्त्यावयल्या दिव्यांचें उदाहरण घेतल्यार ह्या रस्त्या वयल्या दिव्यांचो आंकडो उणोच दवरचो. तशेंच उरिल्ल्या दिव्यांचो उजवाड शक्य तितलो उणो करचो. उजवाड जमनीचेर परावर्तित जावचो न्हय हाची खात्री घेवची. तशेंच इमारत वा उक्त्या मैदानाच्या बाबतींत खंयच्याय सुवातेर इमारतीच्या भायल्या भागांत पावपी वट्ट उजवाड 20 फूट अंतराचेर 25 वॅट बल्बा वरवीं वा 6 फूट अंतराचेर सादारण हरीकेन कंदीलान जमनीचेर सोडिल्ल्या उजवाडा परस चड आसूंक फावना अशेंय ह्या आदेशांत म्हणलां.
‘क्रॅश ब्लॅकआवट’ म्हणल्यार कितें?
हवाई हल्ल्याची शिटकावणी मेळ्ळे उपरांत कारखान्यांत आनी वेपारी वाठारांनी ‘क्रॅश ब्लॅकआवट’ चालीक लायतात. रातच्या वेळार दिसपी इमारती हवाई हल्ल्याचें लक्ष्य जावच्यो न्हय असो हाचो हेत आसा. हाका लागून पुराय वाठारा खातीर तो एक संरक्षणात्मक उपाय थारता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
