भांगरभूंय | प्रतिनिधी
येजमान भारतान वन डे माळेंतले पयले मॅचींत न्युझिलॅण्डा आड 12 धांवड्यांनी उमळशीक वाडोवपी जैत जोडलें. पयलीं बॅटींग करतना भारतान निर्धारीत 50 ओव्हरींनी 8 विकेटी वगडावन 349 धांवड्यो केल्यो. प्रत्युत्तर दितना न्युझिलॅण्डान 49.2 ओव्हरींनी सगले बाद 337 धांवड्यो केल्यो.
मायकल ब्रेसवेलान जबरदस्त बॅटींग करून 78 बॉलांनी 140 धांवड्यांची खेळी करून आपल्या पंगडाक जैताच्या लागसार हाडलो. ताणें 12 चवके आनी 10 सके मारले.
एका वेळार न्युझिलॅण्डान 131 धांवड्यांचेर स विकेटी वगडायिल्ल्यो. ताका लागून भारत ही मॅच सहज जिखतलो अशें दिशिल्लें. पूण, हांगाच्यान ब्रेसवेल आनी मिचेल सॅंटनर हांणी डाव सांबाळ्ळो. दोगांयनी सातवे विकेटी खातीर 102 बॉलांनी 162 धांवड्यांची भागिदारी केली. सॅंटनर 45 बॉलांनी 57 धांवड्यो करून बाद जालो. मोहम्मद सिराजान म्हत्वाच्या खिणाक ही भागिदारी फोडून मॅचींत उमळशीक वाडयली.
निमाणे ओव्हरींत न्युझिलॅण्डाक जैता खातीर 20 धांवड्यांची गरज आशिल्ली. शार्दुल ठाकूराच्या पयल्याच बॉलाचेर ब्रेसवेलान सको मारलो. ते उपरांत शार्दुलान दुसरो बॉल वायड घालो. जाल्यार तिसऱ्या बॉलाचेर ताणें ब्रेसवेलाक एलबीडब्ल्यू बाद केलो.
ते पयलीं रोहित शर्मा (38) आनी शुभमन गिल हांणी डावाची सुरवात केली. रोहिताक परतून व्हड खेळी करपाक जमली ना. विराट कोहली (8) आनी इशान किशन (5) सवाय भितर तंबूंत परतले. सुर्यकुमार यादव 31 धांवड्यो करून बाद जालो. बाद जावचे पयलीं ताणें गिला वांगडा मेळून 52 बॉलांनी 65 धांवड्यांची भागिदारी केली.
गिलान दोन जीवनदानां मेळ्ळीं. हीं जीवनदानां अखेरेक न्युझिलॅण्डाक म्हारग पडलीं. गिलान 208 धांवड्यांची खेळी केली. ताणें 149 बॉलांनी ह्यो धांवड्यो केल्यो. हातूंत 19 चवके आनी णव सक्यांचो आस्पाव आशिल्लो. दोट्टी शेंकडो मारपी तो सगल्यां उण्या पिरायेचो बॅट्समन थारलो. ताणें भारताच्याच इशान किशनाचो विक्रम मोडलो. भारता वतीन दोट्टी शेंकडो मारपी तो पांचवो बॅट्समन थारलो. रोहित शर्मान तीन दोट्टी शेंकडे मारल्यात. सचिन तेंडुलकर, वीरेंद्र सेहवाग आनी इशान किशन हांणी दरेकी एक दोट्टी शेंकडो मारला.
शुभमन गिलाचो संवसारीक विक्रम
वन डे क्रिकेटींत दोट्टी शेंकडो मारपी शुभमन गिल संवसारांतलो सगल्यांत उण्या पिरायेचो बॅट्समन थारलो. ताणें 23 वर्सां आनी 132 दिसांचो आसतना हो विक्रम केलो. ताणें आपल्याच देशाच्या इशान किशानाचो विक्रम मोडलो.
वन डे क्रिकेटींत आतां मेरेन 10 खेपे दोट्टी शेंकड्यांची नोंद जाल्या. हातूंतले सात दोट्टी शेंकडे भारतान मारल्यात, जाल्यार उरिल्ले तीन बॅट्समन हेर देशांतले आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
