भांगरभूंय | प्रतिनिधी
नवी दिल्ली, खबरां संस्था: दादलो आनी बायले मदले प्रेम संबंद जर सहमतान आसत आनी उपरांत तांचें ब्रेकअप जाल्यार दादल्याचेर बलात्काराचो गुन्यांव दाखल जावपाक शकना. प्रेमसंबंध आसात, लग्न जावंक ना, जाल्यार ब्रेक अप जालें म्हणून दादल्यांचेर गुन्यांव दाखल करपाक मेळचो ना. अशें एका प्रकरणाचेर निकाल दितना सर्वोच्च न्यायालयान म्हणलें. एके बायलेन तिच्या इश्टान लग्नाचो सोपूत दिवन तिचेर परत परत बलात्कार केल्ल्याची कागाळ दिल्ली. हें प्रकरण सर्वोच्च न्यायालयांत आशिल्लें. उपरांत हे विशीं सर्वोच्च न्यायालयान निकाल दिलो.
न्यायालयान कितें म्हणलें?
न्यायमूर्ती बी.व्ही. नागरत्ना आनी न्यायमूर्ती एन. कोटिश्वर हांच्या खंडपीठान एक म्हत्वाचो निकाल दिला. तांणी सांगलें ज्या नात्यांत सहमतीन प्रेमसंबंद दवरल्यात, शरिरीक संबंद तांचे मदीं प्रस्तापीत जाल्यात अश्या नात्यां मदीं ब्रेकअप जालें काय दादल्याचेर बलात्कार वा लैंगीक अत्त्याचाराचो गुन्यांव दाखल जावचो ना. असल्या प्रकरणांक कसलेच तरेच्या गुन्यांवाचो रंग दिवपाक मेळचो ना.
कितें आशिल्लें प्रकरण?
कागाळदार बायलेन २०१९ त एक याचिका दाखल केल्ली. जातूंत तिणें, आपल्या इश्टान लग्नाचो सोपूत दिवन बलात्कार केलो, लैंगीक अत्त्याचार केलो. तांणी बळयां आपल्या वांगडा शरीर संबंद दवरले. कागाळदार बायलेचे हे कागाळीचेर कलम ३७६ (२) आनी ५०६ खाला गुन्यांव दाखल केल्लो. मात हो गुन्यांव रद्द जावचो म्हणून याचिकाकर्त्यान अर्ज दाखल केल्लो. पयलीं दिल्ली उच्च न्यायालयांत हें प्रकरण गेलें. उच्च न्यायालयान याचिका भायर मारली ताका लागन हें प्रकरण सर्वोच्च न्यायालयांत गेलें. सर्वोच्च न्यायालयान बायलेन केल्ले आरोप फटींग आसात अशें म्हणलें. तेन्ना न्यायालयान बायलेक होय प्रस्न विचारलो, जर याचिकाकर्ता बलात्कार करतालो, लैंगीक शोशण करतालो म्हणून खबर आसूनय तूं ताका कित्याक मेळटाले? दोगांय सज्ञान आशिल्ल्यान तांचे मदीं सहमतीन शरिरीक संबंद जाल्यात. ताका लागून सर्वोच्च न्यायालयान ह्या प्रकरणांत लैंगीक शोशण वा बलात्काराचो गुन्यांव नोंद करपाक मेळचो ना अशें म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
